Read South Giziga JOB 42 Bible Online

JOB 42 - South Giziga bible

JOB 42

¹Akẽh na, Jop a mbiɗa da Bumbulvuŋ, a ɓaŋ:

²Yi si na le, gwat gar, ki ga gu, gwat ka mujuwa le ngi gi gar na, ɓa ki si na ta na, anta.

³Ki ɓa le: «Gwat ka mujuwa ngi gihey gar, mbur maburɗa taŋ, manja a sin gwat neˀ le ara na, i waka?» Haˀaw! I ɓi ɓi mutuwaˀ le haɗa tir manja sin naŋ, ɓi mufuna wuluk ngi mbur, mifiniy gidaŋ le.

⁴Ka ki ɓiy na: «Cin, puliy ɓa i ɓi, i wuɗ i cufuɗuw, ɓa ka ki mbiɗiy di.»

⁵I sinuw zleˀe na, asi ya macin ti cin maɓaka ɓi ɗike, ani wurenna, i ra puruw ti hiri ɗu muduba.

⁶Vurˀe, mesem ara giy ti vu ɗu vuna, i ra zil marava ar ɓi ya miɓa zleˀe na, y'ani burfuk burfuk ar murɓuk waɗ ar fucu. BUMBULVUŊ MIƊIYA JOP AMUŊ

⁷A dirba Bumbulvuŋ mikiɗa mi ngi ɓi naŋ ati Jop na, a ɓa Elifas mbur Temaŋ tuwa: «Mevel ɗu ara tiɓi ka vu ar ka, waɗ ar ngama ɗikey mucuw na, asi ki ɓaka ɓi ɗu kaslsla kaɓa gawla ɗu Jop na ta.

⁸Wurenna, jam gusoŋ tarnaˀ waɗ zlengerek tarnaˀ, ara lumaka gawla ɗu Jopo, ɓa ki gam taŋ mikuli mizlamzlam vur hirnga kum, yo ɓa Jopo kwana, a sa dir dibiɗ vur kumo. Ya masa gi ti kum weˀe asi gilaw kum na ta na, mbele naŋ. Asi kumo, ki ɓaka ɓi ɗu kaslsla kaɓa gawla ɗu Jop na ta.»

⁹Elifas mbur Temaŋ ati Bildat mbur Suha waɗ Sofar mbur Naˀama, a gaka gwat Bumbulvuŋ miɓa taŋ di ɗaˀ ɗaˀ le tuwa, joˀ Bumbulvuŋ a tiɓa diradibiɗ ngi Jopo.

¹⁰Ti Jop madir dibiɗ vur ngama naŋhay tuwa na, Bumbulvuŋ a ɗiyaŋ a muŋ, a sikaŋ gwat ngi lum naŋhaya, hã makaw cuw cuw.

¹¹Sukum naŋ mizile ati mongosohoy, waɗ mizli misinakaŋ zlezle zleˀe gar na, a soko nga pur naŋ. A zumam ɗaf bummoˀ a hay naŋ. A bigakaŋ wuɗ taŋ mawuɗakaŋ, yo a tislakaŋ mevel vur bonoy Bumbulvuŋ migaŋ di na gar. Dar mbur gar a vulaŋ gwat ngataraŋ, suloy [3] ngi ɓiri bara pal waɗ dangwa ngi ɓiri tapasl tapasl pal.

¹²Bumbulvuŋ a ɗuwula mi da Jop ar siifa naŋ ngi dirba hana, fineˀ ar ngi vi mucohomoyo. Jopo naŋ ti tumuŋ durmuk kuruˀ ngaˀ mufaɗa, zlogomo durmuk merkeɗ, sla ngi hufoy gam durmuk waɗ madiya zunguhoy durmuku.

¹³Yo a yi ziri mizilehey tarnaˀ waɗ mongosohoy makir ma.

¹⁴A ca slimiɗ da zuŋ naŋ mongoso mudumbuŋ Yemima, [4], mijingaˀ naŋ Kesiya, [5], waɗ mimakir taŋ Kereŋ-Hapuk, [6].

¹⁵Bal bal hirwuy kurzluˀ na, ko ziri mongoso mukuy ka ngi Jopoy na anta, yo cine taŋ a vula taŋ zlili, mi nga taŋ, taŋ masa zumaka a dirba naŋ, rak rak ati sukum taŋ mizileheye.

¹⁶A dirba nah, Jop a zik vi skat ti kukur mufaɗa ava ma. A pura ziri naŋhay ati dideˀ naŋhaya, dideˀ ngi popurok ati dideˀ ngi mukuturtukutur waɗ dideˀ misintiwakahaya cek.

¹⁷Dar Jop a muc ti gal, a zum ɗaf le.