Read South Giziga JOB 7 Bible Online

JOB 7 - South Giziga bible

JOB 7

¹Cifi ngi mbur titira a ruwuy hana, i cifi ngi bonoy takwa? Yo hin ngi siifa naŋ a cuh kaɓa hin ngi mbur magi slra ngi dala takwa?

²Naŋ kaɓa mbur beke ar pas, mahihina susuɗuku, yo kaɓa mbur magi slra ngi dala, makutuk migir naŋ.

³Yo gwat magi avu ya na kanah ya, ya migi kiya mbeˀ mbeˀ na, mi nga ya i lik tewle, yo migir nga ya i si bonoy ti duvuɗu.

⁴Ya mihin le ti hin aruŋ si na, i ɓi ti kwacay ɗu: «I sa slikiɗ ti vunaka?» Duvuɗ vuna ma na, anta cuh kutum ta, joˀ wuluk a wiy ɓaˀ, hã avu li mawun.

⁵Dum vu ɗu gar i mumuyuŋ waɗ waˀa muˀulo ngboˀ ngboˀ, kuturkuy ngi dumvu ɗu a ndisl ngilɓir ngilɓir, a ɓul lulu.

⁶Siifa ɗu a cuh kutum fineˀ munduɓuk ngi caka, da hin ɗu mindila mi ngi gugumaya le na, a kiɗ mi le ya.

⁷Aw Buymisemuŋ! Wuluk keŋ kwaɗay, siifa ɗu i musuwun fẽh tewle, akẽh na, hiri ɗu anta sa pura cira hiri mata.

⁸Mbur mupuriy le zleˀe na, naŋ anta sa puriy mata. Ki sa sipiy ngi pur, amma i sa so, y'anta mata.

⁹Mbur mapi sar ng'ar li ngi mizli mumucahay, misi naŋ anta sa bo mata na, n'ani: naŋ kaɓa gazlavay masusuyum, a cuh le!

¹⁰Mbur mucuh le kahana na, naŋ anta sa mo ngi hay naŋ mata. mizli ngi hay naŋhaya, t'anta sa sinakaŋ mata.

¹¹Vurˀe, y'anta sa taˀa mi ɗu ta, ar ya mamusuwun nga muŋ nga muŋ kwana, i sa ɓi na si, ko da mevel a hiryi le kwana, i sa kuɗuma tuwuyo na si.

¹²Yi mubuliy kwa? Yi ngoŋngoŋ [1] ngi si yam kwa? Ɓa hã ki cifi mbur ngi jigin ɗu na!

¹³Da ya mira ɓi: «Arngawo a sa giy zuwen, yo kitihin ɗu ya mutup ara, a sa tikiniy i tuwuy mata» na,

¹⁴dar ka, ki giy zluwun ti musuwun malambaˀhay, joˀ gwat ngi gi zluwunoyo, i pura taŋ ti kleŋ.

¹⁵Zuwen luwiy law a muŋ ɓa i ɓut, a funa le. Ya misek tesl hana, zuwen mucu!

¹⁶Muk muduba! Na zle, y'anta ndir ti siifa ngi caˀa ta. Puliy mbakka, asi hin ngi siifa ɗu i gwat lambaˀa.

¹⁷Mbur titira i mi, ɓa hã ki pura naŋ puɗaw, yo ɓa hã ki ki slimiɗ ara kahana ka?

¹⁸Ɓa hã ki puraŋ keɗ le keɗ le vur prik gar, yo ɓa hã ki ci a kwacay naŋ ar pas wanaka gar na ka?

¹⁹Ki sa pula singil ɗu hã ti vunaka? Ki sa puliy hã ti vuna ɓa i musuwun fẽh ka?

²⁰I gi mungra le kwa? Aw mijiɗa mizli, i guw di i gwat mike? Ki tiri ti ya gwat ngi wi haŋ avu ya ti luvut ɗik vur mike? Yi tiri le avu ka dudok, kaɓa gwat ngi jijir kwa?

²¹Slikiɗa ɓi ɗu na, ki ɓusa gu ta wãˀ vur mike? Yo ki pula zluɓa ɓi ɗu teˀ ta vur mike? Ani wurenna, i ro tup ar murɓuk si. Ki sa puriy gar gar, a sa so ko y'anta mata.