Read South Giziga JOB 38 Bible Online

JOB 38 - South Giziga bible

JOB 38

¹Bumbulvuŋ a mbiɗa mingiɓi da Jopo ti wuzla burkataŋ, a ɓaŋ na:

²Gwat muɗum ngi gi, ya mujuwa ɓi nah le na, magi di bimbiɗ bimbiɗ ti mingiɓi mukoloŋ koloŋ lambaˀ na, ki waka?

³Juw vu, gi zil zil: y'ani cufuɗuw, ɓa ki mbiɗiy di.

⁴Ti ya miga hirwuy na, naɓa ka zleˀe amaka? Ka maga vu ɗik ka misina ɓi mikaslsla na, mbiɗiy di so.

⁵Miwa hirwuyo weˀ weˀe, i mana na, ki si na buy naŋ le kwa? Yo miɗiɗaŋ zeweɗ ngi wi naŋ vuna i waka?

⁶Ɓamtalay mijahaka hirwuy jah jah vuna, taŋ kaˀ kaˀ ar mike? Yo ɗugur ngi jaha mivay naŋhaya, minga taŋ i waka?

⁷Naɓa ti nah na, bangay ngi wuna liheye, ara waka ˀay ngi dimise ngirzliŋŋe, yo modro ngi Buymisemuŋhoyo, ara jam salalay.

⁸Ti mubuliy maɓulawa nay nay, mabo tir miviɗiviɗi naŋ a ruwuy na, migica miviŋ naŋ i waka?

⁹I ya vuna takwa! Joˀ i kaŋ gazlavay ɓaˀ avu vu ka zana, yo i mbizaŋ mbizeˀ mbizeˀ ti gazlavay miɗak ɗak arleˀe.

¹⁰I tikaŋ ɓa a kil ta, i slaŋ maakwaya, ti gica mizlingre naŋhaya kiɗasl kiɗasl.

¹¹Dar yi ɓa mubuliye: «Ndilo weˀ aka tewle, ki tuwuɗ kileŋ ta, diɓel ɗik mazuɓ fuyõh fuyõh na, a kiɗ mi aka si.»

¹²Angi siifa ɗike, li mawuno, ki ɓaŋ ɗaˀ ɓa a wun na, ki ɓaŋ le ɗaˀ kwa? Yo li mibiŋbiŋ na, ki bigaŋ li ngi slra naŋ le ɗaˀ,

¹³ɓa a ja hirwuyo avu mi naŋhay, a hira misi moˀoreheye avra na, ki ɓaŋ le ɗaˀ kwa?

¹⁴Ti li mira wun njahha na, a ga hirwuyo cihhe kaɓa magayak muzluma le, ngweɗe jireˀ jireˀ ava kaɓa magaka wuya da zana ngi muguzlum.

¹⁵Amma misi moˀoreheye, a puraka na, li minjahha taŋ anta mata, asi ara tika taŋ ngi zuɓa haŋ ɓa a gam di malambaˀa.

¹⁶Ki ndil le ɗaˀ ar miviɗiviɗi ngi mubuliye kwa? Ki ru digi le ɗaˀ ar mijileŋ ngi hur mubuliye kwa?

¹⁷Mizlingre ngi mucoyo, a bugukuw taŋ le ɗaˀ kwa? Mizlingre ngi li ngi mizli mumucahaya, ki pura taŋ le ɗaˀ kwa?

¹⁸Ki wuluk le ɗaˀ ar firndiw ngi duniya kwa? Da ki si na wala nah le gar na, ɓiy di so.

¹⁹Li hin ngi li minjahha, naŋ tir vay wanaka? Yo luvuŋ a hin amaka?

²⁰Ɓa ki ra tuɓo taŋ diga a mizlingre taŋ, yo ɓa ki si na jiviɗ ngi ndil ngi hay taŋ wãˀa.

²¹Ko mbri, ki si na le, asi a yukuw le zleˀe si, yo ki pura pasa le, diga zlezle!

²²Slaslalay mapo buk buk na, ki ndil le ɗaˀ ar li naŋ misi ara kwa? Yo li ngi yam misi ara na, ki pura le ɗaˀ kwa?

²³I wi taŋ vu le weˀ vur hin ngi bonoy, yo vur hin ngi kiɗa vu waɗ vur hin ngi vurum.

²⁴Li minjahha mago li ciɗak ciɗak na, a bo baɗ amaka? Himiɗ ngi si pas ngi miprik magi tisl li na, a bo ti damaka?

²⁵Muwuna mifiliw da vuŋ a muŋ, i waka? Yo mupula jiviɗ baŋ da vuŋ a wucuɗ, yo ɓa a ndisl na, i waka?

²⁶Ɓa vuŋ a gi ar li, manja mizli ara, yo a wuzlaɓuh, manja mbur loŋ a diga,

²⁷ɓa yam a zuɓ paɗ paɗ ar li muˀulo le, midaŋ daŋ kine, ɓa giziŋ a pus, a gil.

²⁸Vuŋ vuna, cine ada kwa? Miya wulngar i waka?

²⁹Slaslalay a bo ti kwacay waka? Yam mahindirik ka yam a muŋ na, miyi naŋ i waka?

³⁰Akẽh na, yam mihindr'ik le na, a tiri gidaŋ ka ɗugur, yo hirnga ngi yam mijileŋ, a ji ngbok ar li purla.

³¹Wurzlaŋ miɗiɗa slahay na, ki juwa taŋ ti zeweɗ gu kwa? Malla ki kusluro zeweɗ ngi wurzlaŋ mipi hiriheye gu kwa?

³²Wurzlaŋhaya, ki bo taŋ angi pas taŋ kaslsla gu kwa? Ki bo ti dungusoyo gu kwa?

³³Ki si na ɓimujuwa ngi muŋ le kwa? Maga ɓa a sipaka ɓi naŋ a ruwuyo, i ka kwa?

³⁴Kˀada til mi ng'avi gazlavay, ɓa mekepel a zuɓo paɗ paɗ, sirit hirnga ɗike kwa?

³⁵Wucuɗ ngi vuŋ mipilngiɗ pilngiɗ macuh na, maslinaŋ i ka kwa? Tˀada ɓukuw: «Ndrˀani aka» kwa?

³⁶Muvula sinmijileŋ da membesembese, waɗ lesl da bokoy i waka?

³⁷Mindila slufa gazlavay i waka? Yo mabudugo yam ngi muŋ kaɓa tir kukulum,

³⁸ɓa yam a tiri ti murɓuko liɗiɗiɗi ka ndileɓ, yo ɓa hirwuy a gi tokoro gweje gweje, mindila i waka?

³⁹Macikiɗa useˀ da madiya mobor i ka kwa? Makiɗa may ngi ziri moboroy i ka kwa?

⁴⁰Da ko a roko huruk huruk ar butum taŋ, malla da a roko ɗum ɗum asi kalafaya, makiɗa taŋ may i ka kwa?

⁴¹Da ziri ngi magahgakay ara tuwam ng'avu Buymisemuŋ, asi may ara ja taŋ, a roko gababak gababak na, mavula taŋ gwat ngi zum i waka?