Read South Giziga PSA 60 Bible Online

PSA 60 - South Giziga bible

PSA 60

¹Dimis ngi wuzla dimis ngi Davitey, ngi wulka gwat mucuh zleˀe, i dimis ngi gujuvur. I mulumo di ar ɗerewol ngi buy dimis. Dimis ngi dubuna gwat.

²A ɓi ɓi ngi Davit mira kiɗa mizli Siri ngi ruwuy Mezopotami, waɗ ngi Sobahay. Zoˀap a mawa, a kiɗo soje ngi Edomoy durmuk kuruˀ nga cuw ar mukutuk Mandaŋ. Davit a ɓi:

³Aw Buymisemuŋ ɗu, ki pula ndra le zlaɗ, ki zliɗa ndra hirnga le pal pal, ko ki ji mevel le kwana, ɗiya ndra a muŋ!

⁴Ki jijika hirwuyo le ngbir ngbir, ki ndisla le kpah kpah: sluruɓa ndisl naŋhaya, asi ara wusu!

⁵Ki sa bonoy le haɗi da mizli ɗikeye, ki tika ndra ˀay le ti mbaazla mawi vu.

⁶Mizli maɗuvukuw hirnga na, ki vuruka taŋ le, ɓa a kilam vur luvut maso ng'ar taŋ.

⁷Laha ndra ti gidaŋ ɗiki, zila ndra mi, ɓa ndra yeme ɗikey na, i laham.

⁸Buymisemuŋ a ɓi le ar hay nga naŋ: «Bugawla i ya! I wunka walahay Sikeme, yo i sla sozo ngi Sukoto mburzlaŋ mburzlaŋ.

⁹Galaˀat inga ya, Manase inga ya ma, Efrayime, naŋ kaɓa jiiku ngi gandaf ngi ɗumo hirnga ɗu, Zuda naŋ kaɓa ganday ɗu ngi buyoy.

¹⁰Moˀapa, naŋ kaɓa kisa ɗu ngi bun. I wa Edomo le, i li cuko tarak ɗu. I hiziga widi ngi vurum kaˀ ng'ar Filisti!»

¹¹Masa ru ti ya ng'ar walahay majiginaka kuy kuy i waka? Masa ru ti ya hã sesẽŋ a Edom i waka?

¹²Na, sey i ka Buymisemuŋ mupula ndra zlaɗ na ta kwa? Ka Buymisemuŋ makisa soje ndrahay mata na takwa?

¹³So jini ˀis asi ndra ngi kiɗa mizli mazliram ti ndra tahaya, asi jiniˀis ngi mizli, i jiniˀis migisiŋ gisiŋ ta.

¹⁴Da Buymisemuŋ naŋ da ati ndra na, i lumam bugawla: mizli mazliram ti ndra ta na, i naŋ masa buɗa taŋ asi sara.