Read South Giziga PSA 119 Bible Online

PSA 119 - South Giziga bible

PSA 119

¹Mizli misi gwat ngi gi taŋ naŋ ti mevel purla, yo masipaka ɓimujuwa ngi Bumbulvuŋ na, a mumulom.

²Mizli masipaka ɓimuɗuva ngi Buymisemuŋ, yo masipakaŋ ti mevel purla na, a mumulom.

³Taŋ na, anta gam gwat malambaˀ ta, amma ara sipaka jiviɗ ngi Buymisemuŋ kasl kasla.

⁴Buymisemuŋ, gwat ka mawuɗo, ki biga le, ɓa mizli a kam slimiɗ ara kuy kuy.

⁵Anja i cici zlak kuy kuy ar gwat ngi gi ɗu, ɓa ngi sipa ɓi micica ɗikeye.

⁶Akẽh na, da ya mira singila ɓimuɗuva ɗikey gar na, naɓa y'anta pi mesem mata.

⁷Ya madubuna ɓi mijeŋŋe ɗik, ka mujuwa a mevel na, i hunumuw ti mevel purla.

⁸Ɓi ɓi micica ɗikeye, i ra ja taŋ a hirnga, ki puliy fuk wãˀ ta.

⁹Mbur, zuŋ zuŋ aruŋ, ɓa joˀ naŋ a ndir manja dili na, sey mbrike? Buymisemuŋ ɗu, sey ti ji mingiɓi ɗik a hirnga.

¹⁰I ra supuw ti mevel purla, ki puliy i ngizli kileŋ avu ɓimuɗuva ɗike ta.

¹¹Ɓi ka miɓa le na, i ra ja a mevel ɗu vur ya magi mungra avu ka.

¹²Sise Bumbulvuŋ ɗu, dubuniy gi gwat ka mawuɗo.

¹³Ɓi ka mujuwa a mevel, mubo le ti balam ɗik gar na, i ra slufa taŋ tiɗeˀe ti irne ɗu.

¹⁴Ya masipa ɓimuɗuva ɗik na, a giy mumul, kaɓa mumul asi zlili mihaɗi.

¹⁵I ra wuluk ar ɓi ka mawuɗo, yo jiviɗ ka mikiy di na, i ra singila kuy kuy.

¹⁶Gi gwat ka mawuɗo, ara ciriy hiri teˀe, y'anta puyuk hirnga ti mingiɓi ɗike ta.

¹⁷Giy mezle da ya gawla ɗike, ɓa i ndir ti siifa, yo ɓa i ja mingiɓi ɗik a hirnga.

¹⁸Wuniy hiri, ɓa i pura gwat ngi zuma hirngahay misi ar ɓimujuwa ɗike.

¹⁹A ruwuyo, yi mulaka, ki ɗumo ɓimuɗuva ɗikey avu ya ta.

²⁰Ɓi ka majuwa ndrehhe a mevel na, i ra wuɗ ti tuwuy a hiri.

²¹Mizli minisa tayna mahuhumom vu, mazizam kileŋ avu ɓimuɗuva ɗikey na, ki guco taŋ mi le.

²²Kirihiy kileŋ avu zi ati hiris mahirsikiy na, asi i ra sipa gwat ka mawuɗo kasl kasla.

²³Ko da yarmahay ara gam gidiɓi ar ya tekeɗe kwana, ya gawla ɗike, i ra wulka gwat ka mawuɗo.

²⁴Magiy mumul haɗa na, i gwat ka mawuɗo, mavuliy kuti i naŋ.

²⁵Y'ani burfuk burfuk ɓaˀ ar murɓuku, vuliy siifa a muŋ, kaɓa ka miɓa ɗaˀ le tuwa.

²⁶I slufuw ɓi ngi gwat ngi gi ɗu le, ki ziliy mi le, dubuniy gwat ka mawuɗo so.

²⁷Sliy wala ngi gwat ka mawuɗo, ɓa i wuluk ar gwat ngi zuma hirnga ɗikey na.

²⁸I ro ti tuwuy a hiri, asi ya maliki, slikiɗiy deŋ a muŋ, kaɓa ka miɓa ɗaˀ le tuwa.

²⁹Kirihiy kileŋ avu ɓi ngi slire, yo giy mezle ngi ɓimujuwa ɗike.

³⁰I wini nga ya i jiviɗ ɓa i ndir teŋteŋ, i gi le luɓ luɓ avu ɓi ɗik ka mujuwa a mevele.

³¹I tikaˀay le da vu ɗu, ɓa ngi sipa ɓimuɗuva ɗikey, Bumbulvuŋ ɗu, jiniy ɓa i pi mesem ta.

³²I ra wus vu ngi sipa jiviɗ ngi ɓimuɗuva ɗikeye, asi ki wuniy lesle le.

³³Bumbulvuŋ, bigiy jiviɗ ngi ɓi micica ɗike, ɓa i sipa ɓi nah, hã ti vunaka gar.

³⁴Tiri ti ya mbur misi lesle, ɓa i ja ɓimujuwa ɗik a hirnga, yo ɓa i ja ɓi nah ti mevel purla.

³⁵Kisiy ar jiviɗ ngi ɓimuɗuva ɗikeye, asi ara giy mumul.

³⁶Jiniy ɓa mevel ɗu a mbiɗi ng'ar gwat ka mawuɗ cummo, mbak ɓi ngi luuma gwata le.

³⁷Ga ɓa i mbiɗa duba da gwat mupuɗaw puɗaw tahaya, yo jiniy ɓa i sipa jiviɗ ɗike.

³⁸Ɓi ka miɓa ɗaˀ le na, ga wãˀ ar ya gawla ɗike muduba, ɓa mizli a zluwunam ti ka.

³⁹Zi mazikiy, magiy zluwun na, kiraha kileŋ avu ya, asi ɓi ɗik, ka mujuwa a mevel na, i ɓi mezlehey.

⁴⁰Haˀaw, i ra hĩyã gwat ka mawuɗo, vuliy siifa a muŋ, asi ka jeŋŋe.

⁴¹Bumbulvuŋ ɗu, anja ki go mezle ɗike ng'ar ya, lihiy kaɓa ka miɓa ɗaˀ le tuwa,

⁴²ɓakanah na, i sa lum mi ngi mbiɗa da mbur maziy na, asi i ra njih hiri asi ɓi ka maɓiy di.

⁴³Jiniy ɓa i ɓi di i ɓi mikaslsla ndrehhe, asi i ra njih hiri vur ɓi ka mujuwa a mevele.

⁴⁴Ɓimujuwa ɗike, i ra ja a hirnga, mbak le anta, hã ngi caˀa.

⁴⁵I sa ru digi, hirnga kaˀ a muŋ, asi i ra ki slimiɗ ar gwat ka mawuɗo.

⁴⁶Ko a mbuŋ buy madiɗahay kwana, i sa ɓa ɓi ngi ɓimuɗuva ɗike, manja mesem.

⁴⁷Ɓimuɗuva ɗikey, ya mawuɗ taŋ haɗa na, ara giy mumul.

⁴⁸Ɓimuɗuva ɗikeye, i zuɓa haŋ paɗ a muŋ ng'avi taŋ, i wuɗ taŋ haɗa teˀe, i ra wuluk ar gi gwat ka mawuɗo.

⁴⁹Wuluk keŋ ar ɓi ka miɓiy di da ya gawla ɗik tuwa, i ɓi ka miɓa, ɓa i njih hiri aseˀe.

⁵⁰Ɓi ka miɓa ɗaˀ le na, a vuliy siifa le a muŋ, vurˀe, ko ar bonoy ɗu kwana, matisliy mevel i nah.

⁵¹Mizli muhuhumo vuhoy na, a singiram le haɗi ar ya, amma ko yi ngizli ngizleˀ le avu ɓimujuwa ɗike ta.

⁵²Bumbulvuŋ, ɓi ɗikey, ka mujuwa taŋ misi zle nga dana ta a mevel na, i ra wulka taŋ keŋŋe, matisliy mevel i naŋ.

⁵³Ti ya mapura mizli malambaˀhay mapulaka ɓimujuwa ɗik na, a giy bi hirnga.

⁵⁴Angi hirwuy, ya misi i mulak anga na, gwat ka mawuɗo, i ra ɓa ti dimisi.

⁵⁵Bumbulvuŋ, ti duvuɗo, i ro keŋŋe ti ka, ɓa i ja ɓimujuwa ɗik a hirnga.

⁵⁶Gi gwat ka mawuɗo, ya maja a hirnga na, gwat ɗu i nah.

⁵⁷Bumbulvuŋ, ya maja mingiɓi ɗik a hirnga na, yi ɓa ava ma, mi nga ya i nah.

⁵⁸I ɗuva mevel ɗu le wãˀ, ɓa ngi guw gwat macǝruw hiri, giy mezle kaɓa ka miɓa ɗaˀ le tuwa.

⁵⁹I wuluk le ar gwat ngi gi ɗu, i mawa ng'ar gwat ka mawuɗ cummo na a muŋ.

⁶⁰I wus vu le ngi ja ɓimuɗuva ɗikey a hirnga, ko i zum vu neˀ le ta.

⁶¹Misi moˀoreheye, a juwikiy le kaˀ kaˀ, amma yi puyuk hirnga ti ɓimujuwa ɗike ta.

⁶²Ti wuzla duvuɗo, i slikiɗ ɓa i hunumuw, asi ɓi mijeŋŋe ɗikey, ka mujuwa taŋ a mevel na.

⁶³Mizli mazluwunam ti ka gar, yo gwat ka mawuɗo, taŋ majaka a hirnga na, yi ngama taŋ.

⁶⁴Bumbulvuŋ, gi teŋteŋ ɗike, a naha duniya le, dubuniy ɓi ɗik ɓi micica na.

⁶⁵Bumbulvuŋ, ki giy mezle le da ya gawla ɗike, kaɓa ka miɓa ɗaˀ le zleˀe tuwa.

⁶⁶Dubuniy sli wala ngi ɓimuɗuva ɗik ati sin ngi gi gwata, asi i pula vu ɗu le mbak wãˀ vurˀeŋ.

⁶⁷Dumbuŋ ti ya mihin hirnga zleˀe t'aruŋ na, yi miziza le, amma wurenna, ɓimuɗuva ɗikeye, i ra ja taŋ a hirnga muduba.

⁶⁸Bumbulvuŋ, ka mezleŋ, yo ki gi mezle haɗa da mburu, dubuniy gwat ka mawuɗo.

⁶⁹Mizli muhuhumo vuhoy na, a hiryikiy le ti slir taŋ na, amma ya, gwat ka mawuɗo, i ra ja a hirnga ti mevel purla.

⁷⁰Mevel taŋ anta sli wala ngi gwat ko neˀ le ta, amma ya, i ra mumul haɗa ar sipa ɓimujuwa ɗike.

⁷¹Ya mihin hirnga na, i gwat mezle avu ya, ɓa ngi dubuna gwat ka mawuɗo.

⁷²A vi ya na, ɓimujuwa mubo ti balam ɗike, a funa ɓiri tapasl tapasl ati ɓiri bara miliyoŋ mbeˀ mbeˀe le.

⁷³Mindiriy ndar ndar, yo maciciy deŋ ti deŋ na, i ka, vuliy lesle, ɓa i dubuna ɓimuɗuva ɗikeye.

⁷⁴Ya manjih hiri asi mingiɓi ɗike, mizli muzluwun ti kahay mapurikiy na, a mumulom.

⁷⁵Bumbulvuŋ, i si na le, ɓi ka mujuwa a mevel na, naŋ jeŋŋe, yo ka migiy ɓa i hin hirnga na, naŋ kaslsla.

⁷⁶Anja gi teŋteŋ ɗike, a tisliy mevele, kaɓa ka miɓiy di ɗaˀ le da ya gawla ɗik na.

⁷⁷Anja ki puriy ircece, ɓa i ndir ti siifa, asi ɓimujuwa ɗike, ara giy mumul.

⁷⁸Mizli muhuhumo vuhoy magirikiy kupuyah wãˀ ti slir taŋ na, anja a pam mesem, amma ya, i ra wuluk ar gwat ka mawuɗo.

⁷⁹Anja mizli muzluwun ti kahaya, a moko ng'avi ya, ɓa a sinaka gwat ka mawuɗo cummo.

⁸⁰Sey i sipa gwat ka mawuɗo ti mevel purla, ɓa i pi mesem a mbuŋ ɗike ta.

⁸¹I gir le wãˀ ngi kutukuw ɓa ki lihiy, i ɗuva wuluko le taˀ ngi kutuko mingiɓi ɗiki.

⁸²Hiri ɗu a gir le ar li wunjula ɓi ka miɓiy di ɗaˀ le na, i ɓi: «Ki sa tisliy mevele ti vunaka?»

⁸³Y'ani kutukpok kaɓa kwenekwene muˀulo, amma i puyuk hirnga ti gwat ka mawuɗo ta.

⁸⁴Ya gawla ɗike, hin ngi siifa ɗu a ndiriy kiteka? Ki sa sla kiita da mizli masipikiy nder ndere ti vunaka?

⁸⁵Mizli muhuhumo vuhoy mapuraka ɓimujuwa ɗike hiris le na, a lam vigiɗ le a mbuŋ ɗu, ɓa i diɗ ng'araŋ.

⁸⁶Ɓimuɗuva ɗikeye cek, taŋ kasl kasla, mizli ara gidiɗikiy manja i gi gwata si, kilo widi ɗu takwa.

⁸⁷Yi diɗ le pararah a ruwuy, hiri taˀ avu mucu, amma i pula gwat ka mawuɗo ta.

⁸⁸Vuliy siifa, asi gi teŋteŋ ɗik na, ɓa ɓi ka mubo di le ti balam ɗik na, i ja a hirnga.

⁸⁹Bumbulvuŋ ɗu, mingiɓi ɗike, a ndir ngi caˀa, naŋ da ngi set a muŋ.

⁹⁰Gi teŋteŋ ɗike, a ndir hã ngi samadin, muɗuva hirwuyo taˀ na, i kaha, naŋ da nga naŋ nga naŋ.

⁹¹Gwatay misi ada nga taŋ nga taŋ, hã dana na, mbele ka mujuwa ɓi nah, asi duniya kurzluˀ gar, ara gi slra ɗiki.

⁹²Da ɓimujuwa ɗik magiy mumul na, naŋ anta zleˀe ta na, anja bonoy a kiɗiy le.

⁹³Gwat ka mawuɗo, y'anta puyuk di hirnga ta ndiɗaˀa, ka mavuliy siifa na vurˀeŋ.

⁹⁴Yi ngi ɗiki, lihiy, asi i ra ki slimiɗ ar gwat ka mawuɗo.

⁹⁵Misi moˀoreheye, ara jiɗikiy ɓa a zizikiy hutuŋ, amma ya, yi ro slimiɗ keŋŋe ar gwat ka mawuɗo cummo.

⁹⁶Ko gwat manja hereweɗ kwana, yi pura na, kiɗa mi naŋ da, amma ɓimuɗuva ɗike, anta kiɗ mi ta.

⁹⁷Kay, ɓimuɗuva ɗik na, i wuɗ haɗa, i ra wuluk ara vur hin gar.

⁹⁸Ɓimuɗuva ɗike, a tiri ti ya misi sinmijileŋ, fineˀ mesene ɗuwoyo, i gi di nga ya le, hã ngi sete.

⁹⁹Yi dubun le fineˀ metir ɗuwoyo, asi i ra wuluk ar ɓimuɗuva ɗike.

¹⁰⁰I sla wala ngi ɓi le fineˀ mizli micawwahaya, asi gwat ka mawuɗo, i ja le a hirnga.

¹⁰¹Yi ngum sipi jiviɗ ngi gi malambaˀa ta, asi yi wuɗ i sipi di i mingiɓi ɗiki.

¹⁰²Ɓi ka mujuwa a mevel ɗik gar na, yi mbiɗi duba avaˀa ta, asi mudubuniy di i kaha.

¹⁰³Mingiɓi ɗike, naŋ deɗek deɗek a balam ɗu, deɗek fineˀ mama.

¹⁰⁴Ya masla wala ngi ɓi na, mbele ya masipa gwat ka mawuɗ na, yo ya mahirsa ɓi ngi slir gar na, vurˀe ma.

¹⁰⁵Mingiɓi ɗike, i daliivu a mbuŋ ɗu, i li minjahha ar jiviɗ ya maru.

¹⁰⁶Hadam, i ɓa le, ɓa ɓi mijeŋŋe ka mujuwa a mevel gar na, i ja taŋ a hirngaŋ.

¹⁰⁷Bumbulvuŋ, kay, a guzuvurikiy le haɗa, vuliy siifa a muŋ, kaɓa ka miɓa ɗaˀ le tuwa.

¹⁰⁸Bumbulvuŋ ɗu, tiɓa diradibiɗ ɗu, kaɓa gwat ngi mikuli, ɓi ɗik ka mujuwa a mevel na, dubuniy di.

¹⁰⁹Mendere a ro kutukuy ndrehhe, amma ɓimujuwa ɗik na, y'anta puyuk di hirnga ta.

¹¹⁰Misi moˀoreheye, a ngam ngamngam le ngi ji ɗu, gar ti nah kwana, gwat ka mawuɗo, yi kirih kileŋ ava ta.

¹¹¹Ɓimuɗuva ɗikeye, i zlili ɗu wãˀa, a giy mumul a mevele.

¹¹²I ra hurdum ngi sipa gwat ka mawuɗo, i migir ɗu, hã ngi sete.

¹¹³I ra hirsa mizli misi kwacay cuw cuwoyo, amma i ra wuɗ ɓimujuwa ɗike.

¹¹⁴Ka, ki li ɗum ɗu, ki mbaray ɗu, i ɗuva wuluko le taˀ ngi kutuko ɓi ɗiki.

¹¹⁵Kum mizli misi moˀorehey, kiraham tivi ya, ɓa i ja ɓimuɗuva ngi Buymisemuŋ ɗu a hirnga.

¹¹⁶Jihiy jah, kaɓa ka miɓa ɗaˀ le na, ɓa i ndir ti siifa, ki puliy ti mesem ar njah hiri ɗu na ta.

¹¹⁷Jihiy jah, ɓa i lihi, yo ɓa i ndir hiri taˀ ar gwat ka mawuɗo.

¹¹⁸Mizli mazizam kileŋ avu gwat ka mawuɗ na, ki ra ɓula taŋ gar avra, asi gwat ngi gi taŋ gar na, i ɓi ngi slir.

¹¹⁹Misi moˀore ngi si ruwuyoyo, ki tiri taŋ zayɓiri le, ya mawuɗ ɓimuɗuva ɗik na vurˀeŋ.

¹²⁰Dum vu ɗu gar ara jijik ti zluwun a mbuŋ ɗike, yo ɓi ka mujuwa a mevel na, ara giy zluwuno ma.

¹²¹Yi ga gwata kaɓa ɓimujuwa ati ɓi mijeŋŋe ɗik mawuɗo, ki puliy mbak da mizli muguzuvur ɗuwoyo ta.

¹²²Ya gawla ɗike, cifi ɗu ar wuya na, biga i gisiŋ, anja mizli muhuhumo vuhoyo, a guzuvurikiy ta.

¹²³Hiri ɗu a gir le wãˀ ngi kutukuw ɓa ki lihiy, waɗ ngi kutuko ɓi micica asi ka mijeŋŋe tuwa.

¹²⁴Ambuh, gi ti ya gawla ɗike, kaɓa gi teŋteŋ ɗik mawuɗ, yo dubuniy gwat ka mawuɗo.

¹²⁵Ya gawla ɗike, vuliy sli wala ngi ɓi, ɓa i si na ɓimuɗuva ɗike.

¹²⁶Bumbulvuŋ ɗu, a ngilaka ɓimujuwa ɗike le, a ndila le ɓa ki gi gwat neˀe.

¹²⁷Vurˀe, i wuɗ ɓimuɗuva ɗike fineˀ ɓiri tapasl tapasl, koɓiri tapasl tapaslmileɗeɗe wãˀ.

¹²⁸Ar ɓi wanaka cek na, i luuma gwat ka wawuɗ gar na, taŋ jeŋŋe, ɓi ngi slir gar na, yi ra hirsaŋ.

¹²⁹Ɓimuɗuva ɗike, i ngi pur hiri ngal ngal, ya maki slimiɗ anga kuy kuy na, vurˀe.

¹³⁰Mbur misla wala ngi ɓi ɗike le na, a lum li minjahha, mizli miteˀteˀhey na, ɓi ɗik a vula taŋ sli wala ngi ɓi.

¹³¹I ra nda mingiɓi ɗike ngbok ngbok nga kwacay, asi may ngi ɓimuɗuva ɗike, ara jiy haɗa.

¹³²Mbuɗo hiri ngir tivi ya, giy mezle, kaɓa ka mujuwa ɓi nah ngi gi da mizli mawuɗokuw na.

¹³³Ciciy zlak gidaŋ gidaŋ ti ɓi ɗik ka miɓa ɗaˀ le, yo ki pula ɓi malambaˀ ko neˀ a finiy gidaŋ ta.

¹³⁴Tuɓo ya avu mizli maguzuvurikiy na, ɓa gwat ka mawuɗ na, i ja a hirnga.

¹³⁵Anja ki puriy ya gawla ɗike ti hiri mezle, dubuniy gwat ka mawuɗo.

¹³⁶Ɓimujuwa ɗike, ya mapura, mizli anta jaka a hirnga ta na, i tuwuy kol kol.

¹³⁷Bumbulvuŋ ɗu, ka jeŋŋe, yo ɓi ka mujuwa a mevel ɗik gar na, taŋ kasl kasla.

¹³⁸Gwat ka mawuɗ cummo, ki ɓa le, i gi jeŋŋe ati gi teŋteŋ ɗik mihaɗa na.

¹³⁹Ya mapura mizli mazliram ti ya tahay mapuykam hirnga ti mingiɓi ɗik na, mevel ara jiy haɗa, ara tiɓi ka vu.

¹⁴⁰Ɓi ɗik, ka miɓa ɗaˀ le na, a bun le ndar wãˀ, ya gawla ɗike, i ra wuɗu.

¹⁴¹Ko ti ya menjeve, hiris le na tekeɗe kwana, yi puyuk hirnga ti gwat ka mawuɗo ta.

¹⁴²Gi jeŋŋe ɗike, i gi jeŋŋe ngi sete, yo ɓimujuwa ɗike, naŋ kaslsla.

¹⁴³Bonoy a lumiy le, yo didak a muɗiy le haɗa, amma ɓimuɗuva ɗikeye, a gikiy mumul.

¹⁴⁴Ɓimuɗuva ɗike, i gi jeŋŋe ngi sete, jiniy ngi sli wala nah, ɓa i ndir ti siifa.

¹⁴⁵Bumbulvuŋ ɗu, i ra ziluw ti mevel purla, ambuh, ziliy mi takwa, ɓa i ja ɓi micica ɗik a hirnga.

¹⁴⁶I ra ziluw, kilo widi ɗu, ɓa i sipa gwat ka mawuɗo cummo.

¹⁴⁷Li muwun t'aruŋ si na, i ra tiluw mi, i ɗuva wuluko le taˀ ngi kutuko mingiɓi ka masa ɓiy di.

¹⁴⁸Duvuɗ mucuh t'aruŋ si na, i wuna hiri le si, ɓa i wuluk ar ɓi micica tuwa.

¹⁴⁹Bumbulvuŋ, ka teŋteŋ, cine ya maziluw na takwa, vuliy siifakaɓa ɓi ka mujuwa a mevel ɗik na.

¹⁵⁰Mizli malambaˀ, misipi ɗuwoy nder nder tayna, ara kirohoko ng'avi ya, taŋ kileŋ avu ɓimujuwa ɗike,

¹⁵¹Bumbulvuŋ, ka na, ka gweˀ avu ya, yo ɓimuɗuva ɗikeye gar, taŋ kaslsla.

¹⁵²Ɓimuɗuva ɗikeye, i si na le zlezle, ki ɗuva taŋ ɓa t'ada ngi sete.

¹⁵³Pura bonoy ya masa na, lihiy ti raŋ, asi ɓimujuwa ɗike, i puyuk di hirnga ta.

¹⁵⁴Ɓi ar ya, yo cik vu a hirnga ɗu, vuliy siifakaɓa ka miɓiy di ɗaˀ le tuwa.

¹⁵⁵Ɓi ngi lihe, naŋ kileŋ avu mizli malambaˀhaya, asi t'anta sipaka gwat ka mawuɗo ta.

¹⁵⁶Bumbulvuŋ ɗu, ki pur ircece haɗa teˀe, vuliy siifakaɓa ka mujuwa ɓi naŋ a mevel ɗike.

¹⁵⁷Misipi ɗuwoy nder nder ati mizli mazliram ti ya tahaya, taŋ mbeˀmbeˀe, amma yi kirih kileŋ avu ɓimuɗuva ɗike ta.

¹⁵⁸Mizli migi mungra madiɗahaya, ɓi micica tuwa, taŋ majaka a hirnga ta na, anta giy kuy ta.

¹⁵⁹Bumbulvuŋ ɗu, gwat ka mawuɗo, kay, i hĩyã haɗa, vuliy siifa a muŋ mbele gi teŋteŋ ɗiki.

¹⁶⁰Gi kaslsla na, i ɗuva virzi ngi mingiɓi ɗike, yo ɓi ka mujuwa a mevel ɗik gar, asi ka mijeŋŋe na, naŋ ngi sete.

¹⁶¹Yarmahay a sipikiy le nder nder manja i gi gwata si, amma magiy zluwun a mevele, sey mingiɓi ɗik tewle.

¹⁶²Ɓi ka miɓa ɗaˀ le na, ara giy mumul, kaɓa mbur mulum zlili le haɗa.

¹⁶³I pura ɓi ngi slire hiris le, a giy kuyta wãˀ, amma gwat ya mawuɗo, i ɓimujuwa ɗiki.

¹⁶⁴Vur hin gar na, i hunumuw is tarnaˀa, asi ɓi ɗik mijeŋŋe, ka mujuwa a mevel na.

¹⁶⁵Mizli mawuɗam ɓimujuwa ɗike, taŋ zuy zuy wãˀ, taŋ na, gwat maga taŋ ngaˀ anta mata.

¹⁶⁶Bumbulvuŋ, ya makutuk avu ka na, ɓa ki lihiy, ɓimuɗuva ɗikeye, i sipa taŋ le.

¹⁶⁷Ɓimuɗuva ɗike, i sipa taŋ le, kay, i wuɗ taŋ haɗa teˀe.

¹⁶⁸Gwat ka mawuɗ ati ɓimuɗuva ɗikeye, i sipa jiviɗ nah le, gwat ya maga gar na, ki ra puraŋ.

¹⁶⁹Bumbulvuŋ ɗu, anja widi ɗu a ndil ngbasl avu ka, vuliy sli wala ngi ɓi kaɓa ka miɓiy di ɗaˀ le na.

¹⁷⁰Anja ya matumbuluw na, a ndil sesẽŋ avu ka, lihiy kaɓa ka miɓiy di ɗaˀ le tuwaŋ.

¹⁷¹Anja irne ɗu a til mi ti hunum ɗike, asi ki ra dubuniy gwat ka mawuɗo.

¹⁷²Anja i hunumuw ti irne ngi balam ɗu, asi ɓimuɗuva ɗikeye, taŋ jeŋŋe gar taŋ.

¹⁷³Tulo haŋ ɓa ki jiniy takwa, asi yi wini nga ya, i gwat ka mawuɗo.

¹⁷⁴Bumbulvuŋ, gwat ya mawuɗ haɗa avu ka na, ɓa ki lihiy, yo magiy mumulo, i ɓimujuwa ɗiki.

¹⁷⁵Ga ɓa i ndir ar li hunum ɗike, yo ɓa ɓi ka mujuwa a mevel ɗik na, a jiniy.

¹⁷⁶I ra liˀi kiŋkiŋ lambaˀ kaɓa tumuŋ miziza le, aru ti supo ya, ya gawla ɗike, asi i puyuk hirnga ti ɓimuɗuva ɗikeye ta.