Read South Giziga JOB 33 Bible Online

JOB 33 - South Giziga bible

JOB 33

¹Ka Jop, inga cine ɓi ɗu ya mawuɗ i ɓa na, yo jika slimiɗ asi mingiɓi ɗu na takwa.

²Ani i ra wuna mi ɗu so, ɓa irne ɗu a sa ɓo ɓi ti balama.

³I wuɗ i ɓi ti wuluk midar dar, yo i ɓi di i ɓi mikaslsla, mubun le ndar wãˀ.

⁴Migiy deŋ na, i ˀUf ngi Buymisemuŋ, i ˀUf ngi Misi Gidaŋ wãˀ mavuliy siifa.

⁵Da ki mbiɗiy di gu na, mbiɗiy di, sey ki juw vu far, ɓa ki lum mi ngi ngiliy mi.

⁶Pura ɗi, ndra rak raka a mbuŋ Buymisemuŋ, a ndirikiy ya ti hohoy vuna ya!

⁷Naŋ kine, anja zluwun a guw ti ya, ɓa ki jijik ta, yo y'anta guzuvuruw ti gidaŋ ɗu na ta.

⁸Ti ka maɓi zleˀe, ki mahiri naŋ, ki mahiri naŋ na, i ra cine ti slimiɗ ɗu aruŋ, asi ki ɓi ani zleˀe:

⁹«Ya manja dili, mungra anta avu ya ta, ya kaslsla, cimak ar ɓi malambaˀa.

¹⁰Amma Buymisemuŋ ara lum gwat ngi mbiɗiy hirnga aseˀe na si, a gi ti ya mesene naŋ.

¹¹A ciy dambla gizl gizl a saraya, ara jiɗa sar ɗu ya maɗuva taˀ taˀ gara!»

¹²I pura na, ki zluɓa le ar ɓi hana ɓula, i ɓuw di. Asi Buymisemuŋ a funa mburo le haɗa.

¹³Ki wuɗ ki ngilaŋ mi vur mike? Asi ɓi ka maɓa gar na, naŋ anta ziluw mi ara gar ta.

¹⁴Dambalaka, Buymisemuŋ, da a wuɗ le ɓa a ɓa mburo na, a ɓaŋ ti jiviɗ wal wal ka naŋ muwuɗ le gar, amma mbur maji lesl asi mingiɓi naŋ anta.

¹⁵A ɓa mburo ar musuwun, ar gwat naŋ mapura ar musuwun ti duvuɗu, ar hinje bebezem mira ja mburo, malla hirak ti mburo mihinje le tup ar arngawo naŋ.

¹⁶Akẽh so na, a wuna slimiɗ ngi mburo, a ɓaŋ ɗaˀ ɗaˀ ngi wãˀ ani:

¹⁷ɓa mbur a mbiɗa gwat ngi gi naŋ, ɓa mbur bugawla a pula huhumo vu.

¹⁸Naŋ kine, naŋ malaha mbur avu ci hirnga ng'ar vigiɗ, yo naŋ matikaŋ avu cik ti ziwite na, kahana.

¹⁹Pas numuŋ, Buymisemuŋ a suro mi da mburo ti vu ngi ji ɓaˀ a ruwuy, gamba anta pulaŋ mbak le ta wãˀ.

²⁰Gwat ngi zum a gaŋ kuyta wãˀ, gwat ngi zum mezle kwana, mi anta ndum ngi zum naŋ ta.

²¹A zəh a haŋ haŋ kitingbeŋ si, tesley mapuram zleˀe ta tuwa na, sek ar li babara.

²²Akẽh na, naŋ sar pal tir vigiɗi, siifa naŋ, naŋ asi haŋ ngi miziza vuhoy.

²³Amma da modro ngi Buymisemuŋ ada ngi cika vu aseˀe, modro purla a wuzla mudurmukoyo, ɓa a ɓa ɓi ngi gwat ngi gi ngi mburo na,

²⁴anja modro nah a puraŋ ircece, a ɓa Buymisemuŋ: «Ki pulaŋ a ci hirnga ng'ar vigiɗ ta, ani i lum jiviɗ ngi mbiɗa hirnga ngi mbur misenna le!»

²⁵Dar vu naŋ a mo sidem sidem a muŋ, kaɓa naŋ misi ti zuŋ zleˀe, a mo deken deken kaɓa naŋ misi i gawla menjeɓele aruŋ zleˀe.

²⁶Da naŋ misa tumbulo Buymisemuŋ le na, a cinaŋ di, aru nga mbuŋ naŋ ti zluzluɓ, asi Buymisemuŋ a lahaŋ le.

²⁷A zli dimis a mbuŋ mizli, a ɓi: «Zleˀe na, i gi mungra le, i ngila ɓimujuwa le, amma Buymisemuŋ a giy bonoy ter ngi giy di zleˀe na ta.

²⁸A mbuɗo hirnga ɗu avu ci ng'ar vigiɗe, yo siifa ɗu a sa singila li minjahha!»

²⁹Pura, gwat kahana gar na, i Buymisemuŋ maga, a ga sar cuw malla sar makir da mburo.

³⁰Naŋ maga kanah na, ɓa ngi mbiɗa hirnga ngi mbur avu ci ng'ar vigiɗe, yo ɓa a ga li minjahha da mizli misi ti siifahaya.

³¹Jop, jika slimiɗe, cine mingiɓi ɗu, cifi siriw, i wuɗ ɓa i ɓuw ɓi.

³²Da mingiɓi ɗik ada na, mbiɗiy di, ɓo di, asi yi wuɗ i tiri ti ka mbur mijeŋŋe.

³³Da mingiɓi anta avu ka ta na, cin avu ya. Taˀa mi siriw, i wuɗ i dubunuw sinmijileŋ.