Read South Giziga PSA 106 Bible Online

PSA 106 - South Giziga bible

PSA 106

¹Haleluya! Hunumaka Bumbulvuŋ, asi naŋ mezle, yo gi teŋteŋ naŋ na, naŋ da caˀa kine.

²Slra madiɗahay, Bumbulvuŋ miga taŋ na, maɓa ɓi nah gu i waka? yo mahunumaŋ gu, ɓa hã mizli a cinam ar li gar na, i waka?

³Mizli majaka ɓimujuwa mitaˀ gar a hirnga, yo magam gwat mijeŋŋe angi pas gar na, a mumulom!

⁴Bumbulvuŋ ɗu, da ka mira ga mezle da mizli ɗikey na, ambuh,wuluk ar ya takwa. Daka mira laha mizli ɗikeye na, ki slimiɗ ar ya.

⁵Kanah na, ɓa mizli ɗikey, ka muwuna taŋ masa cinam ndum na, anja i sa cin ndum aya, i sa mumul ka mizli ɗikey mamumulom na ya, yo i sa jijaham jom ati mizli ngi ɗikey majijaham na ya.

⁶I gam mungra le kaɓa dideˀ ndrahay na ya, i ngizlam le avu jiviɗ ɗike, i zluɓaka le.

⁷Dideˀ ndraˀahaya, ti taŋ misi a Ezipte na, cekenehey ka miga taŋ na, a slaka wala nah ko neˀ ta. Gi mezle ɗikey mimbeˀmbeˀ na, a puyukom taŋ hirnga le, a slikiɗam ɓi le avu ka a mi mubuliy lavaɗa.

⁸Amma naŋ i Buymisemuŋ milaha taŋ, ɓa ngi biga dudok naŋ, yo ɓa mizli a puraka gidaŋ naŋ.

⁹A buca mubuliy lavaɗa ɓar na, a hisik ngbatataŋ, a cuh ti mizli njiraŋ njiraŋ tir heleleŋ, kaɓa a wuzlaɓuh mikirɗak kirɗaka.

¹⁰A laha taŋ le tisi haŋ ngi mizli mawuɗam zlir ti taŋ tahaya, a tuɓo taŋ le tisi haŋ ngi mesene taŋhaya.

¹¹Yam a nda mizli mazliram ti taŋ tahaya le yimak, ko mbur purla mindir anta.

¹²Akẽh na, Israyeley a tiɓaka ɓi ngi Buymisemuŋ miɓa zleˀe tuwa muduba, a hunumakaŋ ti dimisi.

¹³A dirba nah, gwatay Buymisemuŋ miga taŋ tuwa, a puyukom taŋ hirnga kutumo si, gwat naŋ mujuwa a mevele ngi gi gar na, ko a kutukoko ɓi nah mata.

¹⁴A wuzlaɓuh mikirɗak kirɗaka, a hĩyãm gwat misi anta avu taŋ ta, ar li papala, a zlaka a cam a kwacay Buymisemuŋ.

¹⁵Dar Buymisemuŋ a vula taŋ gwat taŋ mucufuɗama, a vula taŋ kaslsla asi may taŋ ta.

¹⁶Ar walahay guɗuk taŋ, a gam suloŋ ti Moyise, waɗ ti Aroŋ, mbur Bumbulvuŋ muvulaŋ slra.

¹⁷Dar hirwuy a cir puɗak, a nda Dataŋ, a sluruɓ sliraɓ ar mizli ngi si Abiramaya.

¹⁸Vu a zlizlira hilfa taŋ kap, irne vu a zuma mizli miziriɗa mi ngi Buymisemuŋ tayna le.

¹⁹A ɗiyam zuŋ sla a muwã Horepe, a hurkom a mbuŋ ɓiri ngatara lambaˀ kine.

²⁰Ar deɗe ngi Buymisemuŋ maga taŋ ɗongor na, a ɗiyam sla, gwat lambaˀ mazum giziŋ.

²¹A puyukom hirnga ti Buymisemuŋ, milih taŋ le, Buymisemuŋ migi gwat madiɗahay a Ezipte,

²²naŋ miga cekenehey a ruwuy ngi Kam, waɗ gwat ngi zuma hirngahay a mi mubuliy lavaɗa.

²³Buymisemuŋ a juwa le a mevele zleˀe ɓa a ngizla taŋ, amma Moyis, mbur naŋ muwunaŋ tuwa, a cici zlak a mbuŋ naŋ, a tikaŋ, ɓa a mucaŋ mevele, a ngizla taŋ mata.

²⁴A hirsaka hirwuy mimezle, a tiɓaka mingiɓi ngi Buymisemuŋ ta.

²⁵A zlaka cikisla ɓi a hur guɗuk taŋhaya, a cinaka mi da Bumbulvuŋ mata.

²⁶Dar Buymisemuŋ a hudum, haŋ paɗ a muŋ, a ɓi ɓa a ngizla taŋ a wuzlaɓuh mikirɗak kirɗaka,

²⁷ɓa a zliɗa hirnga ngi dideˀ taŋhaya mber mber ng'asi ruwuy gar, ɓa a ngizla taŋ angi hirwuy ngi mizli duniyahay.

²⁸Akẽh ma na, a vulaka vu taŋ da Baˀal a Peˀor, yo a zumam ɗaf ngi kulihey.

²⁹Gwat ngi gi taŋ na, a ja mevel le kuyta wãˀ da Buymisemuŋ, dar jiji doflo a diɗo vu kpis a wuzla taŋ.

³⁰Akẽh na, Pinas a slikiɗ, a ɗiya ɓi nah jeŋŋe a muŋ, a dirba nah, doflo tuwa, a kiɗ mi.

³¹Buymisemuŋ a pura na, Pinas a gi di i gwat mijeŋŋe, ɓi nah a ndir vur dideˀ taŋhay nga mbuŋ nga mbuŋ ndrehhe.

³²A mi yam Meriba ma na, a gaka gwat ngi ji mevel da Buymisemuŋ hã Moyis a lum mendere asi ɓi taŋ.

³³A gaka gwat ngi ji mevel da Moyise, hã a mbiɗaŋ lesle, mbak a ɓi lambaˀ manja a wuluku.

³⁴Bumbulvuŋ a ɓa taŋ le zleˀe, ɓa a sa ngizlaka sukwi mekelemeye, amma ko a ngizlaka taŋ ta.

³⁵Amma a jumom ati mizli duniyahay, a dubunaka gwat ngi gi taŋ.

³⁶A gam mezegwel da kuli ngi mizli tayna, dar kuli tayna tuwa, a tiram ngamngam ngi ji taŋ tehhe a muŋ.

³⁷Zir mizile ati mongosohoyo, dideˀ ndraˀahaya, a gam ti taŋ mikuli da milyamay.

³⁸Mizli migam gwat ta si na, a paka pumbus taŋ, a pam di ngi ziri taŋ mizile ati mongosohoy, taŋ migam ti taŋ mikuli da kuli ngi Kanaˀanay tuwa, mbak hã pumbus taŋ a ɓul gap gap, a hirya hirwuyo gar.

³⁹A hiryam ti sirik ngi mizli tayna, gwat ngi gi taŋ a tiri taŋ sulomehey.

⁴⁰Vurˀe, Bumbulvuŋ a slikiɗ himaˀ fõh fõh angi taŋ mizli naŋhaya, a gaŋ ɗuva hiri angi taŋ mata wãˀa.

⁴¹A vula taŋ asi haŋ ngi sukwi mekelemey, i mizli mazliram ti taŋ ta mawaka taŋ.

⁴²Mesene taŋhay a guzuvuraka taŋ le, dar taŋ a hinamˀay a mbuŋ taŋ.

⁴³Buymisemuŋ a laha taŋ le is mbeˀmbeˀ tisi haŋ ngi mizli, amma t'adakaŋ kaŋ ar slikiɗa ɓi taŋ na si, yo ara cam ti gidaŋ hǝɗ hǝɗ ng'ar mungra.

⁴⁴Buymisemuŋ micin widi taŋ le na, a kilo widi taŋ.

⁴⁵Jumoˀay naŋ ati taŋ na, naŋ da keŋŋe a hirnga, naŋ magi teŋteŋ haɗa tuwa na, dar a mbiɗa wuluko.

⁴⁶Mizli mijahay le nga ruwuy mulak gar na, Buymisemuŋ a ga ɓa buy taŋhay a puraka taŋ ircece.

⁴⁷Bumbulvuŋ, Buymisemuŋ ndra, laha ndra, cikilo hirnga ndra ti wuzla sukwi mekelemeye. Akẽh so na, ndra masa hunumukuw na, i sa zilam di i slimiɗ ngi ɗik mipal na. Joˀ i sa jijaham ti hunum ɗike so.

⁴⁸Sise da Bumbulvuŋ Buymisemuŋ, ngi Israyel, zle wurenna, hã ngi sete. Yo anja mizli gar a tiɓaka: «Amin! Haleluya!»