Read South Giziga PSA 51 Bible Online

PSA 51 - South Giziga bible

PSA 51

¹Dimis ngi wuzla dimis ngi Davitey. I mulumo di ar ɗerewol ngi buy dimis.

²A ɓi ɓi ngi mijiviɗ Nataŋ mira pura Davit, a dirba Davit vuna migam madama ati Batseba.

³Aw Buymisemuŋ ɗu, ka miteŋteŋ haɗa na, puriy ircece. Ka mapur ircece haɗa na, susuyumo mungra ɗuwoy avra.

⁴Buniy malambaˀ ɗuwoy ndrehhe avra, yo buniy mungra ɗu avra.

⁵Asi i si na zluɓ ɗu le, mungra ɗu naŋ da ndrehhe a mihiri ɗu.

⁶I guw mungra le, i guw di da ka pal ɗike, gwat ka mapura kuy ta na, i ga le si, vurˀe, ka mira ɓa ɓi na, naŋ jeŋŋe, ka mira ga kiita na, mbur a mbuɗuw hirnga ta.

⁷Pura, a yikiy cak ar gi gwat malambaˀa, ya guzluv ar mungra, diga ya misi a kwacay maha.

⁸Amma gwat ka mawuɗ a mevel mburo, i ɓi mikaslsla. Ar wuluk mijileŋ ngir mevel ɗu, ki ra vuliy sin ɗiki.

⁹Zuɓa mungra ɗu avra ti mihaŋ ngi izop, ɓa mevel ɗu a tiri leɗeɗe, buniy, ɓa i tiri babara fineˀ yama.

¹⁰Tiliy mi ti ɓi ngi pula mungra, ɓa i zluzluɓ, i mumul haɗa, ka mumuɗiy didak tuwa na, ɓa i sa ɓuruku.

¹¹Mbiɗi duba avu mungra ɗuwoyo malambaˀ ɗuwoy gar na, puya taŋ avra.

¹²Aw Buymisemuŋ ɗu, giy mevel mileɗeɗe, ciy wuluk ma nawayaŋ.

¹³Ki hizigiy fuk kileŋ avu ka ta. ˀUf ɗik mipal misi angi ya na, ki tiɓa a muŋ ta.

¹⁴Ka milihiy na, ga ɓa yi mumul, yo anja ˀUf ɗik a jihiy jah gidaŋ gidaŋ.

¹⁵Mizli muzluɓam ɓi le gar na, i dubuna taŋ sipa jiviɗ ɗike, joˀ migi mungrahay, a sa moko ng'avu ka a muŋ.

¹⁶Aw Buymisemuŋ ɗu, Bumbulvuŋ milih ɗu, lihiy avu muco, ka milihiy na, ɓa i til mi ti ɓi nah calala ti irne ɗu.

¹⁷Bumbulvuŋ ɗu, wuniy mi ɗu, ɓa i hunumuw ˀay paɗ a muŋ.

¹⁸K'anta ki ngum i guw mikuli ta, mikuli ti ginew zlam zlam kwana, k'anta ki wuɗ ta.

¹⁹Aw Buymisemuŋ ɗu, mikuli ka mawuɗ na, i mikuli magukuw di ti didak gbeŋ gbeŋ, Buymisemuŋ ɗu, ya misi didak gbeŋ gbeŋ na, ki puliy fuk ta.

²⁰Ga mezle da Siyoŋ, ndira mohol ngi Zeruzalem a muŋ.

²¹Dar kisa wuɗ mikuli mijeŋŋehey gwat ngi vul wãˀ waɗ mikuli ti ginew zlam zlam wãˀa, a sa gam mikuli ti gusoŋhoy ar li ngi mikuli ɗike.