Read South Giziga JOB 35 Bible Online

JOB 35 - South Giziga bible

JOB 35

¹Akẽh na, Elihu a zla, a ɓi ma ani:

²Ka maɓi: «Ya jeŋŋe fineˀ Buymisemuŋ» na, ki wa na, naŋ kaslsla sukwani?

³Asi ki ra ɓi na: «Sey i gi mungra ta na, li lum ɗu i mike? Na zle a cuw ka le kwa» kini ta kwa?

⁴Ya i wuɗ i mbuɗuw di, da ka ati ngama ɗikeye jom gar.

⁵Pura muŋ kuy kuy, singila gazlavaya, taŋ kileŋ a hirnga ɗike!

⁶Ka magi mungra na, a ca Buymisemuŋ le kwa? Ka maslikiɗ ɓi ava ava na, a gaŋ mi pet ka?

⁷Da ka jeŋŋe tekeɗe na, a pulaŋ gir mike? N'ada lum gwat tivi ka kwa?

⁸Moˀore ɗike, ki ga da mizli titirahay misi kaɓa ka, yo gi jeŋŋe ɗik na kwana, a pul di i gir da mizli tewle.

⁹Mizli a roko niˀicam, asi ara guzuvuraka taŋ fineˀ gidaŋ, mizli a roko wudam asi mizli madiɗahay ara tikaka taŋ ˀay ti gidaŋ.

¹⁰Amma ko mbur macufuɗ: «Buymisemuŋ migi ɗu, naŋ amaka? na, anta. Naŋ manjik dimis da mbur ti duvuɗu,

¹¹yo naŋ masirika ndra fineˀ gwat misãmihey, a vula ndra sinmijileŋ fineˀ ɗiyuw ngi ɓuhoyo.»

¹²Dar mizli a wudam, amma Buymisemuŋ anta mbiɗa taŋ di ta, asi moˀore ngi mizli muhuhumo vuhoy na.

¹³Mingiɓi mupuɗaw ta na, Buymisemuŋ anta cine ta, Misi Gidaŋ wãˀa, anta ki slimiɗ ara ta.

¹⁴Jop, Buymisemuŋ naŋ anta cinuw di kuy kuyta wãˀ le jak, asi ki ɓi na: k'anta pura Buymisemuŋ ta, ki slufaŋ ɓi ɗike le ngbaŋ kwana, ki ra kutuk na si.

¹⁵Amma, asi naŋ maji mevel t'aruŋ, yo naŋ mapura slikiɗa ɓi kaɓa i ɓi ta tuwa na,

¹⁶dar ka Jopo, ki wuna mi ngi ɓi ɓi ngatara lambaˀ, yo ki ɓi mi ngi gilaway koloŋ koloŋ lambaˀ kine.