Read South Giziga JOB 34 Bible Online

JOB 34 - South Giziga bible

JOB 34

¹Akẽh Elihu a zla, a ɓi ma:

²Kum misi sinmijileŋhey, cinaka mingiɓi ɗu mukoloŋ koloŋ na, kum misina gwatay, jikaka slimiɗ asi mingiɓi ɗu.

³Asi masina mingiɓi, naŋ mezle na, i slimiɗe, kaɓa balam matitila gwat mundum na ya.

⁴Maslaka wala ngi gwat mijeŋŋe i ndra, ndra jom gar ndra, tuɓukum gwat mezle kuy kuy.

⁵Jop a ɓi ani: «Yi mbur mijeŋŋe, amma Buymisemuŋ a ngum giy kiita ɗu ta.

⁶Ko ti ya mbur mikaslsla kwana, a tiri ti ya mbur misi slir. Manja ya migi mungra kwana, a giy waˀa madiɗa ngi mucu.»

⁷Mbur gambara mindila Jop ada kwa? A gi dungur ti mi ngi sliŋ kaɓa i yam ngi si ngbuɗok ngbuɗok si mbrike!

⁸A ram digi zlaɓ zlaɓ ati migi malambaˀhay, yo a laˀam ati misi moˀorehey.

⁹Jop a ɓi ani ma: «Mbur mawuɗ, anja Buymisemuŋ a puraŋ kuy na, a lum di mike,» kini takwa?

¹⁰Kum mizli misi lesley, cinaka mingiɓi ɗu so! Buymisemuŋ i misi moˀore kwa? Ki vulkam kaɓa Misi Gidaŋ wãˀa naŋ jeŋŋe ta, wuluk kum misenna naŋ kuy ta wãˀ.

¹¹Asi a wurka mburo weˀe asi slra naŋ, yo a gi ti mburo gar weˀe asi gwat ngi gi naŋ.

¹²Naŋ kanah gisiŋ, Buymisemuŋ anta ga gwata ti moˀore ta, ɓi mikaslsla na, Misi Gidaŋ wãˀa, naŋ anta ngila ɓi nah ta.

¹³Muvula hirwuy da Buymisemuŋ i mbur kwa? I mbur mupula duniya kurzluˀ gar asi haŋ naŋ kwa?

¹⁴Buymisemuŋ, da a wuluk zleˀe sey vur hirnga naŋ, da a tiɓa musuwun naŋ ngi siifa le a muŋ zleˀe na,

¹⁵anja gwat misi titirihey gar a micam pay ar li purla, yo mburo, a mi ng'ar murɓuk a muŋ.

¹⁶Ani ki mbur misi lesl ma na Jop, inga cin, jika slimiɗ asi mingiɓi ɗu.

¹⁷Da Buymisemuŋ i mesene ngi gwat ngi gi mijeŋŋe na, a zum buy kwa? Mbur mijeŋŋe, mbur mimezle wãˀa, ki wuɗ ki jaŋ ti kiita mbrike?

¹⁸Maɓa buyo: «Sulome,» yo maɓa mizli madiɗahaya: «Migi mungra madiɗahay» na, i Buymisemuŋ pal naŋ.

¹⁹Majini ˀis asi yarmahaya, i naŋ pal naŋ, yo naŋ anta gi ti mbur misi zlili pal avu mbur misi murga ta, asi miga taŋ gar i naŋ ti haŋ naŋ.

²⁰Akẽh na, mizli madiɗa tayna a micam gurjik ti wuzla duvuɗo si, mizli a wusam haɓar haɓar, joˀ buyoy a ngizlam kap, a zizaka mbur migidaŋ wãˀa, manja haŋ kaw le ava.

²¹Asi Buymisemuŋ, a ro hiri taˀ avu gwat ngi gi ngi mburo, ara singila ɗuva sar naŋ mitaˀ taˀ na gar.

²²Luvuŋ malla ko li mitimbiɗim ngi mizli mumucahay kwana, anta ɗumo migi malambaˀhaya gu ta.

²³Buymisemuŋ anta jiɗa mburo, hã hirnga puyuk, ɓa a so ng'ar kiita a mbuŋ naŋ ta.

²⁴A putukuso mizli madiɗahaya, manja a ka virzi taŋ, a ci mizli mekelemey ar li taŋ.

²⁵Asi a si na gwat taŋ magaka le, a putukuso taŋ, yo a musukuɗo taŋ ar duvuɗ purla si.

²⁶A ca taŋ babarva a mihiri mizli gar, kaɓa migi mungra madiɗahay.

²⁷Asi a ngumam sipakaŋ ta, a sinaka sipa jiviɗ naŋ gar mata.

²⁸Hã widi ngi mbur misi murga a cin gbaˀ avu Buymisemuŋ, yo a cine widi ngi mizli muguzuvuraˀahaya.

²⁹Amma da Buymisemuŋ a cifi le teˀ teˀ na, masa jaŋ ti kiita i waka? Da a ɗumo mihiri naŋ le na, masa pura kwaŋ i waka? Dambalaka ara ki slimiɗ ar sukwi ngi mizli titirahay ar duniya vuna ngbaŋ.

³⁰N'anta ngum ɓa mbur maziriɗ mi, a zum buyo ta, yo ɓa a jaka mizli ar kwara ta ngbaŋ.

³¹Amma da mbur a ɓa Buymisemuŋ le: «Yi gi malambaˀ le, y'anta sa gi malambaˀa mata.

³²Malambaˀ ɗu ya misina t'aruŋ na, ka vuna bigiy di, da i gi gwat mijeŋ ta le na, y'anta sa mahiri naŋ mata» na,

³³avu ka ki wuluk mbrike? Buymisemuŋ a kutaŋ ti bonoy kwa? Yi si na le, ki singir ara ti singir. Asi majuwa ɓi a mevele, i ga kahana na, i ka, i ya ta. Na, ɓi ka misina na, ɓo di so.

³⁴Mizli misi lesley ati misi sinmijileŋhey macinaka mingiɓi ɗu na, a sa ɓikiy ani:

³⁵«Mbur Jop magi mi haɗa hana, a sin gwat neˀ le ta, a ɓi koloŋ koloŋ i mi misi purlahha, yo mbiɗeˀvra naŋ anta.»

³⁶Yi wuɗ anja ngi cufuɗa Jopo ava, hã da naŋ misina le, a zluɓa le.

³⁷Asi mike na, Jop ara slikiɗ ɓi bac nga hirnga malambaˀ naŋ na ma. A siko ɓihey ngi jigina mi avu Buymisemuŋ, waɗ a yo wuluk cuw cuw a wuzla ndra.