Read South Giziga PSA 2 Bible Online

PSA 2 - South Giziga bible

PSA 2

¹Mizli a wusam haɓar haɓar vur mike? Sukwi ngi mizli a gam gidiɓi lambaˀ vur mike?

²Buy madiɗa ngi si ruwuyoyo, ara slikiɗam ɓi ngi gi vurum. yo mizli micawwahaya, ara gam gidiɓi ar Bumbulvuŋ waɗ ar mbur naŋ muwunaŋ na.

³A ɓam: «Gwat majumo ndra ati taŋ na, mburcukum di, purtukum dambla taŋhay na, huzugukum taŋ avra.»

⁴Buymisemuŋ mua muŋ, ara singir, Bumbulvuŋ ara singir ar taŋ.

⁵Akẽh na, a ɓa taŋ ti himaˀ, joˀ himaˀ naŋ mufõh fõh tuwa, a ga taŋ zluwun.

⁶A ɓi: «Ya i ca buy ɗu madiɗa le a Siyoŋ, Siyoŋ, muwã ɗu mipal.»

⁷Ya buy madiɗa, i sa til mi ti ɓi micica, Bumbulvuŋ a ɓiy na: «Ki mangal ɗu, i yuw le nga dana.

⁸Cufuɗiy, yi sa vuluw sukwi ngi mizli gar da ka, ɓa ki wa taŋ, yo hirwuy kuɗgulum gar i ngi ɗiki, ɓa ki waŋ.

⁹Ki sa tika taŋ ˀay ti ganday ngi ɓiri ngi buyoy, yo kisa waha taŋ meɗ meɗ, kaɓa mawaham magayaka.»

¹⁰Na wurenna so na, kum buyoy, jam lesle. Migi kiita ngi si ruwuyoy, mbak mizli a kutukum.

¹¹Gaka slra ngi Bumbulvuŋ ti zluwun, zluzluɓam ti jijik kirkir.

¹²Vulaka dudok da mangala, da kanah ta na, a sa ji mevel, dar kisa zizam a jiviɗe, asi mevel a jaŋ kutumo si. Mizli maɗumom ava gar na, a mumulom.