Read South Giziga PSA 102 Bible Online

PSA 102 - South Giziga bible

PSA 102

¹Dira dibiɗ ngi mbur migeˀ ircece, mihĩhĩy le wãˀ, ma tuwuy di a mbuŋ Bumbulvuŋ.

²Bumbulvuŋ, cine diradibiɗ ɗu, anja widi ɗu a ndil gbaˀ avu ka!

³Tapas bonoy mulumiy le na, anja ki ɗumo mihiri ɗik avu ya ta. Juko slimiɗ ng'avi ya. Tapas da ya mira ziluw na, ambuh kilo widi ɗu kutum takwa.

⁴Asi hin ngi siifa ɗu, ara cuh turliŋ ka cunju mangis, tesl ɗuwoy ara zlizliram kaɓa ar vu matiɓi giw giw.

⁵Mevel ɗu ara muˀul kaɓa giziŋ mislaka le, mbak hã i puyuk hirnga ngi zuma gwata.

⁶Ya mandir ar li tuwuy tuwa na, i zih le ngiyam, mindiriy i kuturkuy cap ar tesl tewle si.

⁷I bam vu ati sutete a wuzlaɓuh mikirɗak kirɗaka, yo kaɓa biizim ar diŋ.

⁸Ko y'anta hinje neˀ le ta wãˀa, mbak y'ani kaɓa ɗiyuw micifi le njiv pal naŋ a hirnga viŋ.

⁹Vur hin gar na, mesene ɗuwoy ara zlikiy, a slikiɗam himaˀ fõh fõh ng'ar ya, a zilaka slimiɗ ɗu ar nisa mizli.

¹⁰Yi zum ar deɗe ngi ɗaf ɗu i fucu, gwat ya masa gar na, i ra lihiɗa lahaɗ lahaɗ ti tuwuy.

¹¹Buymisemuŋ ɗu, ka miji mevel, yo himaˀ fõh fõh ar ya tuwa na, ki jiy kaw, ŋzloh ya avra.

¹²Hin ngi siifa ɗu ara susuyum ka susuɗuk ngi pastaˀa, joˀ yi muˀul kaɓa giziŋ.

¹³Amma ka Bumbulvuŋ, ki buy madiɗa ngi caˀa, mizli a sa slufaka ɓi ɗike, hã ngi set, ngi samadin.

¹⁴Ki sa slikiɗ, asi ka mawuɗ walahay Siyoŋ, asi hin a ndila le, ɓa ki puraŋ ircece, haˀaw, hin a ndila le.

¹⁵Ɗugur naŋhay mindirama, ndra gawla ɗikeye, i ra wuɗam, yo ko hohoy naŋ vuna kwana, ara ga ndrˀircece.

¹⁶Sukwi ngi mizli ngi si ruwuy gar, a sa zluwunam ti ka Bumbulvuŋ, yo buy madiɗa ngi si ruwuyoy gar, a sa sinaka dudok ɗike.

¹⁷Gwat hana gar na, a sa gi tapas Bumbulvuŋ misa ndira Siyoŋ, hiri naŋ le a muŋ, yo naŋ misa bugo vu le angi dudok naŋ,

¹⁸tapas naŋ masa mbiɗi hiri ngi cine diradibiɗ ngi mizli mindiram haŋ njoŋ kine, yo taŋ misa cufuɗam gwat le ava na, a ngum muduba na.

¹⁹Anja a tohoko ɓi hana toh toh le da mizli masa ya ka taŋ ti mbuŋ, ɓa mizli naŋhay, naŋ masa ga taŋ nawaya na, a sa hunumakaŋ naŋ Bumbulvuŋ.

²⁰Bumbulvuŋ, naŋ misi a hay naŋ a muŋ na, a guɓo guɓ zle a muŋ a diga, a puro hirwuyo le keɗ keɗe,

²¹ɓa a cine niˀic ngi dangayay, yo mizli migaka taŋ kiita ngi muc le na, ɓa a pula taŋ.

²²Dar mizli a sa tilam mi ti slimiɗ ngi Bumbulvuŋ njuh njuh a Siyoŋ, yo a sa hunumakaŋ ti dimis a Zeruzaleme.

²³Ɓi hana gar na, a sa gi tapas sukwi ngi mizli ngi si ruwuy gar ati zuma buyoy gar masa kusom, ɓa ngi huruk huruk a mbuŋ Bumbulvuŋ.

²⁴Ti ya migi midigila t'aruŋ si na, Bumbulvuŋ a sliy gidaŋ ɗu rac, waɗ a miy hin ngi siifa ɗu duguleˀ si.

²⁵Vurˀe, yi ɓaŋ na: «Bumbulvuŋ ɗu, ya muro a wuzla hin ngi siifa ɗu aruŋ na, anja ki zuɓiy hirak tapasa t'aruŋ, ka, k'ada hã ngi set, ngi samadin.»

²⁶I ka miga hirwuyo, diga misi nga dana ta, yo miga muŋ i ka ti haŋ ɗike ma.

²⁷Gwat tayna gar na, a sa zizam, amma ka, k'ada i kakahha. Hirwuy ati muŋ a sa hiryam kaɓa zana, kisa mbiɗa taŋ kaɓa zana, a sa pulaka li taŋ.

²⁸Amma ka, k'ada i kakahha, hin ngi siifa ɗike, anta kiɗ mi ta.

²⁹Ziri ngi ndra gawla ɗikeye, a sa cifam ti siifa, yo dideˀ taŋhay a sa ndiram a mihiri ɗike.