Read South Giziga PSA 27 Bible Online

PSA 27 - South Giziga bible

PSA 27

¹Dimis ngi wuzla dimis ngi Davitey, Bumbulvuŋ i li minjahha ɗu, yo i milih ɗu, i zluwun ti wa aruŋ maka? Bumbulvuŋ i micika vu ar siifa ɗu, i jijik a mbuŋ wa aruŋ maka?

²Da misi moˀorehey, a zlikiy le ɓa a puwikiy na, sar mabi, yo mandilam tehhe a muŋ na, i taŋ mesene ɗuwoy ati mizli mazliram ti ya ta tayna.

³Da sojehey a soko le taˀ vurum ng'ar ya kwana, y'anta zluwun neˀ a mevel ɗu ta. Ko da kiɗa vu a zli le kwana, i pula vu ɗu mbak da Bumbulvuŋ.

⁴Gwat ya macufuɗ avu Bumbulvuŋ, naŋ purla si, yo i hurdum di hirdam: i wuɗ cifi a hay Bumbulvuŋ ar hin ngi siifa ɗu gar, ɓa i singila kuy ngi Bumbulvuŋ, yo ɓa i ki slimiɗ ar hay naŋ.

⁵Asi da hin mutuwaˀ a ndilo le na, a ci ti ya ng'ar hay naŋ, a ɗumiy ɗum ar li miyaŋ ngir guɗuk naŋ, yo a ciciy deŋ ar gidigil muwã.

⁶Wurenna, ya dum hirnga ngi mesene ɗuwoy mugunikiy gun na. Ar guɗuk naŋ, i vulaŋ gwat ngi mikuli ti ji salalay, yo i zlaŋ dimis ngi hunumaŋ.

⁷Bumbulvuŋ ɗu, cin ya maziluw ˀay ngar ngar na! Mbiɗiy di, asi ka ma pur ircece na.

⁸Ki ɓi le: «Mbuɗoko hiri ng'avi ya.» I ra wuluk araŋ. Naŋ kine Bumbulvuŋ, i ra mbiɗa hiri ng'avi ka.

⁹Bumbulvuŋ milih ɗu, ki mbiɗiy duba ta, ki baˀa gawla ɗike ti mevel ta! Ka mijini ˀis asi ya na, ki cuh ta, ki puliy fuk ta.

¹⁰Baha ati maha a pulikiy le fuku, amma Bumbulvuŋ a zuɓiy le da naŋ.

¹¹Bumbulvuŋ bigiy jiviɗ ɗike, ko da mizli ara cikiɗikiy kwana, aru ti ya ng'ar jiviɗ mezleŋ.

¹²Ki vuliy asi haŋ ngi mesene ɗuwoy ta, asi sedewo misi slirey, ara kupikiy ɓi, yo a wuɗam a gucikiy mi.

¹³Yi si na le gisiŋ, i sa pura mezle ngi Bumbulvuŋ maga angi hirwuy ndra mazikam anga ani na.

¹⁴Njih hiri njah asi Bumbulvuŋ, cici zlak, yo tum vu tum, njih hiri njah asi Bumbulvuŋ.