Read South Giziga PSA 50 Bible Online

PSA 50 - South Giziga bible

PSA 50

¹Dimis ngi wuzla dimis ngi Asafay. Buymisemuŋ mifineˀ kulihey, Bumbulvuŋ a ɓi le, ara zila duniya, zle tisi pas mabawa, hã sesẽŋ asi pas madiɗi.

²Buymisemuŋ a wucuɗ wilik wilik a Siyoŋ, walahay mimezle haɗa.

³Anja Buymisemuŋ ndra a sawa, yo anja a taˀa mi ta! Vu mihilɓiɓ, ara zuma li a mbuŋ naŋ, burkataŋ gambara gun hirnga naŋ.

⁴Buymisemuŋ ara zila birngiŋ ati ruwuyo paɗ ti muŋ, ng'ar kiita ngi mizli naŋhay.

⁵A ɓi: «Cikilaka hirnga ngi mizli miteŋteŋ ɗuwoyo, mizli mujumom ˀay le ati ya ti gi mikuli.»

⁶Yo anja muŋ a til mi, a ɓi: «Buymisemuŋ naŋ jeŋŋe, migi kiita i naŋ».

⁷Mizli ɗuwoy cinam, yi wuɗo ɓukum ani, Israyel, i wuɗ i mbuɗuw hirnga: «Buymisemuŋ i ya, Buymisemuŋ ɗiki.»

⁸Ya mawuɗ i mbuɗuw hirnga na, anta asi mikuli ɗikey, ka maga taŋ na ta. Na zle, ki ra giy mikuli mizlam zlam a mbuŋ ɗu ndrehhe, ko mbak le ta.

⁹Y'anta sa ra ji gusoŋ a hay ɗike ta, malla ko bazuway ar gezleŋ ɗike, i ji ta.

¹⁰Asi gwat misãmi misi a ɓuh gar, waɗ misi a muwãhay gar na, i ngayahay.

¹¹I si na ɗiyuw misi a muwãhaya le gar, yo gwat misãmi ngi ɓuhoy gar na, i ngayahay.

¹²Da ko may a jiy le zleˀe kwana, y'anta sa ɓuw di ta, asi duniya ati gwat mundus ndus ngi raˀahay gar na, i ngayahay.

¹³Y'ada i zum useˀ ngi gusoŋhoy kwa? Y'ada i si pumbus ngi bazuwayaya kwa?

¹⁴Ga mikuli ɗik ngi hunumiy ya Buymisemuŋ, yo ga gwat ngi ji mi ɗik, ka miɓa a mbuŋ ya Mimadiɗa na.

¹⁵Ar hin bonoy mulumuw le na, ziliy, i sa lihuw, joˀ kisa giy dudoko.

¹⁶Amma Buymisemuŋ a ɓa mbur misi moˀore na: ɓimuɗuvahay na, ki slufa taŋ ti hirnga ngi mike? yo jumoˀay ɗu ati ka na, ki ɓa ɓi naŋ avu mi ngi mike?

¹⁷Na ki ra pura kuti ɗu hiris le mayse, yo ki ra pula mingiɓi ɗu mbak mayse.

¹⁸Da ki pur muhul le na, ki jumom ˀay cuwa, ki ji ngama ti migi madamahay.

¹⁹Ki pula vu ɗike mbak ngi ɓi ɓi ngi moˀore, irne ɗike, a gijuw ɓi ngi slir.

²⁰Ki cifi, joˀ ki sla virzi da sukum ɗike. Ki hirya zuŋ ngi munuko fuk wãˀ.

²¹Pura gwat ka miga ani so, ki wuɗ ɓa ya teˀ di sukwa? Ki wa na, yakaɓa ka ya kwa? I buguw malambaˀ ɗike cay, zayɓi nah, naŋ a hirnga ɗiki.

²²- Kum mizli mapuyukom hirnga ti Buymisemuŋ, slaka wala ngi ɓi ya maɓa na! Da kine ta na, i puwukum meɗ meɗe, ko mbur masa tuɓukum gu anta.

²³Mbur magiy mikuli ngi hunum ɗu na, ara giy dudoko, yo ara zuɓ jiviɗ ng'ar li ya masa bigaŋ di, ya Buymisemuŋ malahaŋ na.