Read South Giziga PSA 10 Bible Online

PSA 10 - South Giziga bible

PSA 10

¹Bumbulvuŋ, ki cici kileŋ vur mike? yo ar hin ngi bonoyo, ki ɗum vur mike?

²Mbur muhuhumo vu misi moˀore, ara zuma misi murgahaya, a ja taŋ le ti wer naŋ maga na.

³Yo mbur misi moˀore ara huhum vu, asi a luuma gwat naŋ mawuɗo le. Naŋ mulum zlili ti jiviɗ malambaˀ na, a nisa Bumbulvuŋ, a singir araŋ.

⁴Misi moˀore a mbi le na, naŋ anta sipi gwat mata, a ɓi: «Bumbulvuŋ anta», wer naŋ wãˀ i hana.

⁵Gwat naŋ maga gu, ara bigi njah ar pas gar. Kiita ngi Bumbulvuŋ naŋ kileŋ haɗi ava, a tuf tazlay a hirnga mizli mazliram ti naŋ tahaya gar.

⁶A ɓi ti kwacay naŋ: «Ya gidaŋ gidaŋ, ko mendere anta sa lumiy ta ndiɗaˀ.»

⁷Mingiɓi naŋ sey i nisa vu, tikina vu waɗ moˀore. Irne naŋ, a ɓi di ɓi ngi mungra madiɗa waɗ ngi hirya vu.

⁸A cici ɗum a duba gezleŋ, mbur migi gwat ta si na, a kiɗa ti yaŋ yaŋ, a ro hiri taˀ avu mbur hĩhĩyaŋ.

⁹A ro ɗum, yaŋ kuy kuy kaɓa mobor asi kalafa. A ro ɗum ngi ji mbur migeˀ ircece, a ja mbur migeˀ ircece, a ɗiɗo di ng'ar zuva naŋ.

¹⁰A kurmuɗ ti kwacay, a girdiˀ girdeˀ, ara ja mbur mihĩhĩy le nguɓoc.

¹¹Misi moˀore a ɓi ti kwacay naŋ: «Bumbulvuŋ a puyuk hirnga le, a tiɗa hiri le, naŋ anta pur neˀ ta ndiɗaˀ.»

¹²Slikiɗ Buymisemuŋ! Aw Bumbulvuŋ ɗu, jiniy! Ki puyuk hirnga ti mizli migeˀ irceceheye ta.

¹³Mbur misi moˀore a singir ar Bumbulvuŋ vur mike? A ɓi ti kwacay naŋ: «k'anta sa supo ya ta.»

¹⁴Ki pura le, bonoy ati gir ngi mbur misi murga na, i ka masingila taŋ, i ka mazuɓa zayɓi nah. Mbur hĩhĩy a puluw vu naŋ le mbak da ka, i ka majina mutuhu.

¹⁵Ngila haŋ ngi mbur misi moˀore, da ki cufuɗaŋ le ɓa a ɓuw ɓi ngi mungra naŋ na, ko k'anta lum neˀ le ta.

¹⁶Bumbulvuŋ i buy madiɗa ngi sete, sukwi mekelemey a kiɗam mi le asi ruwuy naŋ.

¹⁷Bumbulvuŋ, mizli muluɓ luɓoy mawuɗam gwat na, ki tiɓa le, ki ra vula taŋ gidaŋ, ki ra jik slimiɗ kuy kuy,

¹⁸ɓa mutuhu ati mbur muguzuvura le, a lumam hirnga taŋ, yo ɓa mbur asi ruwuyo misi dumvu mamuco, matik ˀay da mbur anta mata.