Read South Giziga JOB 9 Bible Online

JOB 9 - South Giziga bible

JOB 9

¹Dar Jop a mbiɗa, a ɓi:

²Naŋ kanah gisiŋ, yi si na le. A sa gi mbri mbri, ɓa mbur titira a ɓi, naŋ jeŋŋe a mbuŋ Buymisemuŋ ka?

³Da mbur a wuɗ le, ɓa a gam mi ati naŋ na, ko a ɓaŋ sar durmuk kwana, naŋ anta mbiɗaŋ di ko pal ta.

⁴Buymisemuŋ naŋ ti sinmijileŋ, yo naŋ gidaŋ haɗa wãˀ, macici kaŋ kaŋ gu ava, manja a gaŋ kiita na, i waka?

⁵A kiraha muwãhaya ng'ar li mekelem, manja muwãhay vuna a sinakaŋ, naŋ miji mevel na, hã a putukuso taŋ.

⁶A jijika hirwuyo ngbir ngbir daˀ arleˀe, joˀ ɓamtal naŋhay a suwuɗam.

⁷A ɓa pasa ɗaˀ na, pas a bo mata, a tiɗa wurzlaŋhaya kap kap.

⁸A pusuka muŋ mbilir da naŋ pal naŋ, aru tiɗap tiɗap ti sar, ar diɓel ngi yam ar mubuliye.

⁹I naŋ miga dungusoy ati wurzlaŋ mipi hiriheye, yo wurzlaŋ miɗiɗa slahay waɗ ngay ngi wurzlaŋ vay ruwuyoyo.

¹⁰A gi gwat madiɗahay misi mbur a sla wala taŋ gu ta, waɗ gwat migam ɗaˀ tahay, misi mbur a slufa taŋ gu ta.

¹¹Da ara cuh ani gweˀ avu ya ma, y'anta puraŋ ta, da a cuh le kileŋ kwana, y'anta sla wala nah ta.

¹²Gwat naŋ mitiɓa le ti gidaŋ na, mbur mamo di gu ada kwa? Mbur masa ɓaŋ: «Ki gi mike» na, ada kwa?

¹³Da Buymisemuŋ a ji mevel le na, naŋ anta pula ta, mbur mahuhum vu, gwat naŋ mijih jah ti naŋ na, a luwuslam a mbuŋ naŋ.

¹⁴Da naŋ kine na, ya i mbiɗaŋ di mbrike? I sa lumo mi wana ngi ɓaŋ di ka?

¹⁵Ko da ya jeŋŋe zleˀe tekeɗe kwana, y'anta sa mbiɗaŋ di ta. Sey i tumbuloŋ, naŋ migi kiita ɗu, ɓa a giy mezle.

¹⁶Da ko i zilaŋ, a ziliy mi le kwana, ɓa yi ɓi a ciniy di le na, yi tiɓa ta.

¹⁷Naŋ a buɗisliy hirnga gurjik kaɓa burkataŋ, a giy waˀa mekelem mekelem ngatara lambaˀ kine si.

¹⁸N'anta puliy mbak i musuwun fẽh ta, asi a mbiy kwacay le wãˀ ti ɓi ngi cuko mi.

¹⁹Ɓa i zliram dibiɗ ati naŋ sukwa? Migidaŋ fineˀ ya i naŋ na si. Da i ru ti ɓi ɗu le ar kiita: masa slufa ɓi ɗu ar kiita vuna i waka?

²⁰Da ko ya jeŋŋe zleˀe kwana, mingiɓi ɗu a sa jiy ti kiita, da ko ya kaslsla ma, naŋ a sa piy zluɓo da ya na si.

²¹Yi ci ar ɓi ta kwa? I ya vuna tehhe a muŋ masina ta. Cifi ti siifa a ɓuliy mi le.

²²Hana gar na, i gwat mupurla, yi ɓa le ma kini: mbur mici le ar ɓi ati mici ar ɓi ta gar na, Buymisemuŋ a susuyumo taŋ.

²³Da gwat ngi mendere midiɗo vu le kpis, ara ngizla mizli micam ar ɓi tahaya na, Buymisemuŋ a singir ti singir ar bonoy taŋ na tewle.

²⁴Da hirwuy i muvula le asi haŋ ngi misi moˀorehey na, Buymisemuŋ a sirita hiri ngi migi kiitahaya! Da i naŋ ta na, i wa aruŋ maka?

²⁵Hin ngi siifa ɗu ara kil kutum, fineˀ kil ngi mburu. Hin ngi siifa ɗu ara cuh coh kine, manja a lum wuya.

²⁶A kil kwarra, kaɓa palalam miɗiya ti lavaɗ, kaɓa kurom masur nga vi gwat.

²⁷Da ko i ra ɓi ti kwacay ɗu: i wuɗ i puyuko hirnga ngi tuwuy ɗu, i pula ndurɓo hiri, yo ɓa hiri a ciriy kwana,

²⁸y'ada ngirkik lambaˀ ti bonoy ɗu na si. Ka Buymisemuŋ, ɓa ki ɓi vur ya: yi ci ar ɓi ta na, i si na le, k'anta ɓi ta.

²⁹Migi malambaˀ i ya. Ki giriy ngatara vur mike?

³⁰Ko da i bun le zleˀe ti yam mapo buk buko, ko da i buna haŋ ɗu le zleˀe ti sabun tekeɗe kwana,

³¹anja kisa ciy ng'ar ndileɓ a muŋ na si, joˀ zana ɗuwoy a sa puram zlurtok zlurtok, kuyta wãˀ.

³²Buymisemuŋ i mbur ka ya ta mayse, anja ani i mbiɗaŋ di, malla i gam kiita zleˀe.

³³Da mbur ada zleˀe ngi wuɗuk ndra ɓa a ja ndra kaw tika kaw tika na,

³⁴anja ani, a tika ganday Buymisemuŋ makiɗiy ti naŋ na le, ɓa zluwun naŋ magiy di na, a muɗiy membezleŋ mata.

³⁵Anja ani, i sa ɓi, y'anta sa zluwun mata. Ani naŋ kanah ta ma, i ya tuwa ɗoɗok pal ɗu.