Read South Giziga JOB 39 Bible Online

JOB 39 - South Giziga bible

JOB 39

¹Madiya ˀaw muwãhay mayam na, ki si na pas nah le kwa? Ki pur muunihey le ɗaˀ ar li yi kwa?

²Taŋ magam ti ziri taŋhay a kwacaya, kiya kite ka na, ki slufa le ɗaˀ kwa? Yo a yam hirak ti hin wanaka na, ki si na le kwa?

³Da muuni ara wuɗ a yi na, a guɓo virzi zinih nga ruwuy, zinga a bawa, akẽh, kwacay majaŋ na, a kiɗ mi le.

⁴Ziri taŋhay a mburom, a gilam ar himiɗe, a wunkam ati mumuŋ taŋhaya, ko t'anta moko ng'avi taŋ mata.

⁵Mupula zungu ngi ɓuh manja juw kaˀ i waka? Mupulaŋ mbak ti mi i waka?

⁶Zungu ngi ɓuh, i vulaŋ li papala le ar deɗe ngi hay naŋ, li melemeɗe, i li naŋ mandir ara.

⁷Mi muwuwwo ngir walahay na, ko a ca zungu ngi ɓuh ta, naŋ anta cin buc ngi mbur muɓul naŋ ani ta.

⁸Aru ti zum taˀ dibiɗ a muwãhaya gwaɗ naŋ, aru ti sipi gwat tukuzo wanaka gar ngi zumo.

⁹Sla mbana a ngum ngi guw slra kwa? A hin ar gezleŋ ɗike kwa?

¹⁰Ki ka galalaŋ da sla mbana, ɓa ki huf di gu kwa? A ɗiɗuw gwat ngi siɗila li ɓaˀ asi ka kwa?

¹¹Ki sa pulaŋ mevel ɗike mbak na, vur naŋ migidaŋ haɗa na kwa? Malla kisa pulaŋ gwat ngi lihiriɓ ɗike mbak kwa?

¹²Zliv kisa njih hiri aseˀe, ɓa a suw ti gwat ngi migamay ngi haya, yo ɓa a cikiluw di a milaŋ kwa?

¹³Maduuli makiɗa kirpasl ti mumul na, naŋ ti kirpasl ati zlara ngi slikiɗ, kaɓa ngi membesembese ngbaŋ takwa?

¹⁴Amma da naŋ mika tesle le a ruwuy, a pula taŋ ɓa a jam ar murɓuko na,

¹⁵zliv a sa kirpaka tesl naŋ na asi sar, malla gwat misãmi ngi ɓuh a sa waha asi sar kwa mbrike na, naŋ anta wulka hana ta.

¹⁶Maduuli naŋ tuwaˀ haɗa avu ziri naŋhaya, naŋ kaɓa i mumuŋ taŋ ta. Naŋ migi bonoy vur taŋ na, i slra ngatara na, ko naŋ anta lika ta.

¹⁷Asi Buymisemuŋ a vulaŋ sinmijileŋ ta, yo a vulaŋ lesle ta.

¹⁸Amma da naŋ mibi le ngi kil na, a pula pilis ati mizli ngir naŋ a dirba ka ɓi ngi sefel.

¹⁹Mavula gidaŋ da pilise, i ka kwa? Mapusaŋ megebece asi aya, i ka kwa?

²⁰Maga ɓa a jiɗ caŋ caŋ ka jaray na, i ka kwa? Tuwuy naŋ ngi wuya na, a gi zluwun da mburu.

²¹A zluzluɓ ti naŋ mambuzla li hurot hurot ti gidaŋ ar sozo, a mul cuɗiɗiɗi nga mbuŋ mesene migi vurumoyo.

²²Zluwun a caŋ naŋ neˀ ta, didak anta muɗaŋ ta, anta mi murdirba vur maslalama ta.

²³Luvut a hurum konjor konjor ar gulum a duba naŋ, ziwit a wucuɗ plik plik waɗ maslalam.

²⁴A ɓusa hiipasa gu ta, a jiɗ bir. Da a faka tulumo le kãh si na, naŋ anta tika vu naŋ gu mata.

²⁵Naŋ micina, taŋ mifaka tulumo le kãh gar na, a hiziga tuwuy! Ko da vurumo naŋ kileŋ kwana, a cine zĩˀĩ naŋ, buy ngi sojehey mabucam ati widi ngi vurumo, a cine kwaŋ kwaŋ.

²⁶Zlam mapuso zlara nawaya, yo naŋ mabinjira zlara binjarra kini tir vay ruwuy na, muvulaŋ lesl nah i ka kwa?

²⁷Kurom maslikiɗ nga muŋ, yo a ɗiya haya kileŋ a muŋ na, mavulaŋ jiviɗ i ka kwa?

²⁸A hin a hirnga muwã, yo a ndir ar mesengel, misi mbur a ndil ng'ara ti tuwaˀa.

²⁹A jiɗo gwat ngi zum naŋ zle a diga, hiri naŋ a puro di kweŋ kweŋ zle kileŋ.

³⁰Ziri naŋhay a sam pumbusu, li misi maara ara na, naɓa naŋ da a diga.