Read South Giziga JOB 5 Bible Online

JOB 5 - South Giziga bible

JOB 5

¹Zil vu so, ɓa ki pura mbur masa ziluw mi ada kwa? Ki sa ɓi wa taˀ purla a wuzla modrohoyo ka?

²Haˀaw, makiɗa mbur gilawa i mevel a kwacay, mbur manja lesle, i suloŋ makiɗaŋ a kwacaya.

³Naŋ kanah, mbur gilaw micifi le dar dar na, i pur le, amma i hirsa hay naŋ kutum si, i ɓi:

⁴«Anja ko mbur a kilo widi ngi ziri naŋhaya ta, anja kiita a ja taŋ, ko mbur macik vu a hirnga taŋ anta!

⁵Yo naŋ vuna, gwat ngi sifi naŋ, anja i mbur ngir may mazumaŋ, gar ti naŋ minga zluɓ ngi hadaw gun na kwana, anja a hilakaŋ gwat ngi sifi naŋ, anja mizli muroko ti may ngi zlili, a zumaka gwat naŋhaya!»

⁶Asi hiryi, a bo ti ruwuy ta, yo bonoyo, a puso ti pus ti ruwuy ta.

⁷Haˀaw, a ya ka mburo ngi si bonoy, yo ɓa a slikiɗ nga muŋ kaɓa vu mandisli.

⁸Nga ya na, i ɓa ɓi ɗu da Buymisemuŋ, ɓi nga ya na, i njika da Buymisemuŋ.

⁹Naŋ a gi gwat madiɗahay le, maslaam wala ta, gwat migam ɗaˀ tahay maslufam taˀ.

¹⁰Maga vuŋ ɓaˀ li gar i naŋ, mapulo yam ti muŋ ɓa a ɓul ar guvahay i naŋ,

¹¹ɓa a slikiɗa mizleweye ɗongor, yo ɓa mizli mandurɓom hiri na, a slikiɗam, a laham.

¹²Misi wereye, gwat taŋ majuwaka le ngi gi na, mahiriya i naŋ, yo gwat taŋ muwuɗam gi naŋ le ti haŋ taŋ gar na, ɓa a gaka gu ta.

¹³A ja misi sinmijileŋheye ti kwar ngi wer taŋ na, yo gwat taŋ majuwaka ngi gi ti wer taŋ ngi gi gilaw da mbur na, naŋ a tuwuɗa tuwaɗ.

¹⁴Ti papasa kwana, taŋ a jam hirnga ti luvuŋ timbiɗim, ti wuzla papas kwana, a tutumaka li ti tutum kaɓa ti duvuɗu.

¹⁵Amma Buymisemuŋ a laha mbur misi murga le avu ngum ti maslalam taŋ na, avu sliŋ taŋ waɗ avu zlenek taŋ migidaŋ haɗa na.

¹⁶Mbur hĩhĩy a ro ti njaha hiri, amma a gica mi ngi mbur magi gwat jeŋ ta.

¹⁷Pura ɗi: Mbur Buymisemuŋ makutaŋ ti bonoy na, a mumul! Ka Jop, gwat Buymisemuŋ Misi Gidaŋ wãˀ madubunuw di na, ki hirsa ta.

¹⁸Asi maga bonoy da mbur, yo maɗiyaŋ kwana, i naŋ ma, da a ga waˀa le da mburo na, i naŋ makufaŋ di a muŋ ti haŋ naŋ.

¹⁹Gir mira lumuw is mbeˀ mbeˀ kwana, a lihuw a lihuw, ko gwat maguw neˀ anta.

²⁰Ar hin ngi maya, a sa mbuɗo hirnga ɗik avu muco, yo ar vurumo, a loho ka avu ngum ti maslalama.

²¹A sa jiginuw avu miɓi mi motropohoyo, da mendere ara ndilo na, ko ki zluwun neˀ le ta.

²²Mendere, yo may migi le na, joˀ ki singir ar taŋ gwat ɗiki, yo ki zluwun ti gwat ngi ɓuhoyo ta!

²³Ko ɗugur anta sa bo ar guva ɗike ta, yo ki zluwun ti gwat ngi ɓuhoyo ta.

²⁴Hay ɗik a sa ndir ti zuy, kisa pura gezleŋ ɗike keɗ keɗ na, ko gwat mikic loŋ anta ra ta.

²⁵Ziri ɗikeye, kisa pura taŋ na, a jam haɗi, yo dideˀ ɗikey a sa gilam kaɓa giziŋ asi ruwuy.

²⁶Ki sa ci hirnga kulaˀ a ruwuyo ti gidaŋ ɗike kine, kaɓa mapam daw a mizer ti yam naŋ.

²⁷I dubunaka ɓi nah le jileŋ, n'ani: naŋ kanah. Cinaŋ, yo cir ti seˀe!