Read South Giziga PSA 116 Bible Online

PSA 116 - South Giziga bible

PSA 116

¹Yi wuɗ Bumbulvuŋ, asi da ya mira tumbuloŋ na, a ciniy di.

²A jiko slimiɗe le ng'avi ya, ar hin ngi siifa ɗu gar na, i sa zilaŋ, ɓa a kilo widi ɗu.

³Muc a juwiy le kaˀ kaˀ si, li ngi mizli mumucahay a ngirɗiy le ti celelu, didak a muɗiy le haɗi, yi ro ti gir.

⁴Joˀ i zila Bumbulvuŋ ti slimiɗ naŋ, i ɓaŋ: «Aw Buymisemuŋ ɗu, ambuh, lihiy takwa!»

⁵Bumbulvuŋ, naŋ mezle, yo naŋ jeŋŋe, Bumbulvuŋ ndra a pur ircece haɗi.

⁶Mizli mihina hirngahay na, Bumbulvuŋ ara jigina taŋ, yi mbur hĩhĩyaŋ zleˀe, amma a lihiy le.

⁷Mevel ɗu, ka tisli, asi Bumbulvuŋ a giy mezle le.

⁸Ki tuɓo ya le avu muco Buymisemuŋ ɗu, ki suhĩy tuwuy le, ki tikiy le, ɓa i ɗuva sara ar li lambaˀ ta,

⁹ɓa i ru ɓaˀ a mbuŋ ɗike Bumbulvuŋ, angi hirwuy ngi mizli misi ti siifahay.

¹⁰Ko ti ya miɓi zleˀe: «Ya geˀ ircece le haɗi» na kwana, i puluw vu ɗu le mbak da ka na si.

¹¹Ya misina, i gi kini mata na, i ɓi: «Mizli gar i misi slirey.»

¹²Gi mezle, Bumbulvuŋ migiy di gar na, i sa maŋ di ti mike?

¹³I sa puslaŋ pesl, asi naŋ milihiy na, i sa zilaŋ ti slimiɗ naŋ.

¹⁴Gwat ya miɓa zleˀe ɗaˀ le da Bumbulvuŋ tuwa, i sa gaŋ di, i sa gaŋ di mur mizli naŋhay gar.

¹⁵Bumbulvuŋ mapura mizli miteŋteŋ naŋhay mamicam na, ko anta gaŋ kuyta wãˀ.

¹⁶Aw Bumbulvuŋ ɗu, ani yi gawla ɗiki, haˀaw, yi gawla ɗik, mangal ngi ngwas migi slra ɗiki. Ka, ki pusuko ya le.

¹⁷I sa guw mikuli ngi hunum ɗike, i sa ziluw ka Bumbulvuŋ ti slimiɗ ɗiki.

¹⁸Gwat ya miɓa zleˀe ɗaˀ le da Bumbulvuŋ tuwa, i sa gaŋ di, yo i sa gaŋ di mur mizli naŋhay gar.

¹⁹I sa gaŋ di a wazlaray naŋ, a wuzla kum mizli ngi Zeruzalemey. Haleluya.