Read South Giziga JOB 41 Bible Online

JOB 41 - South Giziga bible

JOB 41

¹Ji lesle, da mbur ara njih hiri njah, a kiɗa ngoŋngoŋ gu na, i ngataraŋ, asi mike na, da mbur mupuraŋ le sliɗ si na, a diɗ biɗisl a ruwuy.

²Ko mbur gambara ngi zlaŋ gu anta. Na zle masa tum vu ngi gi virnjik avu ya gu i waka?

³I didiɗ duvus avu wa, ɓa i maŋ di a muŋ ka? Gwat ngi si gazlavay gar na, inga ya!

⁴Ngoŋngoŋ, i sa ɓi vur hirgisl naŋhay na ɓula, yo vur gidaŋ naŋ mihaɗa waɗ vur kuy ngi deŋ naŋ na gar ma.

⁵Muputuwaŋ zana tumbuŋ ɓa a cukoŋ di i waka? mici ɗaˀ ar wala ngi kwala naŋhay na i waka?

⁶Mitikaŋ ˀay ɗaˀ, ɓa a wuna mi i waka? Sliŋ naŋ mungoryoŋ ngoryoŋ na, ciki naŋ gun a gi zluwun da mburu!

⁷A gi njoroˀ njoroˀ, asi duba naŋ migidaŋ kaɓa mbaray na! Duba naŋ tayna tiɗeˀ tiɗeˀ, slak slak arleˀe!

⁸A duba cala a duba cala, ko li feŋ ɓa himiɗ a ci anta.

⁹Taŋ sliraɓ sliraɓ ar cala ar cala, ngbaˀ ngbaˀ arleˀe, a wuɗkam gu mata.

¹⁰Da ngoŋngoŋ migi gwal le geˀ na, li a pusluɗ ciɗak ciɗak, hiri naŋhaya twis twis ka gwat asi mbulum.

¹¹Vu a bo njilim njilim ti balam naŋ, vu a ndislo ti raˀa jiriy jiriy.

¹²Cunju a bo ti hutuŋ sẽwwe, kaɓa cunju mabo tir misirgaɗ malla mejejeŋ mitaˀ ar vu.

¹³Musuwun ngi balam naŋ a lugo ivire, irne vu njilim njilim a bo ti balama.

¹⁴Gidaŋ naŋ, naŋ avu ˀay, mbur gar a kil di.

¹⁵Useˀ ngi vu naŋ a ki tirla ɓaˀ ɓaˀ, a tiri kitingbiriŋ, a wus ta wãˀ.

¹⁶Didaka kpasl kpasl ka ɗugur, kpasl kpasl kaɓa madiya ngurvuŋ.

¹⁷Da naŋ mislikiɗ le conjuroŋ na, ko kulihey a zluwunam, a jijikam, a waham kpah.

¹⁸Ko a ngumaka le ti maslalam kwana, anta ci ava ta. Ko a zligaka le ti ziwit, ti suwar malla ko ti luvuto, anta ci ta.

¹⁹A pura ɓiri ka giziŋ muˀuloŋ, yo ɓiri gaza ka dum mohoɗohoɗo.

²⁰N'anta kil ti luvuto ta, ɗugur ngi ŋvehŋvehlu, a pura ava ka giziŋ.

²¹A pura solomo ka giziŋ misirleŋŋe, a singir ar suwar mahurmo ng'ar naŋ.

²²Gwatay yoŋ yoŋ avu kwacaya, baraf naŋ ar ndileɓe juroˀo, kaɓa ngi gwat ngi siɗila li ar guva.

²³Da naŋ mici le ar yama na, yam a vuruɗ kaɓa ar mejejeŋ mitaˀ ar vu, a tiri ti mubuliye, kaɓa urdi mawur ar magayak.

²⁴Naŋ mucuh le na, baraf naŋ njahha, yam mijileŋ, a pur tullo kaɓa hol.

²⁵Mbur miwi naŋ asi ruwuy anta. Yi gaŋ, ɓa naŋ anta zluwun ko neˀ ta.

²⁶A pa hirnga le da mesene naŋ madiɗahaya gar, i buy madiɗa ngi gwat miji vu ngi ɓuhoy gar.