Read South Giziga PSA 55 Bible Online

PSA 55 - South Giziga bible

PSA 55

¹Dimis ngi wuzla dimis ngi Davitey. I mulumo di ar ɗerewol ngi buy dimis. Dimis ngi gujuvur.

²Aw Buymisemuŋ ɗu, jika slimiɗ ngi cine diradibiɗ ɗu, da ya mira tumbuluw na, ki ɗum ta.

³Ki slimiɗ ar mingiɓi ɗu, yo mbiɗiy di, Didak a muɗiy le, i ra mbul mi, i ra liˀi kiŋkiŋ lambaˀ,

⁴asi ya macin widi ngi mesene ɗu, yo mbur misi moˀore ara tikiy ˀay, ara vunaha malambaˀ naŋ ng'ar ya, yo a ro fõh fõh ng'ar ya.

⁵Didak ara muɗiy gbir gbir, membezleŋ a muɗiy le ngi muc ngi muc.

⁶Zluwun a ci le avu ya, hã i jijik kirkir, yo a siˀitiy le siˀit.

⁷Joˀ yi ɓi: «Ey ehe! Da y'ada zleˀe ti zlaraka gonok na! anja ani i slikiɗ le, i ra ɗum le ar li mekelem.

⁸Haˀaw, i sa kil kileŋ, ɓa i ra hin a wuzlaɓuh mikirɗak kirɗaka.

⁹I sa wus vu ɓa i lum li ɗum avu burkataŋ mibiw biwe.»

¹⁰Bumbulvuŋ, hirya lesl ngi mesene ɗuwoyo yo wuɗuka taŋ ˀay ar wala taŋ. Asi i pura moˀore waɗ wunka ˀay misi ar walahay madiɗa na le.

¹¹Ti duvuɗ ti papas gar, ara gunoko duba moholo ti moˀore taŋ na. A hur walahaya, i mendere ati bonoy.

¹²A hur walahaya, i mungra madiɗa, gi gwat ti gidaŋ waɗ tikina vu, anta mbak le ar li ngi lumahaya ta.

¹³Da maziy i mesene ɗu zleˀe na, anja ani i ɓusaŋ. Da mapiy hirnga i mbur mazlir ti ya ta zleˀe na, anja ani i sumuɗ le ava.

¹⁴- Amma i ka mbur nga ya, ndra misirkam le, yeme ɗu.

¹⁵I kiɗam slir le kuy kuy ar wala ndra, yo ar hay ngi Buymisemuŋ, i ram praˀpraˀ ati ka.

¹⁶Anja muc a luuma mesene ɗuwoyo gurjik, anja a cam titiri ng'ar li ngi mizli mumucahaya, asi gi moˀore, naŋ nga hay taŋ, a hur taŋ.

¹⁷Ya i zila Bumbulvuŋ, joˀ naŋ a sa lihiy.

¹⁸Ti miprik, ti pas deŋ, ti pas taˀa, didak ara muɗiy, i ra mbul mi, amma Buymisemuŋ a cine ˀay ɗu le.

¹⁹Ar li kiɗa vu, zigiduw a hirnga ɗu haɗa, a tuɓo ya le, a wi ti ya vu, ko gwat a giy neˀ ta.

²⁰Anja Buymisemuŋ a cine ˀay ɗu, yo anja a guco taŋ mi, naŋ mazum buy diga ɗuva virzi ngi duniya! Mizli tayna, anta sa mbiɗaka wuluko ta, t'anta zluwunam ti Buymisemuŋ ta.

²¹Mbur nah, a ja haŋ le avu ngama naŋhaya, a hirya jumoˀay naŋ le.

²²Mi ngi kwala naŋ, naŋ deɗek ka mam, amma a mevele, i wuluk ngi kiɗa vu. Mingiɓi naŋ, naŋ nuffo fineˀ mala, amma a sli vu ka sliwiɗi.

²³Pi sar ti jijir ngir mevel ɗike, ka nga hirnga Bumbulvuŋ, naŋ a sa vuluw gidaŋ, naŋ anta sa pula mbur mijeŋŋe diɗ ta ndiɗaˀ.

²⁴Naka Buymisemuŋ, kisa pi sar ti taŋ ng'ar zivi mubaŋ, taŋ mizli mikiɗa hirngahay, yo mitikina vu tayna, t'anta sa ndilaka reta ngi vi taŋ ar siifa ta. Amma ya, i ro hiri njah asi ka.