Read South Giziga PSA 39 Bible Online

PSA 39 - South Giziga bible

PSA 39

¹Dimis ngi wuzla dimis ngi Davitey. I mulumo di ar ɗerewol ngi buy dimis waɗ ar ngi Yedutuŋ.

²I ɓi zleˀe na: «I sa jigina vu ɗu, ɓa i ɓi ɓi malambaˀ ta, da ya a mbuŋ mizli mukuwahay na, i sa ndir ti mi ɗu kaɓa mujuwa le kaˀ kaˀa.»

³Joˀ yi cifi teˀ teˀ siriw, i ɓi ɓi ngi gwat ko pal le ta. Bonoy ɗu a tiri a ɓus mata.

⁴Didak ɗu njim njim, i musuwun ti gidaŋ ti gidaŋ, amma ara wuriy ka vu na si. Joˀ i zla i ɓi:

⁵«Bumbulvuŋ, bigiy hin ngi siifa ɗu masa kiɗ mi, hin ɗu a ndir nga mbuŋ kite ka na, anja i si na hin ɗu mi neˀ na!

⁶Pura, ki vuliy hine, haŋ taˀ purla si, zik ɗu a ruwuyo, avu ka naŋ kaɓa i gwat wãˀ ta. Haˀaw, mbur muro deŋ kuy kuy gar na, i himiɗ ngataraŋ!

⁷Haˀaw, mbur a ru, a mawakaɓa susuɗuk! Haˀaw, wus naŋ haɓar haɓar gar na, i himiɗi! A ra cikila zlile, amma a si na mbur masa hila ta.

⁸Bumbulvuŋ, zle wurenna, i kutuk mi aruŋ maka? I ɗuva wuluko le taˀ ar ka.

⁹Lihiy avu mungra ɗuwoyo gar, ki puliy mbak da gilaway, ɓa a zikiy ta.

¹⁰I tiɗa me le, y'anta wuna mata, asi migiy ɓa i tiɗa mi i ka.

¹¹Pula kiɗ ɗu, asi kiɗ ɗike, ara finiy gidaŋ.

¹²- Da ki ra ga bonoy da mburo vur malambaˀ naŋ na, ki kutaŋ ti kuti. Ki zuma gwat naŋ mawuɗo, hor hor kaɓa mumuyuŋ a hur yi ngi widisi: Haˀaw, mbur gar na, i himiɗ ngataraŋ!

¹³Bumbulvuŋ, cine diradibiɗ ɗu, cine ya matiluw mi na, ya matuwuy na, jiko slimiɗe, ki disla ta. Asi ya a hay ɗike, yi moholoy, yi mulak kaɓa dideˀ ɗuwoy ceke.

¹⁴Ki puriy mata, ɓa i singir muduba, a dirba nah, i sa cuh, ɓa y'anta mata wãˀ.»