Read South Giziga PSA 145 Bible Online

PSA 145 - South Giziga bible

PSA 145

¹Dimis ngi hunuma vu. I mulumo di ar ɗerewol ngi Davit. Buymisemuŋ ɗu, Buy madiɗa ɗu, i wuɗ i guw dudok, i wuɗ i guw sise ngi caˀa.

²I wuɗ i guw sise vur hin gar, yo i hunumuw ti dimis ngi caˀa.

³Bumbulvuŋ naŋ madiɗaŋ, a ndila le wãˀ ngi hunumo, madiɗa naŋ na, gwat ngi wa ti naŋ anta.

⁴Gwat ka miga na, mizli masa ya ka taŋ, a sa ɓaka ɓi nah nga mbuŋ nga mbuŋ, a sa tilam mi ti ɓi ngi gwat madiɗahay, ka miga taŋ.

⁵I sa mahiri ngi ɓa ɓi ngi cekene ɗikeye, ngi dudok ɗik ati ngi wucuɗ ɗiki.

⁶A sa ɓaka ɓi ngi gidaŋ ɗik ngi gi gwat migam ɗaˀ tahaya, yo i sa slufa ɓi ngi gwat madiɗahay, ka miga taŋ.

⁷A sa wulkam keŋ ar gi mezle ɗikey mihaɗa na, a sa jam salalay vur gi jeŋŋe ɗike.

⁸Bumbulvuŋ naŋ ti mevel mezleŋ, yo a pur ircece haɗi, a ji mevel kutum ta, yo naŋ teŋteŋ haɗa.

⁹Bumbulvuŋ naŋ mezle avu mbur gar, gwat naŋ miga taŋ gar na, a wuɗ taŋ.

¹⁰Gwat ka miga taŋ gar na, a hunumukuw jom arleˀe, Bumbulvuŋ, yo mizli miteŋteŋ ɗikey a gukuw sise.

¹¹A ɓaka ɓi ngi zumabuy ɗik misi dudoko, yo a ɓaka ɓi ngi gwat madiɗahay, ka miga taŋ.

¹²Gwat madiɗahay, ka miga taŋ waɗ zumabuy ɗik misi ti dudoko, a sa njikaka taŋ da mizli.

¹³Zuma buy ɗike, i zumabuy makiɗ mi ta, gidaŋ ɗik ngi zuma buyo a ndir ngi sete. Bumbulvuŋ naŋ kaslsla, naŋ teŋteŋ ar gwat ngi gi naŋ gar.

¹⁴Mizli mandilam gar na, Bumbulvuŋ a jaha taŋ jah jah, mizli mugurjoŋ gurjoŋ gar na, a cica taŋ cir cir.

¹⁵A roko hiri taˀ taˀ avu ka, hiri njah njah asi ka, ɓa ki vula taŋ gwat ngi zumo kasl angi may taŋ.

¹⁶Ka muwuna taŋ haŋ ɗike le baŋ na, gwat misi titirihey, ka mawuɗ taŋ gar na, a mbam pecek.

¹⁷Bumbulvuŋ naŋ jeŋŋe angi slra naŋ gar, naŋ teŋteŋ ar gwat ngi gi naŋ gar.

¹⁸Bumbulvuŋ naŋ gweˀ avu mizli gar mazilakaŋ, gweˀ avu mizli gar mazilakaŋ ti mevel purla.

¹⁹Mizli mazluwunam di na, a ga taŋ gwat taŋ mawuɗama, taŋ mitilakaŋ mi le til si na, a cina, a laha taŋ.

²⁰Bumbulvuŋ ara jigina ngama naŋhaya gar, amma ara susuyumo misi moˀoreheye gar.

²¹I hunuma Bumbulvuŋ ti dimis, yo gwat misi titiri gar, a ga sise da Bumbulvuŋ mipal na, ngi caˀ kine.