Read South Giziga PSA 108 Bible Online

PSA 108 - South Giziga bible

PSA 108

¹Dimis ngi wuzla dimis ngi Davitey.

²Yawwa! Buymisemuŋ ɗu, i puluw mevel ɗu le mbak wãˀ da ka, i wuɗ i hunumuw ti dimis, ti mevel purla wãˀ.

³Ɓa hã li a sa wun tikeˀe na, i kiɗa gujuvur ɗu ati garaya ɗu, i wuɗ ɓa i puɗuka li mawuno.

⁴Bumbulvuŋ ɗu, i wuɗ i guw sise a wuzla mizli, i hunumuw a wuzla sukwi mekelemeye.

⁵Asi gi teŋteŋ ɗike, aru hã a funa muŋ, yo kaslsla ɗik a ndil sesẽŋ a duba gazlavay.

⁶Yawwa Buymisemuŋ ɗu, biga madiɗa ɗik mifineˀ muŋ na, anja dudok ɗike, a wucuɗ asi ruwuyo keɗeɗe.

⁷Ɓa yeme ɗikey a laham na, kilo widi ɗu, laha taŋ ti gidaŋ ɗike.

⁸Buymisemuŋ a ɓi le angi hay nga naŋ: «Bugawla i ya! I wunka walahay Sikeme, yo i sla sozo ngi Sukoto mburzlaŋ mburzlaŋ.

⁹Galaˀata inga ya, Manase inga ya ma, Efrayim i jiiku ngi gandaf ngi hirnga ɗu, Zuda i ganday ɗu ngi buyoy,

¹⁰Moˀap i kisa ɗu ngi bun. Edomo, i li cuko tarak ɗu zlaɗ a diga. I hiziga widi ngi vurum kaˀ ng'ar Filistiheye.»

¹¹Walahay madiɗa muguno le ti moholo, masa ru ti ya ng'ara i waka? Masa kisiy sesẽŋ a Edom i waka?

¹²Sey i ka Buymisemuŋ mizliɗa ndra avra na ta na, i waka? Asi k'anta bi asi soje ndraˀahaya mata.

¹³So jina ndra ar li kiɗa vu ati mizli mazliram ti ndra ta na, asi jini ˀis ngi mbur titira i jini mupuɗaw ta.

¹⁴Da Buymisemuŋ naŋ da avu ndra na, i cifam bugawla gu, masa njirsla mizli mazliram ti ndra ta na, i naŋ.