Read South Giziga PSA 146 Bible Online

PSA 146 - South Giziga bible

PSA 146

¹Haleluya, yawwa Bumbulvuŋ! I wuɗ i ga dudok da Bumbulvuŋ!

²I wuɗ i ga dudok da Bumbulvuŋ ar siifa ɗu gar. Ya misi ada aruŋ na, i hunuma Buymisemuŋ ɗu ti dimisi.

³Ki njaham hiri asi mizli micawwahaya ta, taŋ i mizli ngataraŋhay malaham vu gu ta.

⁴Da taŋ mumicam le na, a tiram murɓuk a muŋ, yo diga tapasa, a dikaka taŋ jom ati gwat taŋ muwulkaka zleˀe ngi gi.

⁵Mbur misi mijini ˀis naŋ i Buymisemuŋ ngi Zakop, yo muɗuva wuluk naŋ le taˀ asi Bumbulvuŋ, Buymisemuŋ naŋ na, a mumul!

⁶I Buymisemuŋ miga muŋ ati hirwuyo, mubuliy waɗ gwat ngi raˀahay gar. I njaham hiri njah ngi wãˀ aseˀe gu.

⁷A ra ga jeŋŋe da mizli muguzuvuraˀahaya, ara vula gwat ngi zum da mizli muroko ti maya. Bumbulvuŋ ara laha mizli mujuwahaya.

⁸Bumbulvuŋ ara wuna hiri ngi dangaraya, Bumbulvuŋ ara slikiɗa mizli mugurjoŋ gurjoŋhoyo cir cir, Bumbulvuŋ ara wuɗ mizli mijeŋŋeheye.

⁹Bumbulvuŋ ara cik vu a hirnga mizli muɓulahaya, ara jaha wudiga ati mutuhoyo jah jah, Amma gwat mizli misi moˀorehey muwulkaka le ngi gi na, a hirya avra.

¹⁰Siyoŋ, Bumbulvuŋ i buy madiɗa ngi sete, i Buymisemuŋ ɗik ngi caˀa, ngi samadin. Haleluya, yawwa Bumbulvuŋ.