Read South Giziga PSA 19 Bible Online

PSA 19 - South Giziga bible

PSA 19

¹Dimis ngi wuzla dimis ngi Davitey. I mulumo di ar ɗerewol ngi buy dimis.

²Muŋ ara slufa ɓi ngi dudok ngi Buymisemuŋ, birgiŋ ngi muŋ, ara til mi ti slra Buymisemuŋ miga ti haŋ naŋ.

³Papas misi dana, ara ɓa ɓi nah da papas misi tipriki, yo duvuɗ misi dana, ara ɓa ɓi nah da duvuɗ misi tipriki.

⁴I kiɗa slir ta, ɓi miɗaˀ ɗaˀ anta, ˀay taŋ anta cin ta.

⁵Mingiɓi taŋ, a tisla ruwuyo le kurzluˀ, yo kiɗa slir taŋ a ndil le sesẽŋ avu duniya mira kiɗ mi. A muŋ a diga, Buymisemuŋ a ɗiyi guɗuk le da pasa.

⁶A bam vu le ati gawla muɗuv ngwas wureˀ, mabo ti viŋ naŋ, makil haɗi, mamumul ngi pi mi.

⁷Pas a bo fõõt tisi diˀisi, a ru, hã ara ndil tir vay mekelem, ko gwat mandir loŋ manja a naˀaŋ na, anta.

⁸Ɓimujuwa ngi Bumbulvuŋ naŋ manja hereweɗe, a vula siifa da mburo, a vulaŋ di, a vulaŋ di. Ɓi Bumbulvuŋ muɗuva le na, naɓa i gisiŋ, a vul sinmijileŋ da mbur misin ɓi ta.

⁹Gi gwat Bumbulvuŋ mawuɗo, i gi gwat mijeŋne, a vula mumul da mbur a mevele, ɓimuɗuva ngi Bumbulvuŋ, i mubuna le ndar, a guw hiri ɗeŋ ɗeŋ.

¹⁰Zluwun ti Bumbulvuŋ i gwat minjah wãˀa, naŋ da nga naŋ nga naŋ ndrehhe, ɓi Bumbulvuŋ mujuwa le ngi gi gar na, i ɓi mikaslsla, yo naŋ jeŋŋe.

¹¹I ngi hiyĩ haɗa fineˀ ɓiri tapasl tapasl, yo fineˀ ɓiri haɗa,ɓiri tapasl tapaslmihirnga, naŋ ndum haɗi fineˀ mam, fineˀ mam mumuɗa wureˀ aruŋ.

¹²Buymisemuŋ, mingiɓi ɗik a vuliy ji lesl le da ya gawla ɗike, da i ja ɓi nah le a hirnga na, i cir haɗi ti seˀeŋ.

¹³Mbur gar a gi gwat malambaˀ manja a sinaŋ, puliy mungra ɗuwoy, ya misina taŋ ta na!

¹⁴Girjihiy ya gawla ɗike kileŋ avu mizli muhuhumo vu tayna ma, anja a lumam gidaŋ ar ya ta, ɓa yi sa tiri manja hereweɗ, yo manja gi gwat malambaˀ madiɗaŋ.

¹⁵Bumbulvuŋ ɗu, gidigil muwã ɗu, micika vu a hirnga ɗu mingiɓi ngi balam ɗu ati ɓi miyaŋŋa ngir mevel ɗu, anja mevel ɗik a hĩyã na kuy.