Read South Giziga PSA 107 Bible Online

PSA 107 - South Giziga bible

PSA 107

¹Hunumaka Bumbulvuŋ, asi naŋ mezleŋ, yo gi teŋteŋ naŋ na, naŋ da caˀa kine.

²Mizli, Bumbulvuŋ micik vu ar taŋ, yo mizli naŋ mutuɓo taŋ avu mizli mazliram ti taŋ ta na, anja a maka hiri ngi hunum naŋ.

³I mizli, naŋ mucukulo taŋ le tisi ruwuy zlar gar, tisi pas ngi miprik waɗ tisi pas ngi pastaˀa, tir vay muŋ waɗ tir vay ngi ruwuy.

⁴Mizli mekelemey asi taŋ, a zizam le kiŋkiŋ a wuzlaɓuh mikirɗak kirɗak, ko a lumaka jiviɗ ngi ru ng'ar walahaya ta.

⁵May a ja taŋ, yam a ga taŋ, hã a hĩhĩyam wãˀ.

⁶Taŋ misi ar bonoy tuwa na, a tilaka mi da Bumbulvuŋ, a laha taŋ tir mendere taŋ.

⁷Akẽh na, a zuɓ ti taŋ jiviɗ cirre, ng'ar li misi walahay araŋ.

⁸Anja a hunumaka Bumbulvuŋ vur gi teŋteŋ naŋ na, yo vur cekene, naŋ miga taŋ vur mizli titrahaya na.

⁹Asi a vula yam ngi si le da mizli madalyam makiɗa taŋ, yo mizli misi may makiɗa taŋ kwana, a mba taŋ le ndus ndus ti gwat ngi zumo.

¹⁰Mekelemeye, taŋ zleˀe ar luvuŋ, ar li mitimbiɗim mazizi vu, taŋ geˀ ircece le, kaˀ kaˀ ti celeluhoy.

¹¹Asi ɓi Buymisemuŋ muɗuva taŋ di na, a ngumam cin naŋ ta, Mimadiɗa, ɓi naŋ mujuwa na, a puraka hiris le.

¹²Buymisemuŋ a tika taŋ ˀay ti ga taŋ bonoy, a ndiram kupuyah kupuyah, ko mijini taŋ anta.

¹³Taŋ misi ar bonoy tuwa na, a tilaka mi da Bumbulvuŋ, a laha taŋ tir mendere taŋ.

¹⁴A ɗiɗo taŋ tir luvuŋ, tir li mitimbiɗim mazizi vu tuwa, a buko taŋ celeluhoyo buk buk avra.

¹⁵Anja a hunumaka Bumbulvuŋ asi gi teŋteŋ naŋ na, yo vur cekene, naŋ miga taŋ vur mizli titrahay na.

¹⁶Asi a ngila miviŋ ngi ɓiri gazahaya le, yo a waha faɓuru ngi ɓiriheye le.

¹⁷Mizli numuŋhoyo, a tiram gilaway le asi gi gwat taŋ malambaˀ na, mungra taŋ a mi ti taŋ le vus vus a ruwuy wãˀa.

¹⁸Gwat ngi zum gar na, a ga taŋ kuy ta, taŋ sar taˀ tir vigiɗi.

¹⁹Taŋ misi ar bonoy tuwa na, a tilaka mi da Bumbulvuŋ, a laha taŋ tir mendere taŋ.

²⁰A slino taŋ mingiɓi naŋ ɓa ngi mbulo taŋ, yo ɓa a tuɓo taŋ avu muco.

²¹Anja a hunumaka Bumbulvuŋ asi gi teŋteŋ naŋ na, yo vur cekene, naŋ miga taŋ vur mizli titrahay na!

²²Anja a gam mikuli ngi hunuma Buymisemuŋ, yo gwatay naŋ miga taŋ na, anja mizli a tilam di mi ti ji salalay.

²³Mizli maram ti palalam ar mubuliy, yo magam slra nga taŋ ar mubuliy madiɗahay na,

²⁴slra ngi Bumbulvuŋ miga, ati cekene madiɗahay, naŋ miga taŋ ar mubuliy na, taŋ a puraka le.

²⁵Naŋ miɓi le ɗaˀ si na, burkataŋ a gi, a slikiɗa yama, diɓel jirif jirif.

²⁶Yam tuwa, a zuɓa taŋ nga muŋ viɗngil viɗngil ti palalama, a mo taŋ nga ruwuy a muŋ ma, hã a ga taŋ didaka bar bar.

²⁷A ga taŋ hirnga viwwe, taka kakakaɓa mbur miwi le ti mbaazla, ko a sinaka ɓa a gam kini mata.

²⁸Taŋ misi ar bonoy tuwa na, a tilaka mi da Bumbulvuŋ, a bo taŋ tir mendere taŋ.

²⁹Buymisemuŋ a cica burkataŋ kiŋ, dar yam a ngi diɓele mata.

³⁰A cinam ndumvur gwatay mumoko nga taŋ nga taŋ a muŋ na, joˀ Buymisemuŋ aru ti taŋ ng'ar li pi sar ngi palalam, misi taŋ mawuɗam.

³¹Anja a hunumaka Bumbulvuŋ, asi gi teŋteŋ naŋ na, yo vur cekene, naŋ miga taŋ vur mizli titirahay na.

³²Anja a tilam mi ti ɓi ngi madiɗa naŋ na ar kus ngi mizli, yo a hunumaka ar cikil ngi mizli micawwahaya.

³³Mizaw madiɗa misi yamaya, Buymisemuŋ a hisika taŋ gu, yo miviɗiviɗi ngi yamaya, a tiri taŋ li manja yama gu,

³⁴malla li magi gwata, a tiri di fata gu, hana gar na, asi moˀore ngi mizli ngi raˀahay.

³⁵Wuzla ɓuh mikirɗak kirɗaka, a tiri di yam ciɗak ciɗaka gu, yo li muˀulo kwana, a tiri di miviɗiviɗi ngi yama gu ma.

³⁶Hã a cifi di mizli muroko ar may, a pam di walahay madiɗahay.

³⁷A zligam gwatay, a hirvam gudubunoy, a gaka sifi ngi gwat ngi migam taŋhaya.

³⁸Buymisemuŋ a ɗuwula taŋ mi, a sikam, naŋ anta pula ginew taŋhay a mam nga ruwuyo ta.

³⁹Amma mizli mekelemey a puraka na, ara tiram neˀkini, a roko hurukom, yo jijir, bonoy ati mendere ara guɓo taŋ.

⁴⁰Buymisemuŋ a ga ɓa mizli muɗongor ɗongoroy a hirsam vu, a pula taŋ mbak a zizam kiŋkiŋ a wuzlaɓuh manja jiviɗi.

⁴¹Amma a laha misi murgahaya tir bonoyo, yo a ga ɓa mizli ngi hay taŋhaya, a jam haɗi ka ginewey.

⁴²Mizli misi mevel purlahay mupuraka gwat tayna gar na, a mumulom, yo mizli maɓam mi mijeŋ ta gar na, a gicaka mi kap.

⁴³Mbur mawuɗ sinmijileŋ i waka? Anja a ji lesl avu gwat tayna gar, yo a sla wala ngi gi mezle ngi Bumbulvuŋ.