Read South Giziga JOB 36 Bible Online

JOB 36 - South Giziga bible

JOB 36

¹Elihu ara ɓi ava na si:

²Jop, ɓusiy neˀ ava ma si, ɓa i dubunuw gwata, asi mingiɓi ada avu ya aruŋ, ɓa i ɓa ngi cika vu asi Buymisemuŋ.

³I wuɗ i biga sin ɗu ngi gi gwata, da mizli mikileŋ kileŋhey wãˀ, ɓa i biga mbur migi ɗu na, naŋ jeŋŋe.

⁴Asi mingiɓi ɗu mukoloŋ koloŋ na, i mi ngi tikina vu ta gisiŋ, yo ya mbur misi a ciki ɗik na, yi mbur misi sin migisiŋ gisiŋ.

⁵Pura ɗi, Buymisemuŋ naŋ gidaŋ haɗi, ɓa a ɓi: «A ciy ta» na, naŋ anta ɓi kahana vur mburo ta, naŋ i madiɗaŋ, a juwa ɓi le a mevele na, sey a ga cummo.

⁶N'anta pula mbur misi moˀore ar siifa ta, amma a ga kiita mijeŋŋe da mizli muguzuvuraˀahaya.

⁷A ro hiri taˀ ar mizli mijeŋŋeheye. Tˀada ati buy madiɗahay ar janga taŋ ngi buyoy, naŋ mucufa taŋ anga ngi wãˀ na kwa? Amma buyoy ara huhumom di vu.

⁸Da ki pura taŋ le, taŋ ar dangay, kulnjoˀ kulnjoˀ ti celelu, da a cam le ar bonoy mukuy ta na,

⁹naɓa Buymisemuŋ a wuɗ le, ɓa a njika taŋ slra taŋ migaka, waɗ slikiɗa ɓi taŋ, ti taŋ magaka vu taŋ kaɓa bugawlahay na.

¹⁰A wuna taŋ slimiɗ, ɓa a cinaka ɓi naŋ miɓa taŋ di ɗaˀ ɗaˀ le zleˀe na, yo naŋ miɓa taŋ, ɓa a pulaka gwat ngi gi taŋ mibiyãˀ biyãˀ na.

¹¹Da ara cinam, yo ara hinam hirnga a mbuŋ naŋ Buymisemuŋ na, hin ngi siifa taŋ a sa kiɗ mi ar wuya, yo vi taŋ a sa kiɗ mi tir ndum.

¹²Amma da t'anta cinam ta na, a sa zizaka taŋ ti cik ti ziwiti, yo a sa micam, asi a slaka wala ngi ɓi ta.

¹³Mizli misi moˀorehey muroko hirnga gidaŋ ti mevel fõh fõh na, da Buymisemuŋ ara juwa taŋ na, t'anta tumbulokoŋ ta.

¹⁴A micam daf ar gawla taŋ kuy kuy aruŋ, yo siifa taŋ a kiɗ mi a wuzla ngwas sulomehey.

¹⁵Amma Buymisemuŋ a laha mbur misi murga ti murga naŋ tehhe a muŋ, yo a gaŋ bonoy ɓa ngi kaŋ mumuyuŋ zay sla a slimiɗe.

¹⁶Ka kwana Jop, Buymisemuŋ a loho ka le zleˀe tir bonoyo, ng'ar li pula vu, ko gi ngaˀa neˀ anta, yo gwat ngi zum mundumoy taˀ taˀ saɓalak a mbuŋ ɗike.

¹⁷Dambalaka kiita a juw le ngbaŋ, yo kiita mujuw vuna, naŋ anta mbiɗi ta.

¹⁸Anja ji mevel a ci ti ka ng'ar slikiɗa ɓi ta so! Ki wa na, ki mbiɗa hirnga ɗike gu ti gwat ngi lum ɗike kwa? Anja wuluk nah, a guw gilaw ta!

¹⁹Zlili ɗik ati ɓiri tapasl tapasl ɗik vuna, a mbiɗa hirnga ɗike pulaˀ gu kwa? Ko jom ti gwat ngi lum ngi gidaŋ ɗik na gar kwana, anta mbiɗa pulaˀ ta.

²⁰Duvuɗ misi masa pura, ara ɓulaka mizli tisi ruwuyo na, ki njih hiri aseˀe ta.

²¹Wi vu, anja ki mbiɗi hiri ng'ar gi malambaˀ ta, asi ka mahiyĩ na i nah, ku pura kaɓa naŋ zuwen ar bonoyo.

²²Pura, Buymisemuŋ i madidiɗa, naŋ ti gidaŋ haɗa, mbur madubun gwat da mbur, mifineˀ naŋ ada kwa?

²³Mbur majiɗa gwat ngi gi naŋ gu ada kwa? Mbur matum vu ngi ɓaŋ: «Ki gi malambaˀ le» na, ada kwa?

²⁴Ki puyuk hirnga ngi hunumaŋ asi slra naŋ miga taŋ na ta, mizli mahunumakaŋ ti dimis na asi slra tayna vuna.

²⁵Mbur titira gar na, a ro hiri taˀ avu gwat naŋ miga na, ko tir kileŋ kwana, mbur gar ara singila.

²⁶Buymisemuŋ naŋ madiɗaŋ, amma ndr'anta slaka wala nah ta. Mbur maslufa vi naŋ gu anta.

²⁷A hila wulngara ng'ava a muŋ, a tiri di mulbuɗ, ɓa a go di vuŋ.

²⁸Gazlavay mapulo di a go guyoh guyoh na, i vuŋ nah vuna, a zliɗ nga hirnga mizli keɗeɗe.

²⁹Gazlavay mapusuk a muŋ, yo vuŋ mandisl a muŋ na, masla wala nah gu i waka?

³⁰Pura, Buymisemuŋ a pusuka wucuɗ naŋ ngi vuŋ, a wucuɗ gun hirnga naŋ, yo i naŋ masirta jileŋ ngi mubuliye ngbulum.

³¹Naŋ maga kiita da mizli na, ti gazlavay vuna, yo naŋ mavula gwat ngi zum da mizli, hã a mbam pecek na, ti gazlavay nah vuna.

³²Haŋhay turɓus ar wucuɗ ngi vuŋ, a pulaŋ jiviɗ ng'ar li naŋ mara pi sara.

³³Mabigaŋ ara sawa na, i ndisl ngi vuŋ vuna, ko ginewey kwana, zliv a bigaka ara sawa.