Read South Giziga PSA 148 Bible Online

PSA 148 - South Giziga bible

PSA 148

¹Haleluya, yawwa Bumbulvuŋ! Hunumaka Bumbulvuŋ zle a muŋ, kum misi a muŋ a diga hunumakaŋ.

²Kum modro naŋ ngi muŋhoy gar, hunumakaŋ, kum soje naŋhay gar, hunumakaŋ.

³Pas ati kiya, hunumakaŋ, kum wurzlaŋhay gar mawucuɗam, hunumakaŋ.

⁴Kum misi sesẽŋ a muŋ, hunumakaŋ, yo kum yamay misi ar birngiŋ ngi muŋ na, hunumakaŋ ya.

⁵Anja taŋ gar a hunumaka Bumbulvuŋ ti zila slimiɗ naŋ, asi a ɓi ɗaˀ purla si na, joˀ gwatay a gam si.

⁶A cifa taŋ ar li taŋ ar li taŋ ngi sete, a ɗuva taŋ ɓi ngi pul mbak le ta.

⁷Hunumaka Bumbulvuŋ zle a ruwuy, mubuliy ati gwat madiɗa ngi si yamay, hunumakaŋ.

⁸Vu ati yam mapo buk buk, kutuɓ ati mulbuɗ, burkataŋ gambara, kum macinakaŋ mi na, hunumakaŋ.

⁹Muwãhay ati li ɗigaray gar, widis mayamay ati miterey gar,

¹⁰yo gwat ngi ɓuhoy ati gwat misãmihey gar, makurmuɗom ti kwacay ati ɗiyuwoy, hunumakaŋ.

¹¹Buy madiɗa ngi si ruwuyoy ati mizli gar, yarmahay ati buy ngi ruwuyoy gar,

¹²kum gawla ati diilihey, midigilahay ati ziriy, hunumakaŋ.

¹³Anja a hunumaka Bumbulvuŋ ti zila slimiɗ naŋ, asi slimiɗ mihirnga inga naŋ pal naŋ, ara zum buy a hirnga muŋ ati ruwuyo.

¹⁴A vula gidaŋ le da mizli naŋhaya, ɓa a ram hirnga kaˀ a muŋ. a ɗuva hirnga le da mizli miteŋteŋ naŋhaya, da sukwi Israyel gar, mizli migweˀ gweˀ avaˀahay. Haleluya, yawwa Bumbulvuŋ!