Read South Giziga JOB 40 Bible Online

JOB 40 - South Giziga bible

JOB 40

¹Bumbulvuŋ a sla mingiɓi, a ɓa Jopo na:

²Ka mbur mambiɗiy hirnga da ya Misi Gidaŋ wãˀa, ki tum vu ngi dirɗiy gu kwa? Ka mangiliy mi da ya Buymisemuŋ na, ki mbiɗiy mi gu sukwani?

³Dar Jop a mbiɗa da Bumbulvuŋ so:

⁴Yi mbur kesefe, y'anta ti mingiɓi ta. I ɓi ta si.

⁵I ɓi le ɗaˀ sar purla zleˀe si, amma y'anta sa ɓi mata, yo i ɓi le ngi mucuw naŋ ma, amma y'anta sa ɓi ng'ara mata.

⁶Bumbulvuŋ a mbuɗo di da Jopo tir burkataŋ, a ɓaŋ na:

⁷Juw vu so, gi zil zil. I wuɗ i cufuɗuw, yo ka, kisa mbiɗiy di.

⁸K'anta wuɗ tiɓa kiita ɗu, ya misla na ta gisiŋ kwa? Ka mapo kiita ng'ar ya na, ɓa ki ɓi ka jeŋŋe sukwa?

⁹Kˀada ti gidaŋ kaɓa ya Buymisemuŋ kwa? ˀAy ɗik ada cin ka buc nga ya Buymisemuŋ kwa?

¹⁰Da kine na, ɗiya vu ɗike ɗiyeˀ ɗiyeˀ, ɗiya vu ngi mbur mududok, waɗ ɗiya vu ngi buy, wucuɗ ati li minjahha, ka taŋ ɓaˀ ɓaˀ avu vu kaɓa zana!

¹¹Vunaha himaˀ ɗik mihaɗa na, mizli muhuhumo vuhoyo, mi taŋ kap a ruwuy kutum.

¹²Pura mizli tayna muwuɗa dudokoy na, ɓa a hurukom a ruwuy, njirsla misi moˀoreheye daˀ arleˀe.

¹³Dika taŋ suɓulak a ruwuy, taˀa taŋ mi siriw ti dangay ngi mucu.

¹⁴Dar ya vuna, i sa hunumuw, asi gidaŋ ɗik a lumuw bugawla le.

¹⁵Pura dal na ɗi, ya migaŋ na, kaɓa ya muguw na ya. A zum giziŋ kaɓa sla.

¹⁶Pura ngbalalaŋ naŋ, naŋ ti gidaŋ haɗi, yo useˀ ngi vi kwacay naŋ kutiɗak!

¹⁷A mbura dangwala le na, kaɓa dum ngi miter, tuwal naŋ, dimbasl gijaw gijaw ava.

¹⁸Tesl naŋhaya, kaɓa tuyo ngi ɓiri gaza, cakayaya, kaɓa ɓiri muvuɗa ti vuɗu.

¹⁹A wuzla gwatay, ya Buymisemuŋ miga taŋ gar na, buy taŋ i naŋ, amma magucoŋ mi gu na, sey i ya migi naŋ vuna pal ɗu.

²⁰Muwãhay ara pusakaŋ giziŋ ɓa a zum, yo gwat misãmi ngi ɓuhoyo, ara gam dungur a cikeˀe.

²¹A hin asi hilviɗey, asi lavaɗ misirit hirnga yam na, yo ar futuŋhoy.

²²Hilviɗey ara gakaŋ susuɗuku, yo widis mekelemey a mi mizawa gunno hirnga naŋ. Widis mekelemey [2] ada gunno a hirnga nah.

²³Da mizaw a ngil le kwana, anta gaŋ ngaˀa neˀ le ta. Ko da mizaw a zuɓ, yam ara ci nga balam naŋ kwana, naŋ da lek leke.

²⁴Da a hinje ta na, maja gu i waka? Ma slinaŋ hutuŋ, ɓa a caŋ dum avu hutuŋ gu i wakwa?

²⁵Ki ja ngoŋngoŋ madiɗa vuna gu ti kunayele kwa? kunayel ɗik vuna a slinaŋ irne gu kwa?

²⁶Ki caŋ lavaɗ avu hutuŋ gu kwa? ki slinaŋ balama ti ɓiri muhurtokko gu kwa?

²⁷Ki wa na, naŋ da sa hurdum ngi tumbuluw kwa? ada sa ɓuw ti ˀay mezle kwa?

²⁸N'ada sa jum ˀay ati ka ngi hin neˀ, ɓa kisa gi di beke, hã ngi set kwa?

²⁹Ki sa gi di dungur kaɓa magam ti ɗiyuwo kwa? Ki sa juwaŋ kaˀ kaˀ ɓa ziri ɗik mongosohoy a gam di dungur kwa?

³⁰Miji kilifey a sa jumom arleˀe, ɓa a hiɗikaka ngoŋngoŋ vuna avra kwa? Migi tererehey mbeˀ mbeˀ a sa wuɗkaka ar wala taŋ kwa?

³¹Ki sa slinaŋ garak ngi vu naŋ njororo ti luvut kwa? yo kisa slinaŋ hirnga gor njoŋ ti suwar kwa?

³²Buca haŋ ɗike bac ar naŋ so, wuluk ar kiɗa vu, ko k'anta sa mahiri ngi kiɗa vu mata!