Read South Giziga JOB 37 Bible Online

JOB 37 - South Giziga bible

JOB 37

¹Vurˀe, mevel ɗu aro gbeŋ gbeŋ, yo wiɗik wiɗik kaɓa a wuɗ a bawa.

²Cinaka ɗi, cinaka ˀay ngi Buymisemuŋ majijika li, ˀay naŋ mabuc ɓar ɓar na.

³A hiziga wucuɗ asi gazlavay ɓaˀ li, wucuɗ naŋ a ndil sesẽŋ angi hirwuy mira kiɗo mi.

⁴A dirba nah, tuwuy naŋ a cin, naŋ buyo, ara buc ɓar ɓar, ˀay naŋ micin le cin si na, wucuɗ naŋ anta tiˀ teˀ le mata.

⁵Buymisemuŋ mira buc ti gidaŋ na, cekenehey a gam, a gi di gwat madiɗahay, ndra masinaka wala taŋ ta.

⁶Maɓa yam mapo buk buko: «Pi nga ruwuy» na, i naŋ, a go vuŋ malasar, a pi fuyoh fuyoh, dar a zuɓ mekepel.

⁷Akẽh na, mizli a gam gwat gu mata, ɓa mizli naŋ miga taŋ na, a sinaka slra naŋ miga.

⁸Gwat misãmi a ci ng'ar butum naŋ, a hin tup ar kuɓuŋ naŋ.

⁹Burkataŋ a so kini ti ruwuy, yo kini ti muŋ kwana, i himiɗ miyaɓyaɓa.

¹⁰Buymisemuŋ a mumusuwun le fir na, yam a gi, yo hirnga ngi yam a tiri gidaŋ kaɓa ɓiri.

¹¹Akẽh na, Buymisemuŋ a ga gazlavaya hiliw hiliw, a zliɗa hirnga ngi gazlavaya ti wucuɗ pilngiɗ pilngiɗ.

¹²Magun ti gazlavaya sikiki ti ka ti ka na, i naŋ, ɓa gazlavay a ga gwatay, naŋ muvulaŋ jiviɗ nah le ngi gi ar duniya kurzluˀ gara, kaɓa naŋ mutoho ɓi naŋ.

¹³Buymisemuŋ a slin di i gazlavay, ɓa ngi kuta hirwuyo, ɓa ngi tislaŋ, malla ngi ga mezle da mizli.

¹⁴Jop, jika slimiɗe, ɓa ki cine ɓi hana gar, cici deŋ, yo pura cekene Buymisemuŋ maga taŋ na.

¹⁵Buymisemuŋ maru ti gazlavaya sikikiki na, ki si na le kwa? Naŋ maga ɓa gazlavay a wucuɗ na, ki si na le kwa?

¹⁶Gazlavay maru law a dadala muŋ na, ki si na wala nah le kwa? Ɓa ngi gi gwat ngi zuma hirnga hana na, sey ti sin migisiŋ gisiŋ naŋ takwa?

¹⁷Himiɗ miwik wik vay ngi ruwuyo, da naŋ mira kiɗa vu tay tay da mizli na, ka misi ti zana na, ki ro lihiriɓ yororo.

¹⁸Ti Buymisemuŋ miciya birngiŋ, yo naŋ miga birngiŋ gidaŋ kaɓa dorogal ngi ɓiri na, ki jinaŋ le kwa?

¹⁹Mingiɓi zliv, ndra masa ɓaka da Buymisemuŋ gu na, inga bigiy di! -Amma ndr'anta lumam mingiɓi gu ta, asi ndra ar luvuŋ.

²⁰Da yi ra ɓi na, sey i ɓaŋ ɗaˀ le, i wuɗ i ɓi kwa? Sey ngi faŋ ɓi nah feˀ le, ɓa a si na sin le kwa?

²¹Gurjik si na, ndr'anta puram li minjahha mata, gazlavay a sirita li minjahha le sirit, akẽh, himiɗ a gawa, a kil ti gazlavay tuwa kwatak.

²²Li minjahha, gingiliw gingiliw ka ɓiri tapasl tapasl, a go tir vay muŋ, Li mawucuɗ magi zluwun, gun hirnga ngi Buymisemuŋ.

²³I Misi Gidaŋ wãˀ, ndra mandilakaŋ gu ta na, i madiɗa muwãˀ ar ɓi ngi gidaŋ waɗ ar ɓi ngi jeŋŋe, mbur magi jeŋŋe haɗa na, naŋ anta guzuvuraŋ ta.

²⁴Mizli mazluwunam di na vurˀe, amma mizli mawaka vu taŋ kaɓa taŋ ti sinmijileŋ na, naŋ anta ki slimiɗ ar taŋ ta.