Read South Giziga PSA 18 Bible Online

PSA 18 - South Giziga bible

PSA 18

¹Dimis ngi wuzla dimis ngi Davitey, Davit gawla ngi Bumbulvuŋ. I mulumo di ar ɗerewol ngi buy dimis. Davit a ɓa ɓi hana da Bumbulvuŋ, ti naŋ muloho di tivi mesene naŋhay gar waɗ tivi Sawul.

²A ɓi: I wuɗuw Bumbulvuŋ ɗu, mavuliy gidaŋ i ka.

³Bumbulvuŋ i mandazlay muwã ɗu, li ɗu mandilam ara ti tuwaˀa. I milih ɗu, i Bumbulvuŋ ɗu, i mandazlay muwã ɗu ya maɗum ara, i mbaray ɗu, gwat ngi vurum ɗu ya malum di bugawla, yo walahay ɗu migidaŋ ngi ɗum ara.

⁴I ra hunumuw Bumbulvuŋ ɗu, i ra ziluw, yo i tikaˀay le da mesene ɗuwoyo.

⁵Muc a juwiy le si. A giy zluwun le gurjik, kaɓa mizaw muzuɓ le, mahirya gwat.

⁶Li ngi mizli mumucahay a guniy le ti zeweɗ naŋ. Diɓel ngi muco a ro kaˀ a mbuŋ ɗu.

⁷Ar bonoy ɗu, i zila Bumbulvuŋ ɗu le, yo i widi le ng'avu Bumbulvuŋ ɗu. A cino ˀay ɗu le tir hay naŋ. Ya mihizigaŋ widi na, a ci le a slimiɗ naŋ.

⁸Ti Bumbulvuŋ miji mevel na, hirwuy a zla jijik. Si virzi ngi muwãhay a zlaka hurum, a suwuɗam.

⁹Cunju a bo sẽwwe ti hutuŋ naŋ, vu munjulili a bo ti balama, jom ati zayvu mihilɓiɓ.

¹⁰Bumbulvuŋ a wucaha muŋ wucah, a po sar, gazlavay mihindiˀil asi sara.

¹¹A slikiɗ nga muŋ, ar mota ngi kerubeŋhey a bula muŋ satatata, ar kirpasl ngi himiɗi.

¹²A ɗum ar luvuŋ, gazlavay miɗak ɗak, i li cifi naŋ: i luvuŋ titra, kaɓa gazlavay migingiliw gingiliw, mijirngasl jirngasl.

¹³Li a gi njahha a mbuŋ naŋ, joˀ gazlavay a cuh sikikiki, jom ati yam waɗ zayvu mihilɓiɓ!

¹⁴Bumbulvuŋ a ga ɓa vuŋ a tuwuy Bumbulvuŋ Mifineˀ gwatay gar a bo ti ˀay kaˀ, dar yam waɗ zayvu mihilɓiɓ a boko.

¹⁵A laha luvuto ɓaˀ li, vuŋ a wucuɗ haɗa, a zliɗa hirnga ngi meseneheye mber mber.

¹⁶Bumbulvuŋ, ka mika buc, musuwun mabo fir fir ti hutuŋ ɗik na, a bo tisi virzi ngi yamaya ar li babaraŋ, yo ɗuva virzi ngi duniya a njiko vu le.

¹⁷A tilo haŋ zle ti muŋ, a jiy, a sulumo ya tir yam madiɗa.

¹⁸A loho ya tisi haŋ ngi mesene ɗu migidaŋ haɗi, tivi mizli mazliram ti ya ta, mizli tayna migidaŋ haɗi fineˀ ya.

¹⁹Tapas ya mihĩhĩy na, a zliram dibiɗ le ti ya, amma Bumbulvuŋ a so jihiy jah.

²⁰A bo ti ya tir bonoyo, i luuma hirnga ɗu le aseˀeŋ, a lihiy le, asi naŋ mawuɗiy.

²¹Bumbulvuŋ a gi ti ya weˀe avu gi jeŋŋe ɗu. A gi ti ya weˀe asi ya mici ar dili ta.

²²Asi yi sipa jiviɗ ngi Bumbulvuŋ le, i zluɓ ɓi avu Bumbulvuŋ ɗu ɗaˀ ta.

²³Ɓi naŋ mujuwa taŋ gar na, i ja taŋ le a hirnga, yo ɓi naŋ muɗuva taŋ na, i pula taŋ ta,

²⁴yakaslsla ava, yo i jigina vu ɗu le avu gwat malambaˀ gar.

²⁵Joˀ Bumbulvuŋ a wurkiy weˀe avu gi jeŋŋe ɗu, weˀe avu ya maga gwata, naŋ mapura naŋ kasl kasl na.

²⁶Bumbulvuŋ, ka teŋteŋ avu mbur miteŋteŋ avu ka, kakaslsla avu mbur mikaslsla avu ka.

²⁷Ka ti mevel mezle, avu mbur misi mevel mezle, amma ka ti wer haɗi, avu mbur misi moˀore.

²⁸I ka maga ɓa mizli mihina hirngahay a lumam bugawla, yo i ka mapa mesem da mizli muhuhumo vuhoyo.

²⁹Lampe ɗu magiy li njahha i ka. Bumbulvuŋ ɗu, Buymisemuŋ ara ciɗika luvuŋ ya misi ara.

³⁰Ya matuwuɗa vigiɗey na ati ka, yo ya makita mohol na, ati ka Bumbulvuŋ ɗu.

³¹Jiviɗ ngi Bumbulvuŋ hana, naŋ ɗalla, mingiɓi ngi Bumbulvuŋ a bun le ndar. Bumbulvuŋ i mbaray ngi mizli maɗumom ava gar.

³²Bumbulvuŋ, mbak Buymisemuŋ le na, i waka? Mandazlay, mbak Bumbulvuŋ ndra le na, i wa maka?

³³I naŋ mavuliy gidaŋ ngi gi gwata, a ɗiyiy jiviɗ ɗu ɗalla,

³⁴yo a tiri ti ya ɓa i jiɗ ka muuni, a ciciy gidaŋ gidaŋ ɓa i ndir deŋ ti deŋ.

³⁵A ra sirikiy kiɗa vu, yo ara jiniy ɓa i hila lek ngi ɓiri gaza kuy kuy.

³⁶Bumbulvuŋ, ki vuliy mbaray ɗike le ngi luuma bugawla, gidaŋ ɗik a jihiy le jah, ka mapuˀiy paˀ paˀ na, ara tiri ti ya mbur micawwa.

³⁷Ki ra murɗiy sara, ɓa i kil kutum kutum, yo hiri sar ɗuwoy a roko gidaŋ gidaŋ.

³⁸I gidiɗa mesene ɗuwoyo hã i ja taŋ, y'anta mo ta, sey da ya mikiɗa mi taŋ le.

³⁹I kiɗa taŋ kuros kuros, ko a slikiɗam gu mata, t'ada ɓaˀ ɓaˀ asi sar ɗu.

⁴⁰Ki ra vuliy gidaŋ ngi kiɗa vu, mizli mapikiy hiri, ki musla taŋ le masl masl, t'ani asi sar ɗu.

⁴¹Ki ga ɓa i ka mesene ɗuwoy a mbuŋ, yo mizli mazliram ti ya ta na, ɓa i tika hutuŋ taŋ wãˀ.

⁴²A ra wudam: gawla kilawa, amma ko mbur makil widi taŋ anta. A ra tilaka mi da Bumbulvuŋ, amma ko naŋ anta mbiɗa taŋ di ta.

⁴³I tiri taŋ lagwada, ɓa himiɗ a kil taŋ. I kulpa taŋ kaɓa ndileɓ ar buwal.

⁴⁴Ki ra tiɓiy avu mizli mislikiɗa ɓihey, ki cifi ti ya madiɗa a hirnga sukwi ngi mizli ngi si ruwuyoy gar. Mizli ya misina taŋ ta, ara gam gawla ɗu.

⁴⁵Ya miɓi le ɗaˀ si na, a cinikiy mi. Mizli mulakay ara gam modro ɗu.

⁴⁶A ra zluwunam, ara boko tir hay taŋhaya ti jijiki.

⁴⁷Yawwa Bumbulvuŋ ɗu misi ti siifa! Sise da ka mandazlay muwã ɗu! Bumbulvuŋ miviliy bugawla na, anja a pa hirnga da mizli.

⁴⁸I Bumbulvuŋ mapuliy jiviɗ ngi pula cuwala, yo a ga mizli cunuˀ cunuˀ a mbuŋ ɗu.

⁴⁹Ki ra tiɓiy avu mesene ɗuwoyo wãˀ naŋ na, ki ra ga ɓa i pa hirnga da mizli mapikiy hiri, yo ki ra lihiy avu mizli misi moˀoreheye.

⁵⁰Yo ma na, Bumbulvuŋ, i ra guw sise a wuzla sukwi gar, yo i ra zluw dimis hĩˀĩ ngi hunum ɗiki.

⁵¹Bumbulvuŋ ara vula gi bugawla haɗa da buy naŋ madiɗa, ara gi teŋteŋ avu buy, naŋ muwunaŋ, waɗ avu Davit ati tizer naŋ hã ngi sete.