Read South Giziga PSA 64 Bible Online

PSA 64 - South Giziga bible

PSA 64

¹Dimis ngi wuzla dimis ngi Davitey. I mulumo di ar ɗerewol ngi buy dimis.

²Aw Buymisemuŋ ɗu, cine niˀic ɗu, i ra zluwun ti mesene ɗu, cik vu ar ya.

³Ɗumiy kileŋ avu gidiɓi ngi migi gwat malambaˀhaya, kileŋ avu migi malambaˀhay macikilam yaŋŋa na.

⁴A mbusaka irne taŋ le teteɓ teteɓ kaɓa maslalam, mingiɓi taŋ misi ka muwuŋ a mi luvut na, a wam di vu le weˀ.

⁵Mbur migi gwat ta si na, a wuɗam ɓa a mulaka ti yaŋ yaŋ, a mulaka gurjik, manja zluwun.

⁶A vuɗam ɓi vaɗ vaɗ ti wer, a ɗiyam ɓi yaŋŋa ngi ji vu kaɓa kwar, a ɓam: «Masa si na i waka?»

⁷A gam meɗef nga gi mungra madiɗa: a ɓam: «I ɗiyaka ɓi ngi meɗefe le ti jiviɗ naŋ, mevel ngi mburo naŋ jileŋ, mbur masina gu anta!»

⁸Amma Buymisemuŋ a mula taŋ, gurjik si na, tiɓa luvut: i taŋ miɗiyaka ɓi nah ti haŋ taŋ tehhe.

⁹Mingiɓi taŋ tuwa, a mbiɗi le nga hirnga taŋ tehhe a muŋ. Mbur mupura taŋ le gar na, a hir hirnga.

¹⁰Zluwun ara ga mbur gar, a tilam mi ti gwat Buymisemuŋ miga, a slaka wala ngi gwat naŋ maga.

¹¹Anja mbur mijeŋŋe a lum cira hiri a mbuŋ Bumbulvuŋ, anja a tiri di li ɗum naŋ, joˀ mizli misi mevel purlahay, a sa ngilam di wuy.