Read South Giziga PSA 17 Bible Online

PSA 17 - South Giziga bible

PSA 17

¹Dira dibiɗ ngi wuzla dir dibiɗ ngi Davitey. Ya maɓuw ɓi ɗu mijeŋŋe na, Bumbulvuŋ ɗu ciniy di. Ya matuwuy na, cine kuy kuy, jika slimiɗ asi diradibiɗ ɗu, a bo tir mevel ɗu migisiŋ gisiŋ.

²Anja kiita ɗu a gi a mihiri ɗiki, gwat mupula jiviɗ nah le na, i ka mapura ti hiri ɗike!

³Ki wunjula mevel ɗu le, ki jiɗiy le ngi duvuɗo, ki puliy le ar bonoy ɓa ki puriy, ko ki lum ɓi neˀ avu ya ta. Gwat ya muwulka na, i ɓo di ta.

⁴Ɓa ngi wurka mburo weˀe asi mi mabo ti balam ɗike na, ya ti haŋ ɗu, i jiɗa gwat ngi gi ngi mbur maziriɗ mi le.

⁵I sipa sar ɗike le, ko i ngizli ta.

⁶I ra ziluw Bumbulvuŋ ɗu, asi i si na le, kisa ziliy mi. Juko slimiɗe ng'avi ya, cine mingiɓi ɗu!

⁷Biga teŋteŋ ɗik mihaɗi na, ka malaha mikila ti kiley, a laham le avu mipi hiriheye ti gidaŋ ɗiki.

⁸Jiginiy kaɓa zingaˀ ngi hiri ɗiki, ɗumiy asi kirpasl ɗiki,

⁹kileŋ avu misi moˀorehey mivikiy gwatay na, yo avu mesene migi mungra madiɗahay magunikiy na.

¹⁰Ircece anta neˀ le a mevel taŋ ta, mi taŋ a ɓi ɓi ngi huhumo vu.

¹¹Tˀani ara jam ndra sar, wurenna ara gunikiy, hiri taˀ taˀ angi ya, ɓa a zlumburikiy.

¹²Taŋ rak rak ati mobor mawus vu nga ji gwat, rak rak ati gwat maji vu magurbuˀ ngi ji gwata.

¹³Slikiɗ Bumbulvuŋ, ara zliram dibiɗ ati mesene ɗu, mbursla mbrasl mbrasla! Lihiy avu mbur misi moˀore ti maslalam ɗik na!

¹⁴Bumbulvuŋ, anja ki ɓula taŋ ti wuzla mizli ti haŋ ɗike, bi taŋ avraˀ ti wuzla mizli waɗ tir duniya. Lum nga taŋ, ar taŋ misi ti siifa na, i hana! Mba taŋ ti gwat ka miwa taŋ di vu na! Anja ziri taŋhay a mbam di ndeŋ ndeŋ, yo ɓa is naŋ a ndir da dideˀ taŋhay.

¹⁵Amma nga ya, naŋ kaslsla, i sa pura hiri ɗike, ya masa puɗuk na, i sa puruw hiri ngal ngal.