Read South Giziga PSA 48 Bible Online

PSA 48 - South Giziga bible

PSA 48

¹Dimis ngi wuzla dimis ngi sukwi Kore.

²Bumbulvuŋ naŋ madiɗaŋ, Buymisemuŋ ndra, a ndila le ɓa a hunumakaŋ, ar walahay naŋ madiɗa, ar muwã naŋ mipal.

³Muwã mukuy haɗa, musubur, hirwuy gar mamumul di, muwã Siyoŋ, i mikiɗa mi ndok ngi li vay muŋ, walahay ngi buy madiɗa muwãˀ.

⁴Ar hay ngi buyoy misi a Siyoŋ, a sinaka le, Buymisemuŋ i li muguno ti mohol.

⁵Puraka buy madiɗahaya, a wam haŋ le ar wala taŋ, ara ram arleˀe nga zlir dibiɗ ti Siyoŋ.

⁶Taŋ mupuraka Buymisemuŋ blew si na, a zuma taŋ hirngaŋ, a ga taŋ zluwun, a hilaka kil hoc.

⁷A zlaka jijik kirkir daˀ arleˀeŋ, gidaˀas gidaˀas, kaɓa ngwas, kwacay majaŋ ngi yi.

⁸Kaɓa burkataŋ misi tisi pas ngi miprik, mawaha palalam madiɗa ngi Tarsisey.

⁹Gwat ndra micinaka maɓaka ɓi naŋ tuwa na, i puraka le ti hiri ndra, ar walahay madiɗa ngi Bumbulvuŋ, Buy misi gidaŋ wãˀ, ar walahay madiɗa ngi Buymisemuŋ ndra, Buymisemuŋ ara vulaŋ gidaŋ ngi caˀa.

¹⁰Buymisemuŋ, a hur hay ɗike, gi teŋteŋ ɗike naŋ da keŋŋe a hirnga ndra.

¹¹Buymisemuŋ, mizli ara hunumukuw yo ara zilaka slimiɗ ɗike, ko a maka gar. Gwat ngi gi ɗike, naŋ jeŋŋe ndrehhe.

¹²Mizli ara mumulom a muwã Siyoŋ, yo asi ruwuy Zuda kwana, ara zluzluɓam asi kiitaka miga.

¹³Gunoko hirnga ngi Siyoŋ gun, slufaka hay musuburoyo.

¹⁴Puraka mohol naŋ, hiri ngal ngal, slufaka hay madiɗa madiɗahaya, ɓa kisa ɓaka ɓi nah da dideˀ kumoy nga mbuŋ nga mbuŋ:

¹⁵Buymisemuŋ hana i Buymisemuŋ ndra hã ngi sete, ara kisa ndra...