Read South Giziga PSA 57 Bible Online

PSA 57 - South Giziga bible

PSA 57

¹Dimis ngi wuzla dimis ngi Davitey. I mulumo di ar ɗerewol ngi buy dimis. A ɓi ɓi ngi Davit mikil ng'ar butum, ɓa a lih avu Sawul. Dimis ngi zli ti ˀay maɓi: «Ki pula a hiryi ta...»

²Puriy ircece! Aw Buymisemuŋ ɗu, puriy ircece, asi i wuɗ i ɗum ti ka, yo i wuɗ i ɗum ɗum asi kirpasl ɗiki, ɓa hã hin ngi bonoy a cuh ɗagay.

³I zil di i Buymisemuŋ Mimadiɗa, i zil di i Buymisemuŋ masa cici zlak ar ya:

⁴Anja Buymisemuŋ a loho ya baɗ ti muŋ! Mbur magidiɗiy na, a za Bumbulvuŋ le, anja Bumbulvuŋ a bigiy teŋteŋ naŋ ati kaslsla naŋ!

⁵Y'ani tup a wuzla mizli misi moˀore ka moboroy, mizli misi sliŋ taŋhay kaɓa ziwit ati luvutoy, yo irne taŋ a zum raɓ raɓ kaɓa maslalam.

⁶Haˀaw Buymisemuŋ ɗu, madiɗa ɗik a funa muŋ le, anja dudok ɗik a wa hirwuyo kurzluˀ gar!

⁷A ngikiy ngamngam le a jiviɗe, a gikiy mokor le asi ˀaya, a lam vigiɗ a mbuŋ ɗu, ɓa i diɗ ng'ara, amma i taŋ vuna tehhe misa ndilam yik yik ng'ara.

⁸Mevel ɗu a hin le Buymisemuŋ ɗu. Kay! Mevel ɗu a hin le, i wuɗ i hunumuw ti dimisi.

⁹Puɗuk so mevel ɗu, gujuvur ati garaya, hurumom, ɓa i wuna li daŋ daŋ.

¹⁰Bumbulvuŋ, i sa guw sise a wuzla mizli, i sa hunumuw ti dimis a wuzla sukwi ngi mizli gar.

¹¹Asi gi teŋteŋ ɗike, a ndil sesẽŋ a muŋ, yo gi kaslsla ɗike, a ndil sesẽŋ avu gazlavay.

¹²Haˀaw Buymisemuŋ ɗu, madiɗa ɗik a funa muŋ le, anja dudok ɗik a wa hirwuyo kurzluˀ gar.