Read South Giziga PSA 22 Bible Online

PSA 22 - South Giziga bible

PSA 22

¹Dimis ngi wuzla dimis ngi Davitey. I mulumo di ar ɗerewol ngi buy dimis. A ɓi ɓi a hirnga «pas mezle mubo avu muuni.»

²Bumbulvuŋ ɗu, Bumbulvuŋ ɗu, ki puliy fuk vur mike? I widi, i widi, amma ko i lum kila widi ng'avi ya ta.

³Bumbulvuŋ ɗu, i ra ziluw ti papasa, amma ko k'anta ziliy mi ta, yo ti duvuɗo ma, ko y'anta lum musuko vu ta.

⁴Dambalaka ki Bumbulvuŋ mipal kine, ki ro joˀ, Israyeley anta pulaka hunum ɗike mbak le ta.

⁵Dideˀ ndrahay a njaham hiri le asi ka, taŋ minjaham hiri asi ka na, ki cuko taŋ le tir bonoyo.

⁶A tulukuw mi le, yo ki laha taŋ le, a njaham hiri le asi ka, yo ki pa taŋ mesem ta.

⁷Amma ya, yi muzurɗuɗuy, yi mbur mata, mizli ara zikiy, duniya gar ara hirsiy.

⁸Mizli mapurikiy gar na, ara singiram ar ya, a singiram kraw, a hizigiɗam hirnga.

⁹A ɓam: «A mbiɗi hiri le ng'avu Bumbulvuŋ ma na! Anja a cukoŋ so, Bumbulvuŋ ara wuɗaŋ ta kwa? A lahaŋ so ta!»

¹⁰Bumbulvuŋ, i ka mubo ti ya ti kwacay maha, yo ki wi vu le ti ya gumbuˀ a didak naŋ.

¹¹Diga miyikiy cak si na, a vulikiy da ka, zle ti ya misi a kwacay maha na, Bumbulvuŋ ɗu i ka!

¹²Ki cifi kileŋ avu ya ta, asi ɓi a wuɗ a lumiy gweˀe, yo mijini ɗu anta.

¹³Mesene ɗuwoyo, a roko ka gusoŋhoy mbeˀ mbeˀ, gun hirnga ɗu, gwat misãmi ngi Basaŋhaya, ara gunikiy.

¹⁴A wunaka me ng'ar ya, kaɓa mobor miji vuhoy matuwam.

¹⁵Gidaŋ ɗu a tiki le, kaɓa yam mahisiki, hirzlik ngi vu ɗuwoy gar a wuzluram le. Mevel ɗu a tiri le kaɓa tebeɗ, ara luwusl a kwacay ɗu.

¹⁶Mumburlok ɗu a muˀul le kaɓa gaˀay, ˀirne ɗu ara ngbuˀ a balama, ki kiy le ɓaˀ a mi zivi.

¹⁷Mizli malambaˀhay ara gunikiy, mizli misi moˀore ka kiri tayna, anta pulikiy li feŋ ta, a slinikiy haŋ ati saraya le njoŋ njoŋ.

¹⁸I zih haɗi, tesl ngi vu vu ɗu, a sluf slaf slafa, mesene ɗuwoy ara purikiy cum cum.

¹⁹A ra wunkaka zana ɗuwoy ar wala taŋ, yo ara zumaka taŋ ti caca.

²⁰Amma ka, Bumbulvuŋ, ki cifi kileŋ avu ya ta! Aw Bumbulvuŋ gidaŋ ɗu, so jiniy! Wuso vu!

²¹Lihiy avu ngum ti maslalama, yo jigina siifa ɗu avu misi sliŋ ka kiri tayna.

²²Tuɓo ya a mi taŋ misi kaɓa ngi mobor na, yo waɗ avu himaˀ taŋ misi kaɓa ngi durum ngi bagalaf na. Yawwa, ki ziliy mi le!

²³I wuɗ i til mi ti ɓi ɗike da sukum ɗuwoyo, i wuɗ i hunumuw a wuzla zigiduw.

²⁴Kum mazluwunam ti Bumbulvuŋ na, hunumakaŋ! Kum sukwi ngi Zakop gar, gakaŋ dudok! Kum sukwi ngi Israyel gar, jijikam a mbuŋ naŋ!

²⁵Mbur muvuso misi ar bonoyo, naŋ anta ɓulaŋ avra ta, naŋ anta hirsaŋ ta, naŋ anta ɗum di ta, da ara tilaŋ mi na, a cinaŋ di.

²⁶Bumbulvuŋ, ya mahunumuw gu a wuzla kus madiɗa na, mbele ka! I ja mi ɗike, daˀ a mbuŋ mizli mazluwunam ti kahaya.

²⁷Mihina hirngahaya, ara zumam, hã a mbam, mizli masipaka Bumbulvuŋ, ara hunumakaŋ: Anja a mumulom, yo a ndiram hutuŋ subur!

²⁸Anja mizli ngi si ruwuy keɗeɗe gar, a wulkam keŋ angi Bumbulvuŋ, yo a moko ng'avaŋ. Anja sukwi ngi mizli gar, a a hurkom huruk huruk a mbuŋ naŋ.

²⁹Zuma buy i ngi Bumbulvuŋ! A wa sukwi ngi mizli ngi si ruwuyoyo gar.

³⁰Mizli muroko ar ndum a ruwuyo, ara zumam, a roko durus durus a mbuŋ naŋ, mizli mamicamay gar na, ara huruk hurukam a mbuŋ naŋ! Anta pula taŋ ti siifa ta.

³¹Tizer taŋ a sa gi gawla ngi Bumbulvuŋ, a sa ɓaka ɓi ngi Bumbulvuŋ da ziri migweneheye.

³²A sa til mi ti ɓi mijeŋŋe ngi Bumbulvuŋ, yo gwat Bumbulvuŋ miga na, a sa ɓa da ziri, naŋ masa ya taŋ.