Read South Giziga PSA 112 Bible Online

PSA 112 - South Giziga bible

PSA 112

¹Haleluya! Mbur mazluwun ti Bumbulvuŋ, yo mawuɗ ɓimuɗuva naŋhay na, naŋ ar mumul.

²Tizer naŋ, naŋ gidaŋ haɗi asi ruwuyo, asi Buymisemuŋ ara ga mezle da mizli mijeŋŋeheye.

³Mbur nah na, a lum gwat, yo a gi zlili haɗa a hay naŋ, yo gi jeŋŋe naŋ a ndir caˀ kine.

⁴Ko ar luvuŋ kwana, li a pusluɗ njahha avu mizli misi mevel purlahaya. Mbur misi mevel purla, i mbur mijeŋŋe, i mbur mezleŋ, yo a pur ircece haɗa.

⁵Mbur mapur ircece, yo mavul duvus da mbur na, i gwat mukuy, gwat naŋhaya, a gi taŋ slra ti jiviɗ naŋ.

⁶Mbur miteŋteŋ, naŋ anta hĩhĩy ta ndiɗaˀ wãˀ, mizli t'ada ndrehhe ti naŋ keŋŋe a hirnga.

⁷N'anta zluwun ti mi memeɗe malambaˀhaya ta, mevele a hin le, a ro hiri njah asi Bumbulvuŋ.

⁸Naŋ gidaŋ, ko zluwun anta neˀ le a mevele ta wãˀ, a si na le, a tikaˀay da mesene naŋhaya gu.

⁹A vul ti gula ti hazum da misi murgahaya, gi jeŋŋe naŋ, naŋ da ndrehhe, a jijih hirnga paɗ a muŋ.

¹⁰Mbur misi moˀore mupuraŋ le keɗ na, a jaŋ mevel, a ngiriɗ sliŋ deŋ, a hĩhĩy le. Naŋ kine, njaha hiri ngi mizli misi moˀoreheye, a tiri gwat lambaˀ le.