Read South Giziga PSA 62 Bible Online

PSA 62 - South Giziga bible

PSA 62

¹Dimis ngi wuzla dimis ngi Davitey. I mulumo di ar ɗerewol buy dimis. Dimis Yedutuŋ mizlaŋ.

²Haˀaw, i pul vu gu na, sey a ciki Buymisemuŋ pal naŋ, malihiy i naŋ.

³Haˀaw, naŋ i mandazlay muwã ɗu, i milih ɗu, i li ɗu muguno ti mohol, y'anta jijik ta wãˀ.

⁴Ki roko wusam daɓ daɓ gar kumo, ng'ar mburo, ɓa ki zlumburakaŋ, kaɓa mapam haŋ da dalam miginisl le, malla da zluɓ madiɗi. Na, kisa pulaka ɓi naŋ tivunaka?

⁵Haˀaw, ki wulkam ngi kumo, sey ɓa ki zizakaŋ li naŋ misi araŋ, joˀ ki hĩyãm gi slir. Ki ɗuwulam mi daˀ avu mi tewle, amma a mevel kumo, sey nisa vu.

⁶Haˀaw, yi pul vu, sey a ciki Buymisemuŋ tewle, ya manjih hiri na, aseˀeŋ.

⁷Haˀaw, naŋ i mandazlay muwã ɗu, i milih ɗu, i li ɗu muguno ti mohol, y'anta jijik ta wãˀ.

⁸Milih ɗu ati dudok ɗu,i Buymisemuŋ, mandazlay muwã ɗu migidaŋ waɗ li ɗum ɗu, i naŋ.

⁹Kum mizli misi a ciki Buymisemuŋ, njaham hiri aseˀeŋ, ɓakaŋ ɓi ngi gwat misi ar mevel kumoyo Buymisemuŋ i li ɗum ndra.

¹⁰Haˀaw, mizli titrahaya, i himiɗ ngataraŋ, mizli micawwahaya, a sinam sey slir. Da a paka taŋ jommo cek ng'ar kilo na, himiɗ a funa taŋ le ti dudoko.

¹¹Ki njaham hiri asi gi gwat ngi moˀore ta, ki pulaka vu kum mbak vur gwat mitiɓa ti gidaŋ ta. Ko da zlili kum ara sik kwana, anja mevel kum a hin aseˀe ta.

¹²Buymisemuŋ a ɓi anihĩ, i cin, a ɓi ɓi ngi gwatay cuw, a ɓi na: «Gidaŋ inga ya Buymisemuŋ.»

¹³Yo gi teŋteŋ kwana, i ngi ɗik vuna ma Bumbulvuŋ, asi ki wurka mbur gar weˀe avu gwat ngi gi naŋ.