Read South Giziga PSA 115 Bible Online

PSA 115 - South Giziga bible

PSA 115

¹Gi dudoko, da ndra ta, Ĩˀĩ, da ndra ta Bumbulvuŋ, amma gi dudoko, da ka, asi gi teŋteŋ ɗik ati jeŋŋe ɗiki.

²Sukwi mekelemey a ɓam: «Buymisemuŋ taŋ naŋ a ma ska» na, vur mike?

³Buymisemuŋ ndra, naŋ da a muŋ, gwat naŋ muwuɗ gar na, a ga le.

⁴Kuli ngi mizli tayna, i ɓiri bara ati ɓiri tapasl tapaslay, i mizli muvuɗaka taŋ ti vuɗ.

⁵Mi ada avu taŋ ngbaŋ, amma t'anta ɓam ta, hiri ada avu taŋ ngbaŋ, amma t'anta puram ta,

⁶slimiɗ ada avu taŋ ngbaŋ, amma t'anta cinam ta, hutuŋ ada avu taŋ ngbaŋ, amma t'anta zãˀãm gwat ta,

⁷haŋ ada avu taŋ ngbaŋ, amma t'anta jam haŋ avu gwat ta, saray ada avu taŋ ngbaŋ, amma t'anta ram ta, yo ko ˀay anta cino neˀ le ti balam taŋ ta.

⁸Mizli muvuɗa kulihey vuna, waɗ mizli manjaham hiri asi taŋ gar na, a tiram le ka kulihey vuna ya.

⁹Israyeley, kumo, njaham hiri asi Bumbulvuŋ, asi mijini kum, yo mbaray kum i naŋ.

¹⁰Dideˀ ngi Aroŋhoy, kumo, njaham hiri asi Bumbulvuŋ, asi mijini kum, yo mbaray kum i naŋ.

¹¹Mizli mazluwunam ti Bumbulvuŋ, kumo, njaham hiri asi Bumbulvuŋ, asi mijini kum, yo mbaray kum i naŋ.

¹²Bumbulvuŋ a ro keŋŋe ti ndra, ara ɗuwula ndra mi. A ra ɗuwula mi da sukwi Israyele, ara ɗuwula mi da tizer ngi Aroŋ.

¹³Bumbulvuŋ ara ɗuwula mi da mizli mazluwunam ti naŋ, da ziri ati mizli madiɗahaya.

¹⁴Kum ati ziri kumoyo, anja Bumbulvuŋ a sikukum.

¹⁵Bumbulvuŋ miga muŋ ati hirwuyo, anja a ɗuwulukum mi.

¹⁶Muŋ, naŋ da Bumbulvuŋ pal naŋ, amma a vula ruwuyo le da mizli.

¹⁷Mahunumaka Bumbulvuŋ, i mizli mumucahay ta, taŋ a pam sar le cek ng'ar li ngi mizli miteˀteˀhey.

¹⁸Amma magaka sise da Bumbulvuŋ i ndra, zle wurenna, hã ngi sete. Haleluya!