Read South Giziga PSA 49 Bible Online

PSA 49 - South Giziga bible

PSA 49

¹Dimis ngi wuzla dimis ngi sukwi Kore. I mulumo di ar ɗerewol ngi buy dimis.

²Kum mizli titirahay gar, cinaka ɓi ani, kum mizli ngi si ruwuy gar, jikaka slimiɗe,

³kum mizli mizlewey ati micawwahay, misi zlilihey ati misi murgahay jom arleˀeŋ.

⁴Balam ɗu a ɓi di i ɓi ngi sin, wuluk ngir mevel ɗu, i wuluk mezlehey.

⁵I ra jika slimiɗe ngi cine ɓi mizli maɓaka ti kicuwul, i ra bo ti mbiɗeˀvra naŋ ar li kiɗa gujuvur.

⁶Ar hin malambaˀa, ko da misi wer mitikina vuhoy a gunikiy le kwana, i zluwun vur mike?

⁷Taŋ a njaham hiri asi gwat ngi lum taŋhay mihaɗa, yo a gam zlokoko ti zlili taŋhay mihaɗa na.

⁸Mbur titra a mbiɗa hirnga ngi siifa ngi cil naŋ gu ta, anta wurka Bumbulvuŋ ngi mbiɗa hirnga ngi siifa nga naŋ gu ta.

⁹Cikili ngi siifa, naŋ tuwaˀ haɗa, ko zlili kiteka na, anta mbiɗa mbiɗeˀ ta wãˀ.

¹⁰Mbur a sa ndir ti siifa naŋ caˀa aruŋ kwa? A sa ci hirnga a ruwuyo ta ndiɗaˀ kwa?

¹¹Na, i ra puraka misi sineye kwana, ara micam, kaɓa mbur gilaw ati mbur lambaˀ vuna ya, yo ara pulaka zlili taŋhaya da mizli mekelemey.

¹²Ko da a zilaka hirwuy taŋhay ti slimiɗ taŋhaya tekeɗe kwana, zivi i hay taŋhay ngi sete, i li cifi taŋhay ngi wãˀa.

¹³Mburo ti dudok naŋ gar na, naŋ anta zik ta, a bam vu ati gwat misãmi, mislaka ˀay naŋ le.

¹⁴Mizli mapulaka mevel taŋ mbak gilaw gilaw da vu taŋ tehhe muŋ na, gwat makutuko t'anihĩ, mizli misi mingiɓi a ga taŋ kuyyo na, gwat masa ndilo avu taŋ tumbuŋ anihĩ:

¹⁵A sa gicaka taŋ ar li ngi mizli mumucahaya, kaɓa magicam tumuŋhoy ar gezleŋ, masa bi taŋ nga jigine, i mucu. Put ti miprik naŋ na, mizli mikaslslahay a sa kirpaka taŋ asi sar, dumvu taŋhay a sa susuymom ar li ngi mizli mumucahay, taŋ kileŋ avu hay taŋhaya.

¹⁶Amma Buymisemuŋ a sa mbuɗo hirnga ngi siifa ɗu, tir li ngi mizli mumucahaya, haˀaw, a sa tuɓo ya.

¹⁷Da mbur ara gi zlili, yo hay naŋ ara gil ngra mbuŋ na, ko ki zluwun ta.

¹⁸Asi ti naŋ masa muc na, anta sa ru ti gwat neˀ a haŋ ta, yo zlili naŋ anta sa ci aseˀe ng'ar vigiɗe ta.

¹⁹Ti naŋ misi ar siifa na, a ngil wuy ti vu naŋ, a ɓi: «A ra kiɗikiy haŋ, asi gwat gar ara ru avu ya kuy kuy.»

²⁰A sa ra luuma li cifi ngi dideˀ naŋhaya, yo t'anta sa puraka li minjahha mata ndiɗaˀ.

²¹Mbur misi ar wuya, masla wala ngi ɓi ta na, a bam vu ati gwat misãmi, mislaka ˀay naŋ le.