Read South Giziga PSA 11 Bible Online

PSA 11 - South Giziga bible

PSA 11

¹Dimis ngi wuzla dimis ngi Davitey. I mulumo di ar ɗerewol ngi buy dimis. Bumbulvuŋ naŋ ka li ɗum ɗu. Kumo ki ɓikiy ma na: «Kil nga muwã ɗik ka ɗiyuw» mbri mbri maka?

²Puraka, misi moˀoreheye, a roko lek ngiriɗ ngiriɗ, ara ngikaka luvut a mi cuwere, ɓa a muloko mbur misi mevel mezle tir luvuŋ.

³Da a hiryaka virzi ngi ɓi le na, mbur mijeŋŋe a gi mi gu ka.

⁴Bumbulvuŋ a ro ar hay naŋ mipal na, Bumbulvuŋ, naŋ ti li cifi naŋ ngi buyoy a muŋ. A ro hiri taˀ avu mizli, naŋ mapura taŋ na, ara si na taŋ kuy kuy.

⁵Bumbulvuŋ a hĩyã mbur mijeŋŋe, a hirsa misi moˀore waɗ mbur mawuɗ gi kuwo.

⁶Anja a go vuŋ ngi vu, barudu mihilɓiɓ waɗ bonoy haɗa, asi cala asi cala nga hirnga misi moˀoreheye, i muzuwula taŋ vurˀe.

⁷Asi Bumbulvuŋ naŋ jeŋŋe, a wuɗ gwat ngi gi mijeŋŋe, yo mizli mijeŋŋeheye, ara purakaŋ hiri taˀ taˀ.