Read South Giziga PSA 47 Bible Online

PSA 47 - South Giziga bible

PSA 47

¹Dimis ngi wuzla dimis ngi sukwi ngi Kore. I mulumo di ar ɗerewol ngi buy dimis.

²Kum sukwi ngi mizli gar, kiɗaka haŋ da Buymisemuŋ, hunumakaŋ, jakaŋ salalay.

³Asi Bumbulvuŋ Mimadiɗa, a gi zluwun da mbur. I buy madiɗa muwãˀ ngi si ruwuy gar.

⁴A ga le ɓa mizli a hinam ˀay a mbuŋ ndra, yo a pa sukwi ngi mizli le asi sar ndra.

⁵A wuna ndra hirwuy le da ndra, ndr'i ra jijiham di, ndra mizli ngir sukwi ngi Zakop yeme naŋ.

⁶Buymisemuŋ ara jiɗ nga muwã Siyoŋ, ara jakaŋ salalay, ara fakaŋ tulum, naŋ Bumbulvuŋ ndra.

⁷Hunumaka Buymisemuŋ ti dimisi, hunumakaŋ, hunumaka buy ndra madiɗa ti dimisi, hunumakaŋ.

⁸Buy madiɗa miwa hirwuy gara, i Buymisemuŋ, hunumakaŋ ti dimis ɓa mizli sinakaŋ.

⁹Buymisemuŋ ara zum buy ar sukwi ngi mizli ngi si ruwuy gar. Buymisemuŋ a cifi le ar janga naŋ mipal kine ngi buyoy.

¹⁰Yarma ngi si sukwi ngi mizli a cikilam le, i sukwi ngi Buymisemuŋ ngi Abraham. Asi buy madiɗa mijigina ruwuyoyo t aŋ asi haŋ ngi Buymisemuŋ naŋ dum hirnga ngi gwatay gar.