Read South Giziga PSA 40 Bible Online

PSA 40 - South Giziga bible

PSA 40

¹Dimis ngi wuzla dimis ngi Davitey. I mulumo di ar ɗerewol ngi buy dimis.

²I njih hiri le njah wãˀ asi Bumbulvuŋ: a guɓo guɓ ng'avi ya, a cin ya matilaŋ mi na le.

³A ɗiɗo ya le tir vigiɗ mijileŋ mazizi vu, tir ndileɓ misi virzi naŋ a lum ta. A slikiɗiy le deŋ, saraya taˀ taˀ ar mandazlay muwã, a jiniy ɓa i ru ndol ndol.

⁴A vuliy dimis nawaya taˀ avu mi, dimis ngi hunuma Buymisemuŋ ndra. Mizli haɗi a sa purakaŋ, a sa zluwunam ti Bumbulvuŋ, yo a sa njaham hiri njah aseˀeŋ.

⁵Mbur mupula mevele le mbak da Bumbulvuŋ, anta mbiɗi hiri ng'avi mizli magakaŋ zluwun na ta, yo ko ng'avi misi slirey na ta na, a mumul!

⁶Bumbulvuŋ ɗu Buymisemuŋ, gwat ka muwulka ngi gi waɗ cekenehey, ka miga ndra taŋ na, taŋ haɗa! Ko mbur ngi wi ati ka anta. I wuɗ i til di mi, i mahiri nah, i mahiri nah, amma mingiɓi nah naŋ haɗa, hã fineˀ gidaŋ.

⁷Ko mikuli, ko gwat ngi vulo, ki wuɗ ta, - Ki wuniy slimiɗe le ngi cin - ginew mizlam zlam malla mikuli ngi pula mungra na, ko ki wuɗ ta.

⁸Joˀ yi ɓi na: «Pura, y'ani i ra ru ng'avi ka ti ɗerewol mufuɗa, misi mingiɓi mutoho ara vur ya.

⁹Buymisemuŋ ɗu, i wuɗ i gi gwat ka mawuɗo, yo i ja ɓimujuwa ɗike le a hur mevel ɗu.»

¹⁰I til mi le ti ɓi mijeŋŋe ɗik a wuzla zigiduw haɗa. Ĩˀĩ, y'anta taˀa mi ta. Bumbulvuŋ ɗu ki si na le!

¹¹Gi jeŋŋe ɗike, yi ɗumo ɓi nah teˀ a hur mevel ɗu ta, gi kaslsla ɗik ati ka milihiy na, yi pula ɓi nah teˀ a kwacay ɗu ta, gi teŋteŋ ɗik ati ɓi mikaslsla ɗik na, yi ɗumo ɓi nah avu zigiduwo ta.

¹²Ka Bumbulvuŋ, k'anta sa tika pura ircece ɗike kileŋ avu ya ta. Gi teŋteŋ ɗik ati ɓi mikaslsla ɗike, a sa wam ti ya vu ndrehhe.

¹³Bonoy haɗa, a sluf ta, a wuɗ a sirtiy, mungra ɗuwoy a ndihikiy le, vurˀe, y'anta pura taŋ gu mata, taŋ haɗa fineˀ hamac ngi hirnga ɗu, mevel anta ar haya mata.

¹⁴Bumbulvuŋ, ambuh, lihiy takwa! Bumbulvuŋ, so kutum, so jiniy!

¹⁵Mizli mawuɗam a kiɗikiy vagay na, anja a surom sor sor ti mesem gar taŋ! Mizli mawuɗam ɓa bonoy a lumiy na, anja a mam murdirba ti mesem!

¹⁶Mizli masingiram lambaˀ kiraw ar ya na, anja mesem a kiɗa taŋ ɓaˀ ɓaˀ, yo a taˀa taŋ mi siriw.

¹⁷Mizli maram ti sipi ɗik gar na, anja a zluzluɓam vur ka! Mizli mawuɗam ɓa ki laha taŋ na, anja a taˀaka mi teˀ le ta, a ɓam: «Bumbulvuŋ naŋ madiɗaŋ!»

¹⁸Yi mbur misi murga, migeˀ ircece, Bumbulvuŋ ara ki slimiɗ ar ya. Ki mijini ɗu, yo milaha hirnga ɗu, Buymisemuŋ ɗu, ki mur mata!