Read South Giziga PSA 25 Bible Online

PSA 25 - South Giziga bible

PSA 25

¹Dimis ngi wuzla dimis ngi Davitey. Bumbulvuŋ ɗu, i mbiɗi hiri le ngir tivi ka.

²Bumbulvuŋ ɗu, i ro hiri njah asi ka, ki piy mesem ta! Anja mesene ɗuwoy a pikiy hirnga ta!

³Asi mizli muroko hiri njah vur ka gar na, ko mindir ti mesem pal asi taŋ anta, amma mizli mavulukuw ngi ji gar na, a pam mesem le, a ndiram haŋ njoŋ ngataraŋ.

⁴Bumbulvuŋ ɗu, bigiy jiviɗ ɗike, yo dubuniy sipi jiviɗ ɗike.

⁵Aru ti ya ng'ar ɓi mikaslsla ɗiki, yo dubuniy gi gwat ɗikeye, asi ki Bumbulvuŋ milih ɗu, i ro hiri njah asi ka ndrehhe.

⁶Bumbulvuŋ, wuluk keŋ ar wuɗa vu ati gi teŋteŋ ɗik, ka mira go di diga zlezle na.

⁷Mungra ɗu ati malambaˀ ɗu, ya mugo taŋ ti zuŋ na, ki wuluk ar taŋ mata, wuluk ar ya ti gi teŋteŋ ɗik na, asi ka Bumbulvuŋ, ki migi mezleŋ.

⁸Bumbulvuŋ naŋ mezle haɗa, yo naŋ kaslsla wãˀ, anja a biga jiviɗ da migi mungraˀahaya.

⁹Naŋ, aru ti mihina hirngahaya ng'ar gi gwat mijeŋŋe, yo a dubuna taŋ gi gwat naŋ mawuɗo.

¹⁰Mizli majaka ɓi ngi jumoˀay ngi Bumbulvuŋ a hirnga na, jiviɗ ngi Bumbulvuŋ gar, i gi teŋteŋ, yo i ɓi mikaslsla avu taŋ.

¹¹Bumbulvuŋ ɗu, puliy mungra ɗu mimadiɗa na so, vur dudok ɗik na!

¹²Da mbur ara zluwun ti Bumbulvuŋ na, Bumbulvuŋ a bigaŋ jiviɗ ngi zuɓo.

¹³Yo mbur nana, a sa mumul, yo ziri naŋhay a sa waka ruwuyo.

¹⁴Bumbulvuŋ a pula vu naŋ mbak da mizli mazluwunam di, a dubuna taŋ ɓi ngi jumoˀay naŋ.

¹⁵Hiri ɗu a ro taˀ ndrehhe angi Bumbulvuŋ, asi ara purutiy saraya tir ngamngama.

¹⁶Mbuɗo hiri ngir tivi ya, puriy ircece, asi ya pal ɗu, ya mi joh a mi liwisi.

¹⁷Like, a wuɗ a finiy gidaŋ, bo ti ya tir bonoyo.

¹⁸Pura bonoy ɗu ati gir ɗu, puya mungra ɗuwoyo cek avra!

¹⁹Mesene ɗuwoyo t'ani haɗi, pura ara hirsikiy, yo ara gikiy moˀore.

²⁰Cik vu angi ya, yo lihiy! I tiri ti ka li ɗum ɗu le, ki piy mesem ta!

²¹I ra njih hiri asi ka, ɓa ki jiginiy, i ndir kaslsla, manja zluɓa ɓi.

²²Aw Bumbulvuŋ ɗu, laha Israyele! Lahaŋ avu bonoy naŋhay gar.