Read South Giziga PSA 32 Bible Online

PSA 32 - South Giziga bible

PSA 32

¹Dimis ngi wuzla dimis ngi Davitey. Mbur Bumbulvuŋ muzuɓaŋ malambaŋ naŋ le avra, yo mupulaŋ mungra naŋ le na, a mumul!

²Mbur Bumbulvuŋ mapura malambaˀ naŋ ka ɓi ta, yo wuluk ngi hul anta ava ta na, a mumul!

³Vur hin gar, da ya muro teˀ teˀ na, dumvu ɗu ara hĩhĩy ti niˀici.

⁴Asi duvuɗ ti papas gar na, haŋ ɗik a ro hirasl ar ya Bumbulvuŋ ɗu, i ro kusurfoˀ kaɓa mataptapa ti lendeɓ mi eŋk eŋk.

⁵I njikuw mungra ɗu le, i ɗumo malambaˀ ɗu ta. I ɓi: «I njika mungra ɗu da Bumbulvuŋ.» Joˀ ka, ki zuɓa mungra ɗu mududok na avra.

⁶Vurˀe, mizli miteŋteŋheye, hin taŋ mizliram ti ka le na, a sa dirukuw dibiɗi. Ko da yam madiɗa a ngilo le ng'ar taŋ kwana, anta luuma taŋ gu ta.

⁷Avi ya, ka ki li ɗum ɗu, ki ra wi ti ya vu baˀ pal avu bonoyo. I sa til mi ti mumul, asi ka micik vu angi ya na.

⁸Bumbulvuŋ a ɓi: «I dubunuw gwata, i buguw jiviɗ ɓa ki sipa, yo i vuluw kuti jom ti ki slimiɗ ar ka.»

⁹Pilis ati zungu pilise, i gilaway, a kukuroko taŋ sey ti lejeŋ waɗ boboŋ. Ko ki gi ka taŋ na ta, naɓa gwat masa guw anta.

¹⁰Bonoy haɗi ara kutuko misi moˀore, amma mbur manjih hiri asi Bumbulvuŋ na, Bumbulvuŋ ara gunoŋ ti gi teŋteŋ naŋ.

¹¹Zluzluɓam asi Bumbulvuŋ, kum mizli mijeŋŋehey, mumulom, yo kum misi mevel purlahay, jam salalay!