Read South Giziga JOB 4 Bible Online

JOB 4 - South Giziga bible

JOB 4

¹Akẽh na, Elifas mbur Temaŋ a zla a ɓa Jopo:

²A cukuw ar bonoyo sar purla si na, ki hĩhĩy si! Na, i cifi teˀ ti mingiɓi ɗo, manja i ɓuw na, a gi kwa?

³Ki ɓi mi ngi kutihey le haɗi da mizli zleˀe, ki vula gidaŋ le da mizli migiram le kupuyah kupuyah.

⁴Mizli mindilam ti sar muba taŋ le na, ki slikiɗa taŋ le ti mingiɓi ɗike, popurok muluɓuw luɓuwoyo, ki cica taŋ le ɓoɓurok ɓoɓurok.

⁵Ani wurenna, hiryi a lumuw le ya so na, joˀ ki hĩhĩy, yo a ndiluw le ya so na, ki zluwun haɗa.

⁶Zluwun ɗik ti Buymisemuŋ na, majuhuw jah i naŋ ta kwa? Gwat ngi gi ɗik mezle na, njaha hiri ɗik njah i nah ta kwa?

⁷Wuluk keŋ kwaɗay: mbur mici ar ɓi ta, a zizi le na, ki pur le ɗaˀ kwa? Malla mizli misi mevel mezleheye, bonoy a kiɗa taŋ le na, ki pur le ɗaˀ kwa?

⁸Ya misin nga ya, ani: mbur magi slra malambaˀ, yo mayi bonoy cak cak da mizli na, malumaka migir nah i taŋ vuna a muŋ.

⁹Buymisemuŋ muˀufo himiɗ ngi balam naŋ le fir na, a zizam kap, da naŋ mugo himiɗ ngi hutuŋ naŋ le fir na, a zlumam zlam zlam hetet.

¹⁰Tuwuy taŋ misi kaɓa ngi mobor, yo kaɓa ngi dirlenge na, a taˀa taŋ di lek, yo sliŋ taŋ misi kaɓa ngi ziri moboroy na, a ngila taŋ ndi le avra.

¹¹Da kokoyta a lum gwat ngi zumo ta na, a mucu, ziri moboroyo, da a lumam gwat ngi zumo ta na, a zliɗam hirnga.

¹²Mingiɓi a so kaɓa yaŋ ti yaŋ a hirnga ɗu, sisikaˀay a ci le kwaŋ a slimiɗ ɗu.

¹³Ɓi hana a gi hirak ar musuwun ngi duvuɗ, lesl ngi mizli mizliɗ le, yo ti hinje mija mizli le.

¹⁴Gurjik si na, zluwun a jijikiy kir kir, hã a jijikiy ti tesl ɗuwoyo gar.

¹⁵Himiɗ a so fiɗek fiɗek a mihiri ɗu, a slikiɗiy ngwice njivivivi.

¹⁶Keɗ na, mbur deŋ, i sinaŋ ta. Musuɗuk ngi gwat deŋ a mihiri ɗu. N'ada teˀ teˀ soˀorro, a dirba nah, i cin, a ɓi:

¹⁷«Mbur titira, naŋ jeŋŋe fineˀ Buymisemuŋ kwa? Mburo, naŋ manja dili fineˀ migi naŋ kwa?

¹⁸Pura ɗi: Buymisemuŋ anta pula mevele mbak da gawla naŋhaya ta, ko a wuzla modro naŋhay kwana, ara mbiɗa taŋ hirnga, asi zluɓa ɓi taŋ.

¹⁹Sokkota mizli, naŋ miga taŋ ti hohoy, yo taŋ muboko ti vu murɓuk na jak makwa? A njirslaka taŋ kaɓa mececeɓ a hirnga.

²⁰Zle ti miprik hã pastaˀ na, i mumusukuɗohoy le tur. Anta jam lesl kaw le vur taŋ ta, a sa zizam kap ngi wãˀ.

²¹Zeweɗ ngi guɗuk taŋhay, i mumburcahay le takwa? A sa micam, asi t'anta ti sinmijileŋ ta.»