Read South Giziga PSA 33 Bible Online

PSA 33 - South Giziga bible

PSA 33

¹Kum mizli mijeŋŋehey, jam salalay da Bumbulvuŋ! Kum misi mevel purlahay, a tiɓaŋ le ɓa ki hunumakaŋ.

²Gaka sise da Bumbulvuŋ ti kããku, kiɗakaŋ gujuvur misi zeweɗ kuruˀu!

³Hunumakaŋ ti dimis nawayaŋ, kiɗakaŋ gwat ngi dungur kumoyo kuy kuy ti ji salalay,

⁴asi mingiɓi ngi Bumbulvuŋ naŋ cirre, yo gwat ngi gi naŋ, naŋ gisiŋ.

⁵A wuɗ ɓi mijeŋŋe waɗ minjah, gi teŋteŋ ngi Bumbulvuŋ, a naha ruwuyo le.

⁶Bumbulvuŋ a ga muŋ ti mingiɓi naŋ, waɗ gwat ngi raˀahaya gar, a ga taŋ ti himiɗ ngi balam naŋ!

⁷A tika yam ngir mubuliye ti totoŋ, mubuliy miciɗak ciɗakaya, a cica taŋ kiŋkiŋ ar li purla.

⁸Anja hirwuy gar a zluwun ti Bumbulvuŋ, anja mizli ngir duniya gar a jijikam di:

⁹asi da naŋ miɓa ɓe le na, a gi gisiŋ, a ɓi ani, a gi ani.

¹⁰Bumbulvuŋ a ngila ɓi sukwi ngi mizli majuwaka ngi ge le, a susuyumo ɓi mizli muwulkaka ngi ge le.

¹¹Ɓi Bumbulvuŋ miɗiya jiviɗ naŋ le na, a ndir ndrehhe, yo gwat naŋ mutoho le a mevele ngi gi na, a ndir ngi sete.

¹²Sukwi ngi mizli misi Bumbulvuŋ taŋ i Buymisemuŋ na, a mumulom! Mizli Bumbulvuŋ muwuna taŋ ɓa a tiram inga naŋhay na, a mumulom!

¹³Bumbulvuŋ ara puro hiri baɗ a muŋ, ara pura mizli gar.

¹⁴Ar li naŋ muara na, ara singilo mizli ngi si ruwuyo gar.

¹⁵I naŋ miɗiya taŋ mevel misi purla, ara jik slimiɗ ar slra taŋ gar.

¹⁶Ar vurumo, da buy madiɗa a lih le na, anta asi soje naŋhay mihaɗa ta, yo mbur gambara, anta lih asi naŋ migidaŋ haɗa ta.

¹⁷Pilise, a tikinuw kaɓa ki lum di bugawla gu, gidaŋ naŋ mihaɗa na, anta laha mbur mizli ngir naŋ ta.

¹⁸Amma Bumbulvuŋ ara jigina mizli mazluwunam di, ara jigina mizli muɗuvaka wuluk taŋ le taˀ angi gi teŋteŋ naŋ na,

¹⁹ɓa a laha taŋ avu muco, yo ɓa ko ar hin ngi may kwana, a ndiram ti siifa.

²⁰Ndr'i ra kutukom Bumbulvuŋ: yo mijini ndra ati mbaray ndra, i naŋ!

²¹Mumul ngir mevel ndra a bo ti vaŋ, yo i pulaka mevel ndra le mbak ar slimiɗ naŋ mipal kine na.

²²Bumbulvuŋ, anja gi teŋteŋ ɗike, a ndir angi ndra, kaɓa ndra muɗuvaka wuluk ndra taˀ angi ka na ya!