Read South Giziga JOB 8 Bible Online

JOB 8 - South Giziga bible

JOB 8

¹Akẽh na, Bildat mbur ngi ruwuy Suha, a zla a ɓa Jopo:

²Sipi mi ɗik mukoloŋ koloŋ na, kisa kiɗa mi nah ti vunaka? Mingiɓi ɗik mihimaˀ ka burkataŋ na, kisa kiɗa mi nah ti vunaka?

³Buymisemuŋ a hiriya ɓimujuwa mitaˀ gara kwa? Misi gidaŋ wãˀa, a hiriya gi jeŋŋe kwa?

⁴Da ziri ɗikey a gakaŋ mungra le na, a pula taŋ mbak da gidaŋ ngi mungra taŋ madiɗa vuna.

⁵Amma da ki ra sipa Buymisemuŋ, da ki ra tumbulo Misi gidaŋ wãˀa,

⁶da k'ada teŋteŋ, yo kaslsla na, naɓa Buymisemuŋ a sa ki slimiɗ ar ka, a sa cicuw ɓa ki gi gwat mijeŋŋe a muŋ.

⁷A sa gi na, joˀ ɗik misi zleˀe i lambaˀa, ko a dukom duk le ati mezle ka masa luuma tumbuŋ na neˀ le ta.

⁸Inga cufuɗa mizli misi zleˀeheye ɗi, jika slimiɗ kuy kuy, ɓa ki si na gwat dideˀ taŋhay mugoko di zleˀe na.

⁹Ndra miyam ndra ngi daambu ani na, i sinam gwat neˀ ta, asi siifa ndra a ruwuy aka, a cuh kutum kaɓa susuɗuku.

¹⁰Amma taŋ misi zleˀeheye, a dubunukuw gwata, a sa ɓukuw ɓi ma, yo tir wuluk taŋ, a sa boko ti ɓi ngi siney ani:

¹¹«Lavaɗ ada gil ar li lambaˀ, mbak ar sozo kwa? Lavaɗ ada gil manja yam kwa?

¹²Naŋ mira fuyuk ti fuyuk aruŋ, ko da a slaka ta kwana, a muˀul dumbuŋ ar giziŋheye ceke.»

¹³Mizli mapuyukom hirnga ti Buymisemuŋ na, muzuwula taŋ le kanah. Njah hiri ngi mbur miziriɗa mi na, a sa zizi suytum.

¹⁴Ɗuva wuluk naŋ taˀ na, a sa kiɗ mi, asi pula vu naŋ mimbak na, naŋ ka hay ngi monjoronjoro.

¹⁵Da naŋ miginisl le ginasl ti hay naŋ na, hay a wusu. Da naŋ muluw di le law na, a mbizli.

¹⁶Naŋ kaɓa widis ngir pas, misi yam jõh jõh ava, a ciya mihaŋ naŋhaya cay cay a hirnga jarne.

¹⁷A gijuwa dimbasl naŋhaya gijaw gijaw avu ɗuguroy, a ci sesẽŋ ng'ar wala muwãhay.

¹⁸Amma da a muɗaka le ceɗ tir li naŋ na, li naŋ a ji mi, a ɓi: «I puruw ɗaˀ ta wãˀ!»

¹⁹Hana i cira hiri masa gi avu mbur misi kanah so. Joˀ widis mekelem a puso ar li naŋ.

²⁰Pura ɗi, Buymisemuŋ anta hirsa mbur mikaslsla ta, yo naŋ anta jina mizli migi malambaˀhaya ta.

²¹Buymisemuŋ a sa mbuw ti singir, yo a sa ga ɓa ki ji salalay kiɗ kiɗ ti irne ɗike.

²²Mesem a sa sirita ngama ɗikeye, yo misi moˀoreheye, a sa gam t'anta mata.