Read South Giziga JOB 6 Bible Online

JOB 6 - South Giziga bible

JOB 6

¹Dar Jop a mbiɗa, a ɓi:

²Kay! Anja i wuɗ a waka gir ɗu na weˀ weˀ ti kilo zleˀe, yo anja a ɗuvaka bonoy ɗu na ar kilo zleˀe.

³A sa gi naŋ dudok fineˀ muyuŋ ngir mubuliye. Mingiɓi ɗu mislah slah na, vurˀe.

⁴Asi Buymisemuŋ Misi Gidaŋ wãˀa, a muliy le ti luvut naŋhaya, yo musuwun ɗu ara sa muwuŋ naŋ. Buymisemuŋ a cinjoho zluwunoy le ngi kiɗa vu ati ya.

⁵Da Zungu ngi ɓuh a lum giziŋ miɗiɗi le wureˀ aruŋ na, a tuwuy kwa? Da sla a lum muɗum le na, a tuwuy kwa?

⁶Gwat misisiy sisiye, a zum manja mandaŋ kwa? Babara ngi tesl kucukur manja di na, naŋ ndum kwa?

⁷Y'anta i ja haŋ avu gwat ngi zum tayna ta, mumburlok ɗu a vunoho taŋ avra.

⁸Anja gwat ya macufuɗ na, a gi so. Anja Buymisemuŋ a vuliy gwat ya muɗuva wuluk ɗu taˀ aseˀe na.

⁹Anja Buymisemuŋ vuna, a njirsliy njirasl so, anja a zuɓa haŋ, a kiɗa mi ɗu tay so!

¹⁰Anja i ro mumul ti zluzluɓ ar si bonoy ɗu hana makiɗ mi ta na, yo ɓi ngi tisla mevel ngi dirba muwãˀ ani na, anja i luuma le: Buymisemuŋ mipal na, yi puyuk hirnga ti kiita naŋ na neˀ le ta.

¹¹Gidaŋ ɗu ama ngi njaha hiri aruŋ ka? Kiɗa mi ɗu a sa gi mbri, ɓa hã i hurdum aruŋ, i ndir ti siifa na ka?

¹²Gidaŋ ɗu ngi ɓusa ɓi, i gidaŋ ngi ɗugur kwa? Dum vu ɗu, i dumvu ngi ɓiri gaza kwa?

¹³Ya makutuk kila widi na, i ngatara sukwa? Ko gwat neˀ ngi jini ɗu, anta mata sukwa?

¹⁴Mbur mukupuyah ti bonoy na, jiviɗ ada vur naŋ ɓa mbur ka naŋ a jinaŋ, da kanah ta na, naɓa a sa pula zluwun ti Buymisemuŋ Misi Gidaŋ wãˀa.

¹⁵Sukum ɗuwoy a pulikiy le ɗoɗok kaɓa mizaw mihisik le, kaɓa yam a mizaw, mucuh le kwatak tir jiviɗ naŋ maɓul ti raˀa.

¹⁶Ar kiɗa mi ngi kiya himiɗe, yam muloˀloˀ ati yam mapo bukbuko, da naŋ mira luwusl na, mizaw a zuɓvra vra.

¹⁷Lendeɓ mundulo le muduba na, a hisikam ngbasl ngbasl, pas mazlum cãˀ cãˀ na, a hisikam daˀ ar nah vuna si.

¹⁸Mulakay macohom turɗoŋ turɗoŋ na, a pulaka jiviɗ taŋ, a cam nga wuzlaɓuh, akẽh a zizam wãˀ.

¹⁹Mulak, mizli Temahay macohom turɗoŋ turɗoŋ na, a puraka mizaw tayna hiri lawwa, mizli mitir tir ngi Sabahaya, a njaham hiri asi taŋ.

²⁰Taŋ gar taŋ a pam mesem le, asi taŋ mupulaka vu taŋ mbak na: taŋ mindilam le ar taŋ na, a zuma taŋ hirnga kap.

²¹Wurenna, kum misi avu ya ngama kum na, kum kanah! Kum mupuraka bonoy ɗu keɗ na, ki zluwunam le.

²²Ani i cufuɗukum le ɗaˀ: «vulikiy gwat ngataraŋ, yo vulikiy cah avu zlili kumoyo kwa?

²³Anja ɓa i lih tisi haŋ ngi mesene ɗu, yo ɓa i mbuɗo hirnga ɗu avu mbur misi moˀore.»

²⁴Inga bunikiy ɓi nah, ɓa i taˀa mi ɗu. I zluɓ ɓi le kwa? Inga bigikiy di!

²⁵Ɓi mikaslsla a ji mevel da mbur kwa? Na zle, kum madirɗikiy na, asi ɓi mi ska?

²⁶Ki waka na, kum madirɗikiy na vur mingiɓi ɗu na tewle kwa? Mingiɓi nga ya mbur manja njaha hiri na, i himiɗ makil di ngataraŋ.

²⁷Hã kisa gam ceregezleŋ vur mutuhuhoyo, yo hã kisa hiɗikaka ngama kum avra.

²⁸Yawwa! Inga mbuɗoko hiri ng'avi ya ɗi: i gi slir le a mihiri kum aka kwa?

²⁹Mbuɗoko hiri ng'avi ya so! Ɓi ngi tikina vu anta! I ɓukum sar pal ava, mbuɗoko hiri takwa! Y'ada jeŋŋe ar ɓi hana aruŋ kwaɗay.

³⁰Mi ngi irne ɗu i ngi mbur magi gilaw da mbur kwa? Mi ngi balam ɗu a si na sla wala ngi ɓi ɓi ngi bonoyo takwa?